ភ្នំពេញៈ បុរសម្នាក់ បានបើករថយន្ត Ford មួយគ្រឿងចូលចាក់សាំងនៅស្ថានីយប្រេងមួយកន្លែង នៅពេលចាក់សាំងនិងគិតលុយរួចហើយ ភ្លេចខ្លួនកាច់សោជាន់ហ្គែរស្ទុះទៅបុកធុងសាំង ក្រឡាប់ផ្ងារជើង បង្កការភ្ញាក់ផ្អើលដល់អ្នកដំណើរចោមរោមមើលយ៉ាងច្រើន។
ហេតុការណ៍គ្រោះថ្នាក់គួរឲ្យភ្ញាក់ផ្អើលនេះ កើតឡើងវេលាម៉ោង៦និង១០នាទីយប់ថ្ងៃទី២៥ ខែកុម្ភៈ ឆ្នាំ២០១៨នេះ ត្រង់ចំណុចស្ថានីយប្រេងឥន្ទនៈ TOTAL តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុគេឃើញមានរថយន្ត Ford ពណ៌ស ពាក់ស្លាកលេខភ្នំពេញ 2H-9784 បើកបរដោយបុរសម្នាក់ ធ្វើដំណើរតាមផ្លូវសហព័ន្ធរុស្ស៊ី រួចកាច់ចង្កូតបត់ចូលចាក់សាំង បន្ទាប់ពីចាក់សាំងនិងគិតលុយរួចហើយ គាត់ក៏ច្រលំជាន់ហ្គែររថយន្តស្ទុះទៅបុករះទូជាប់ធុងចាក់ប្រេង បណ្ដាលឲ្យក្រឡាប់ផ្ងារជើង តែមិនមានរងរបួសដល់មនុស្សនោះទេ ភ្លាមៗនោះគេឃើញបុរសដែលបើកទ្វារថយន្តខាងលើ លូនចេញតាមទ្វារមក រួចទាក់ទងហៅសាច់ញាតិឲ្យមកកន្លែងកើតហេតុ ដើម្បីជួយដោះស្រាយចេញសំណង។
ក្រោយកើតហេតុសមត្ថកិច្ចមូលដ្ឋានបានចុះមកជួយអន្តរាគមន៍ភ្លាមៗនោះបុរសដែលជាម្ចាស់រថយន្តបានសម្រួលជាមួយម្ចាស់ស្ថានីយប្រេងឥន្ទនៈ រួចព្រមសងថ្លៃការខូចខាត ទាំងស្រុង ហើយហៅអ្នកឈរមើលហេតុការណ៍ជួយរុញរថយន្តឡើងមកវិញ ទើបសមត្ថកិច្ចអនុញ្ញាតឲ្យកូនប្រុសម្ចាស់រថយន្ត បើកយកទៅជួសជុលដោយខ្លួនឯង៕
