នៅល្ងាចថ្ងៃទី៩ ខែកុម្ភៈ ឆ្នាំ២០១៨ នៅទីស្តីការក្រសួងមហាផ្ទៃ សម្តេក្រឡាហោម ស ខេង បានជួបពិភាក្សាជាមួយ ឧបការី រដ្ឋមន្រ្តីក្រសួងការបរទេសអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក ដាញ៉ែល រ៉ូសែល (Daniel R.Russel)។ រដ្ឋមន្ត្រីក្រសួងមហាផ្ទៃ បានស្នើសហរដ្ឋអាមេរិក ដកទណ្ឌកម្មទិដ្ឋាការលើមន្ត្រីការទូត ដោយសំអាងថាកម្ពុជាបានឯកភាពបន្តការធ្វើមាតុភូមិន្ទនិវត្តន៍ពលរដ្ឋខ្លួន ដែលបានប្រព្រឹត្តបទល្មើស មកកម្ពុជាវិញតាម កិច្ចព្រមព្រៀងកន្លងទៅ។
យោងតាមការចុះផ្សាយនៅលើគេហទំព័ររបស់នគរបាលជាតិ៖ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានស្នើទៅឲ្យអាមេរិកពិចារណាដកបំរាមចំពោះមន្រ្តីការទូតកម្ពុជា នៃការចេញទិដ្ឋាការប្រភេទ B1 ប្រភេទ B2 និងប្រភេទ B1/B2 នេះវិញ។
ក្រសួងមហាផ្ទៃ សំអាងថា កម្ពុជាបានឯកភាពបន្តការធ្វើមាតុភូមិនិវត្តន៍ ពលរដ្ឋកម្ពុជាដែលបានប្រព្រឹត្តបទល្មើសនៅសហរដ្ឋអាមេរិកមកកម្ពុជាវិញតាមការស្នើរបស់អាមេរិកដោយផ្អែកលើកិច្ចព្រមព្រៀង ដែលភាគីទាំងពីរបានឯកភាពគ្នាកាលពីឆ្នាំ២០០២ និងឆ្នាំ២០០៣កន្លងមក។
ទោះជាយ៉ាងណា លោក Daniel R.Russel)មិនទាន់ ឆ្លើយតបបែបណានោះទេចំពោះការស្នើរបស់ភាគីកម្ពុជានេះ ដោយថាបញ្ហានេះទុកលទ្ធភាពឲ្យក្រុមការងារភាគីទាំងពីរ ពិនិត្យពិភាក្សាគ្នាបន្ថែមទៀត ដើម្បីស្វែងរកចំណុចរួមនឹងភាពមិនចុះសម្រុងគ្នា និងបញ្ហាផ្សេងៗ ជុំវិញការបញ្ជូនត្រឡប់ពលរដ្ឋកម្ពុជា ដែលមានទោសនៅអាមេរិកមកកាន់កម្ពុជាវិញនេះ។
សូមបញ្ជាក់ថា ចាប់ពីខែកញ្ញាឆ្នាំ២០១៧ មកអាមេរិកបានប្រកាសបិទទិដ្ឋាការមន្ត្រីនៅក្រសួងការបរទេសកម្ពុជាចាប់ពីអគ្គនាយកដ្ឋានឡើងទៅ មិនឲ្យចូលទឹកដីអាមេរិក ចំពេលដែលស្ថានការណ៍នយោបាយនៅកម្ពុជាឡើងកម្តៅ ឈានទៅចាប់ឃុំខ្លួនមេដឹកនាំគណបក្សសង្គ្រោះជាតិ លោក កឹម សុខា ។
