ភ្នំពេញៈ ក្រោយបែកធ្លាយឯកសារផ្ទេរសិទ្ធិការងារទ័ពរវាងលោកផ្កាយ៤ គន់ គីម ទៅឲ្យកូននាយករដ្ឋមន្រ្តីគ្រប់គ្រងតំណែងជំនួស ពេលនេះធ្វើឲ្យមហាជនមួយចំនួនមានចម្ងល់ និងចោទសួរថា តើមូលហេតុអ្វីបានជាលោក គន់ គីម ត្រូវផ្ទេរភារកិច្ចការងារទៅឲ្យលោក ហ៊ុន ម៉ាណែត កូនច្បងនាយករដ្ឋមន្រ្តីគ្រប់គ្រងតំណែងជំនួសបណ្តោះអាសន្ន ត្រង់ចំណុចនេះ មន្រ្តីជាន់ខ្ពស់ក្រសួងការពារជាតិ បានបកស្រាយថា គ្មានអ្វីចម្លែកនោះទេ ដែលថ្នាក់ដឹកនាំកងទ័ពផ្ទេរភារកិច្ចបន្ទាន់នោះ។
យោងតាមឯកសារដែលអង្គភាពសារព័ត៌មាន Cam Post ទើបទទួលបានកាលពីពេលថ្មីៗ ចំណារដោយនាយឧត្តមសេនីយ៍ផ្កាយមាស៤ ប៉ុល សារឿន និងនាយឧត្តមសេនីយ៍ គន់ គីម ចុះថ្ងៃទី២១ កុម្ភៈ ២០១៨ បានឲ្យដឹងថា ខ្ញុំបាទសូមគោរពជម្រាបជូន ឯកឧត្តម នាយឧត្តមសេនីយ៍ អគ្គមេបញ្ជាការ នៃកងយោធពលខេមរភូមិន្ទ សូមជ្រាបថា ដោយមានធុរៈផ្ទាល់ខ្លួនចាំបាច់ ខ្ញុំបាទសូមផ្ទេរភារកិច្ចដឹកនាំ បញ្ជាការងារ សេនាធិការចម្រុះ ជូនឯកឧត្តម ឧត្តមសេនីយ៍ឯក ហ៊ុន ម៉ាណែត នាយរងសេនាធិការចម្រុះ ទទួលដឹកនាំបញ្ជាការងារសេនាធិការចម្រុះចាប់ពីថ្ងៃចុះហត្ថលេខានេះតទៅ។
អ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាតិ បានចាត់ទុកថា ការផ្ទេរភារកិច្ចក្នុងជួរកងទ័ពជារឿងធម្មតានោះទេ សូម្បីតែសម្តេច ទៀ បាញ់ ក៏ត្រូវផ្ទេរភារកិច្ចឲ្យអ្នកផ្សេងដែរ ឲ្យតែលោកមានរវល់ចាំបាច់។
បើតាមលោក ឈុំ សុជាតិ នៅព្រឹកថ្ងៃទី២ មីនា ២០១៨នេះ បានបញ្ជាក់ប្រាប់ Cam Post ថា កាលពីថ្ងៃម្សិលមិញនាយឧត្តមសេនីយ៍ បានផ្ទេរភារកិច្ចទៅឲ្យលោក ហ៊ុន ម៉ាណែត គ្រប់គ្រងការងារជំនួសមួយរយ។
លោក ឈុំ សុជាតិ បានបញ្ជាក់បន្ថែម “ នាយឧត្តមសេនីយ៍ គន់ គីម នឹងត្រូវចេញទៅក្រៅប្រទេសឆាប់ៗ ដើម្បីពិនិត្យសុខភាព ម្លោះហើយទើបត្រូវផ្ទេរភារកិច្ចមួយរយៈ....ជាធម្មតានោះទេ ដែលថ្នាក់ដឹកនាំកងទ័ពត្រូវផ្ទេរភារកិច្ចតាមបែបបទរដ្ឋបាលនោះ....ហើយមិនមានការផ្ទេរតំណែងដែរ“ ៕
