ភ្នំពេញៈ យុវជនម្នាក់ ត្រូវក្មេងស្ទាវ១ក្រុម មានគ្នា៤នាក់ នាំគ្នាព្រួតវាយ បណ្ដាលឲ្យរងរបួសធ្ងន់សន្លប់នៅកន្លែងកើតហេតុ ហើយក្រុមជនដៃដល់ក្រោយពេលធ្វើសកម្មភាពបាននាំគ្នាជិះម៉ូតូគេចខ្លួនបាត់អស់ ។
ហេតុការណ៍ប្រើអំពើហឹង្សាមានស្ងានទម្ងន់ទោសនោះ បានកើតឡើងកាលពីវេលាម៉ោង ៧យប់ ថ្ងៃព្រហស្បត៍ ៨រោច ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៨ ខែកុម្ភៈ ឆ្នាំ២០១៨ ស្ថិតនៅចំណុចមុខវត្តបុទុមវតី សង្កាត់ចតុមុខ ខណ្ឌដូនពេញ ។
ប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញយុវជនរងគ្រោះ បានអង្គុយលេងតែម្នាក់ឯង នៅមុខវត្តបុទុមវតី ស្រាប់តែភ្លាមនោះ មានក្មេងស្ទាវមួយក្រុម ជិះម៉ូតូ២គ្រឿងមិនចាំម៉ាក មានគ្នា៤នាក់ ជិះមកក្បែរជនរងគ្រោះមិនដឹងមានរឿងអ្វីនោះទេ ក៏ចុះពីម៉ូតូ ស្ទុះទៅវាយទាំងកំរោល បណ្ដាលឲ្យយុវជនរងគ្រោះរងរបួសធ្ងន់រហូតដល់សន្លប់ផងដែរ ។
ក្នុងហេតុការណ៍នោះ ក៏បង្កការភ្ញាក់ផ្អើលដល់ប្រជាពលរដ្ឋនៅក្បែរនោះ នាំគ្នារត់មកជួយធ្វើអន្តរាគមន៍ ធ្វើឲ្យក្រុមជនបង្កហេតុនាំគ្នាជិះម៉ូតូគេចខ្លួនបាត់អស់។
ជនរងគ្រោះត្រូវបានស្គាល់ឈ្មោះ ផៃ លីហួរ អាយុ២១ឆ្នាំ មុខរបរនិងទីកន្លែងស្នាក់នៅមិនពិតប្រាកដ ហើយត្រូវបាននគរបាលប៉ុស្តិ៍ចតុមុខ ដឹកយកទៅសង្គ្រោះនៅមន្ទីរពេទ្យផងដែរ៕
