ប្រជាពលរដ្ឋនៅក្នុងឃុំចំនួនបី នៃស្រុកគីរីសាគរ ខេត្តកោះកុង នាំគ្នាផ្ដិតមេដៃស្នើសុំឲ្យលោកនាយករដ្ឋមន្ត្រី ហ៊ុន សែន ដក លោក ឃឹម ច័ន្ទឌី អភិបាលស្រុកគីរីសាគរ ចេញពីតំណែង ដោយចោទថាមិនបានគោរពពាក្យសន្យាដោះស្រាយជម្លោះដីធ្លីជូនពួកគាត់។ តែនៅមិនទាន់បញ្ជូនទៅលោកនាយករដ្ឋមន្ត្រី ហ៊ុន សែន នៅឡើយទេ ដោយរង់ចាំឲ្យប្រជាពលរដ្ឋបានចូលរួមផ្ដិតមេដៃគ្រប់គ្នាសិន។ រីឯមន្ត្រីសិទ្ធិមនុស្សស្នើឲ្យស្ថាប័នថ្នាក់ជាតិចុះស៊ើបអង្កេតឲ្យបានច្បាស់លាស់។
បើតាមពលរដ្ឋបានឱ្យដឹងថាពួកគេបាននាំគ្នាផ្ដិតមេដៃតាំងពីថ្ងៃទី៣០ ខែមករា រហូតដល់ថ្ងៃទី០២ ខែកុម្ភៈ ឆ្នាំ២០១៨ មូលហេតុដែលប្រជាពលរដ្ឋនាំគ្នាផ្ដិតមេដៃស្នើសុំឲ្យដកអភិបាលស្រុកគីរីសាគរ លោក ឃឹម ច័ន្ទឌី ចេញពីតំណែងនេះ ដោយសារតែគាត់មិនបានគោរពពាក្យសន្យាដោះស្រាយជម្លោះដីធ្លី និងមិនបម្រើផលប្រយោជន៍ជូនប្រជាពលរដ្ឋ គិតតែប្រយោជន៍ផ្ទាល់ខ្លួន និងប្រព្រឹត្តអំពើពុករលួយលួចលក់ដីរដ្ឋជាដើម។
ពលរដ្ឋចោទប្រកាន់ថា៖ តាំងពីលោក ឃឹម ច័ន្ទឌី កាន់តំណែងជាអភិបាលស្រុកគីរីសាគរ មកពុំបានកសាងស្នាដៃអ្វីជួយដល់ប្រជាពលរដ្ឋឡើយ ហើយមានរឿងអាស្រូវខាងលក់ដីរដ្ឋ ក៏ប៉ុន្តែបើរឿងចែកដីឲ្យប្រជាពលរដ្ឋគាត់ថា ហួសពីសមត្ថកិច្ចជាដើម។
ប្រជាពលរដ្ឋនៅក្នុងស្រុកគិរីសាគរ កំពុងមានជម្លោះដីធ្លីរ៉ាំរ៉ៃរ ជាមួយនិងក្រុមហ៊ុនចិន យូញៀន ឌីវីឡុបមិន (Union Development) តែអភិបាលស្រុករូបនេះអសមត្ថភាពក្នុងការដោះស្រាយ។
