ភ្នំពេញៈ ក្មេងស្ទាវប្រុសស្រី ៨នាក់ គ្រាន់តែរងរបួសស្រាល ក្នុងហេតុការណ៍គ្រោះថ្នាក់ចរាចរណ៍ រថយន្តឡិចស៊ីស RX330 បើកបរដោយនារីរូបស្រស់ម្នាក់ បានប៉ះជាមួយកង់បី រួចហើយក៏ភ័យស្លន់ស្លោបន្ថែមល្បឿនរេចង្កូតបុកបើកឡើងឃឿនសួនច្បារមុខណាហ្គាវើលតែម្តង។
គ្រោះថ្នាក់ចរាចរណ៍នេះកើតឡើង កាលពីវេលាម៉ោង១១៖២០នាទីយប់ថ្ងៃទី៣ ខែកុម្ភៈ ឆ្នាំ២០១៨ ស្ថិតនៅតាមបណ្តោយផ្លូវមុខ Naga World ជាប់ស្ពានឡើងកោះពេជ្រ សង្កាត់ទន្លេបាសាក់ ខណ្ឌចំការមន។
ប្រភពពីកន្លែងកើតហេតុ បានប្រាប់ឲ្យភ្នាក់ងារ CAM POST ដឹងថា មុនពេលកើតហេតុ គេឃើញ នាវីវ័យក្មេងម្នាក់ រួមនឹងមិត្តភក្តិស្រីរបស់ខ្លួន បានធ្វើដំណើរតាមផ្លូវមុខក្រសួងបរិស្ថាន ពីត្បូងទៅជើង ស្រាប់តែដល់ផ្លូវបំបែកជាបួនឡើងស្ពានកោះពេជ្រ ក៏គេចកង់បីមិនផុត ក៏បុកប៉ះពីចំហៀងខាងក្រោយរថយន្ត បណ្ដាលឲ្យរងការខូចខាត ធ្វើឲ្យក្មេងស្ទាវប្រុសស្រី ៨នាក់រងរបួសស្រាល តែទំនងជាអ្នកបើករថយន្តស្លន់ក៏ច្រឡំជាន់ហ្គែរថា ហ្រ្វាំង ក៏ជ្រុលចង្កូតបើកឡើងឃឿនសួនច្បារមុខណាហ្គាវើលតែម្តង។
ក្រោយកើតហេតុភ្លាមៗ នារីរូបស្រស់ម្នាក់នោះបានទាក់ទងមិត្តភក្តិឲ្យមកជួយដោះស្រាយជាមួយជនរងគ្រោះ តែមិនដឹងថា ត្រូវសងប៉ុន្មាននោះទេ និងបានហៅរថយន្តសង្គ្រោះមកដឹកយកទៅលាងរបួសនៅគ្លីនិកឯកជនសុខលាភមេត្រី៕
