យោងតាមព្រះរាជក្រឹត្យ កាលពីថ្ងៃទី០៣ ខែមីនា ឆ្នាំ២0១៨ ដែលចុះហត្ថលេខាដោយសម្តេច សាយ ឈុំ ជាប្រមុខរដ្ឋស្តីទី និងជាប្រធានព្រឹទ្ធសភាចាំផ្ទះ លោកមេធាវី គី តិច ត្រូវបានដំឡើងតំណែងជាប្រធានក្រុមមេធាវីវិជ្ជាជីវៈនៃរដ្ឋាភិបាលកម្ពុជា ដែលមានឋានៈស្មើរដ្ឋមន្ត្រី។
សូមបញ្ជាក់ថា លោក គី តិច គឺជាមេធាវី១រូប ក្នុងចំណោមមេធាវីទាំង៨រូប ដែលតំណាងឲ្យក្រសួងមហាផ្ទៃ ក្នុងការដាក់ពាក្យបណ្តឹងទៅកាន់តុលាការកំពូលដើម្បីទាមទារឲ្យរំលាយគណបក្សសង្គ្រោះជាតិ។ ក្រុមមេធាវីទាំងនោះ បានទទួលជោគជ័យលើក្តីក្តាំមួយនេះ ដែលសាធារណជនខ្លះ យល់ថាជាសំណុំរឿងនយោបាយ។ មិនត្រឹមតែរំលាយគណបក្សនោះទេ ថ្នាក់ដឹកនាំ១១៨រូបនៃគណបក្សនេះ ក៏ត្រូវបានតុលាការកំពូល បិទសិទ្ធិមិនឲ្យធ្វើនយោបាយដែរ តាមការស្នើសុំរបស់ក្រុមមេធាវីខាងលើ។ លើសពីនេះ លោកមេធាវី គី តិច តែងតែទទួលការពឹងពាក់ពីសម្តេច ហ៊ុន សែន ក្នុងការប្តឹងលោក សម រង្ស៊ី សហស្ថាបនិកចលនាសង្គ្រោះជាតិដែលកំពុងនិរទេស។ គេសង្គេតឃើញថា លោក គីត តិច ដែលតំណាងឲ្យសម្តេច ហ៊ុន សែន តែងតែឈ្នះក្តីលើការប្តឹងផ្តល់អតីតមេបក្សប្រឆាំង។
