លិខិតចំនួន៤ ដែលចេញកាលពីថ្ងៃទី៣០ ខែមករា ឆ្នាំ២០១៨ ដោយលោក ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ហើយដែលត្រូវបានផ្សព្វផ្សាយលើបណ្តាញសង្គមហ្វេសប៊ុក កាលពីថ្ងៃព្រហស្បតិ៍ម្សិលម៉ិញនេះ បានប្រកាសលុបឈ្មោះបុគ្គលិកអប់រំក្នុងខេត្តសៀមរាបចំនួន៤រូបចេញពីក្របខណ្ឌក្រសួងអប់រំ ចាប់ពីថ្ងៃទី១ ខែមករា ឆ្នាំ២០១៨។
គ្រូបង្រៀន៤រូបដែលជាអតីតមន្រ្តីរបស់គណបក្សសង្គ្រោះជាតិត្រូវបានក្រសួងអប់រំចេញប្រកាសលុបឈ្មោះចេញពីក្របខណ្ឌក្រសួង ហើយពួកគាត់អះអាងថា វាគឺជារឿងអយុត្តិធម៌និងជាការធ្វើឡើងដោយសារហេតុផលនយោបាយ។
គ្រូបង្រៀន៤រូបនៅខេត្តសៀមរាបត្រូវបានក្រសួងអប់រំលុបឈ្មោះចេញពីក្របខណ្ឌដោយបញ្ជាក់ថា គ្រូបង្រៀនទាំង៤រូបអវត្តមានដោយគ្មានច្បាប់អនុញ្ញាត។ នេះបើយោងតាមលិខិត៤ដាច់ដោយឡែកពីគ្នា ដែលគេចែកចាយតាមបណ្តាញសង្គមហ្វេសប៊ុក កាលពីថ្ងៃព្រហស្បតិ៍ម្សិលម៉ិញនេះ។
បុគ្គលិកក្រសួងអប់រំដែលត្រូវបានក្រសួងអប់រំលុបឈ្មោះចេញពីក្របខណ្ឌទាំង៤នេះមានឈ្មោះ លោក ពៀត ម៉ាប់ បម្រើការងារនៅសាលាគរុកោសល្យ និងវិក្រឹត្យការខេត្តសៀមរាប លោក ច័ន្ទ សុភា បម្រើការងារនៅវិទ្យាល័យចំណេះទូទៅ និងបច្ចេកទេស លោក ហុង សុជា បម្រើការងារនៅសាលាបឋមសិក្សា ហ៊ុន សែន តាពេញ និងលោក មុត ផល្លា បម្រើការងារនៅសាលាគរុកោសល្យ និងវិក្រឹត្យការខេត្តសៀមរាប។
លោក ពៀត ម៉ាប់ គ្រូង្រៀននៅសាលាគរុកោសល្យ និងវិក្រឹត្យការខេត្តសៀមរាប ដែលត្រូវបានក្រសួងលុបឈ្មោះចេញពីក្របខណ្ឌ ថាការប្រកាសលុបឈ្មោះលោក និងគ្រូបង្រៀន៣រូបផ្សេងទៀត ដែលសុទ្ធតែជាអតីតមន្រ្តីរបស់គណបក្សសង្គ្រោះជាតិគឺជារឿងអយុត្តិធម៌ និងជាការធ្វើឡើងដោយសារពាក់ព័ន្ធនឹងនយោបាយ។
លោកបញ្ជាក់ថា៖ ខ្ញុំនៅតែចាត់ទុកថា វាអយុត្តិធម៌ ហើយនេះជាចេតនានយោបាយ។ បើនិយាយពីលក្ខន្តិកៈមន្រ្តីរាជការក៏ត្រូវមានការព្រមានស្តីបន្ទោសដែរ ព្រោះអានេះជាក្របខណ្ឌដែលកើតដោយសារការខិតខំរៀនសូត្រ ហើយប្រឡង ហើយទៅធ្វើការងារ។ អីចឹង បើនិយាយពីតាមអាហ្នឹង វាអត់មានស្អី ដែលខ្ញុំត្រូវទទួលបានការលុបទេ យ៉ាងច្រើនស្តីបន្ទោស ឬដក ផ្លាស់ពីកន្លែងមួយទៅកន្លែងមួយហ្នឹង។ បើថា ខ្ញុំខុស ប៉ុន្តែខ្ញុំនៅតែចាត់ទុកថា ខ្ញុំអត់មានរឿងអីដែលខុសទេ»។
ចំណែកឯ គ្រូបង្រៀនម្នាក់ទៀត លោក មុត ផល្លា ប្រាប់ថា ចាប់តាំងពីលោកដាក់ពាក្យសុំចូលបម្រើការងារជាគ្រូបង្រៀនវិញ ក្រោយពេលគណបក្សសង្គ្រោះជាតិត្រូវបានរំលាយ កាលពីចុងឆ្នាំ២០១៧ លោកមិនដែលត្រូវបានក្រសួង ឬមន្ទីរហៅសួរនាំនោះទេ។ លោកថា ការសម្រេចលុបឈ្មោះលោកចេញពីក្របខណ្ឌគឺជារឿងមិនត្រឹមត្រូវ និងផ្ទុយពីច្បាប់ដែលមានចែង។
មាត្រា៤៧នៃច្បាប់ស្តីពីសហលក្ខន្តិកៈមន្រ្តីរាជការចែងថា ការចោទប្រកាន់អំពីកំហុសខាងវិន័យត្រូវធ្វើការអង្កេតជាមុនសិន ចំពោះទណ្ឌកម្មវិន័យថ្នាក់ទី២ (ឬវិន័យដែលឈានដល់ការលុបឈ្មោះចេញពីក្របខណ្ឌ)។ ការអង្កេតត្រូវប្រគល់ឲ្យតំណាងប្រធានស្ថាប័នសាមីមួយរូប ឬច្រើនរូប ដែលមានឋានន្តរស័ក្តិ និងថ្នាក់ខ្ពស់ជាង ឬអតីតភាពច្រើនជាងអ្នករាជការដែលត្រូវជាប់ចោទ។ សំណុំរឿងអង្កេតត្រូវបញ្ជូនទៅប្រធានស្ថាប័នដើម្បីពិនិត្យ និងសម្រេចថា គួរបញ្ជូនអ្នករាជការដែលជាប់ចោទនោះទៅឲ្យក្រុមប្រឹក្សាវិន័យ ឬក៏សម្រេចថា គួរបញ្ឈប់ការចោទប្រកាន់វិញ។ ក្នុងករណីដែលប្រធានស្ថាប័នយល់ថា គួរបន្តការចោទប្រកាន់ សំណុំរឿងត្រូវបញ្ជូនទៅក្រុមប្រឹក្សាវិន័យដែលត្រូវអញ្ជើញអ្នករាជការជាប់ចោទមកពន្យល់ដោះសារដោយផ្ទាល់មាត់ និងជាលាយលក្ខណ៍អក្សរមុននឹងក្រុមប្រឹក្សាវិន័យធ្វើការសន្និដ្ឋានអំពីកំហុស និងទណ្ឌកម្ម ដើម្បីជាយោបល់ដល់អ្នកមានសមត្ថកិច្ចសម្រេច។
កាលពីថ្មីៗនេះ លោក រ៉ុង ឈុន ត្រូវបានក្រសួងអប់រំ យុវជន និងកីឡា លុបឈ្មោះចេញពីក្របខណ្ឌមន្ត្រីរាជការ ក្រោមហេតុផលអវត្តមានដោយគ្មានច្បាប់។
