ព្រះវិហារៈ លោក សំ សួម នាយការិយាល័យសុខាភិបាលកងពលតូចអន្តរាគមន៍លេខ៩ បានទទួលមរណភាពយ៉ាងអាណោចអាធ័ម ក្នុងពេលជិះម៉ូតូដួលបាក់.កស្លាប់ភ្លាមៗនៅនិងកន្លែងកើតហេតុ។
ហេតុការណ៍ដ៏សោកសង្រែងនេះ បានកើតឡើងកាលពីវេលាម៉ោង៤៖៣០នាទីរសៀលថ្ងៃពុធ ៧រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី៧ ខែកុម្ភៈ ឆ្នាំ២០១៨ ស្ថិតត្រង់ចំណុចភូមិ អូរក្សាន្ត ឃុំទឹកក្រហម ស្រុកជាំក្សាន្ត ខេត្តព្រះវិហារ។
អធិការនគបាលស្រុកជាំក្សាន្ត លោក រួន យ៉េត បានឲ្យដឹងថា មុនពេលកើតហេតុជនគ្រោះបានជិះម៉ូតូម្នាក់ឯង លុះមកដល់កន្លែងហេតុ ស្រាប់តែម៉ូតូជនរងគ្រោះរេចង្កូតធ្លាក់ចូលទៅក្នុងប្រឡាយក្បែរចិញ្ចើមផ្លូវ បណ្តាលឲ្យជនរងគ្រោះដួលបាក់.កស្លាប់ភ្លាមៗនៅនិងកន្លែង។
លោកអធិការស្រុក បានបញ្ជាក់ថា ជនរងគ្រោះដែលស្លាប់មានឈ្មោះ សំ សួម ភេទប្រុស អាយុ៥៥ឆ្នាំ បើកបរម៉ូតូម៉ាកហុងដា C125 ពណ៌ខៅ្ម សេរីឆ្នាំ២០១៨ គ្មានស្លាកលេខ រស់នៅភូមិសែន រុងរឿងមួយ ឃុំទឹកក្រហម ស្រុកជាំក្សាន្ត ខេត្តព្រះវិហារ។
លោកថា ក្រោយពីកម្លាំងជំនាញចុះទៅដល់កន្លែងកើតហេតុឃើញថា ពិតជាស្លាប់ដោយសារដួលម៉ូតូខ្លួនឯង ក៏បានប្រគល់ម៉ូតូ ព្រមទាំងសពជនរងគ្រោះឲ្យទៅក្រុមគ្រួសារយកទៅធ្វើបុណ្យតាមប្រពៃណី។
ប្រភពពីប្រជាពលរដ្ឋ បានឲ្យដឹងដែរថា ជនរងគ្រោះខាងលើមានជំងឺប្រចាំកាយ (លើសឈាម) ហើយពួកគាត់បាននិយាយថា ការដួលម៉ូតូខាងលើនេះ អាចបណ្តាលមកពីជំងឺលើសឈាមគាត់ធ្វើទុកផងក៏មិនដឹង៕
