នៅថ្ងៃទី០៥ ខែមីនា ឆ្នាំ២០១៨ នេះ ចៅក្រមសាលាដំបូងរាជធានីភ្នំពេញ លោក គី ឫទ្ធី បានសម្រេចឃុំខ្លួនលោក កឹម សុខា អតីតប្រធានគណបក្សប្រឆាំង បន្តរយៈពេល ៦ ខែទៀត ក្រោយពីការសាកសួរត្រូវបានបញ្ចប់នៅវេលាម៉ោងប្រមាណ ៣ រសៀល។
លោកស្រី ម៉េង សុភារី សហមេធាវីការពារក្ដីឲ្យលោក កឹម សុខា ដែលមានវត្តមាននៅពន្ធនាគារត្រពាំងផ្លុង ប្រាប់ថា ចៅក្រមសាលាដំបូងរាជធានីភ្នំពេញ លោក គី ឫទ្ធី បានសម្រេចឃុំខ្លួនកូនក្ដីរបស់លោកស្រីរយៈពេល ៦ ខែទៀត ដោយមូលហេតុថាដើម្បីបង្ក្រាបទល្មើសកុំឲ្យកើតឡើងជាថ្មីនិងរក្សាជនត្រូវចោទទុកជូនតុលាការចាត់ការ។ ការសម្រេចឃុំខ្លួនបន្ត ក្រោយនីតិវិធីនៃការឃុំខ្លួនជនត្រូវចោទ លោក កឹម សុខា រយៈពេល ៦ ខែក្នុងពន្ធនាគារ ជាបណ្តោះអាសន្ន ត្រូវបានបញ្ចប់។
លោកស្រីបន្តថា ការសម្រេចនេះ មិនយុត្តិធម៌ឡើយ ដោយសារកូនក្ដីរបស់លោកស្រីមិនបានប្រព្រឹត្តបទល្មើសអ្វី ដូចតុលាការចោទប្រកាន់ ហើយបច្ចុប្បន្ននេះ កូនក្ដីរបស់លោកស្រីកំពុងមានជំងឺត្រូវព្យាបាល។ ក្រុមមេធាវីនឹងប្ដឹងជំទាស់ទៅសភាស៊ើបសួរសាលាឧទ្ធរណ៍បន្តទៀត ដើម្បីជំទាស់និងការសម្រេចរបស់តុលាការថ្នាក់ក្រោម។ យើងមិនចង់ឲ្យមានការពន្យារពេលនៃការឃុំខ្លួនបន្តទៀតទេ ដោយសារមូលហេតុសុខភាពរបស់គាត់ជាចម្បង ដោយសារគាត់មានបញ្ហាឆ្អឹងគាបលើសរសៃ ដែលត្រូវការវះកាត់និងព្យាបាល។ គាត់ (ចៅក្រមស៊ើប) និយាយថាការស៊ើបអង្កេតមិនទាន់មូល។
បើមេធាវីការពារក្ដីឲ្យលោក កឹម សុខា ឲ្យដឹងថា នៅក្នុងការសាកសួរនេះ កូនក្តីរបស់លោក មិនបានឆ្លើយរាល់សំណួររបស់ចៅក្រោមស៊ើបទេ ដោយថាសំណួរដែលចៅក្រមសួរនោះលោកបានឆ្លើយរួចអស់ហើយ។
លោក កឹម សុខា ត្រូវបានអាជ្ញាធរចាប់ខ្លួននិងបញ្ជូនទៅឃុំនៅក្នុងពន្ធនាគារត្រពាំងផ្លុងកាលពីថ្ងៃទី៣ ខែកញ្ញា ឆ្នាំ២០១៧ ដោយចោទពីបទក្បត់ជាតិ។
