ខ្សឹបៈ មន្ត្រីសមត្ថកិច្ចជាច្រើនស្ថាប័ននៅច្រកអន្តរជាតិព្រែកចាក ឯខេត្តកំពត បានខ្សឹបមកប្រាប់នាយ ក្តាមប្រៃ ឱ្យដឹងថា លោក ជុំ ប៊ុណ្ណារ័ត្ន មេនគរបាលអន្តោប្រវេសន៍ បានយកតួនាទីនិងអំណាចរបស់ខ្លួន ទៅកាងទំនិញខុសច្បាប់ និងគេចពន្ធ របស់មេឈ្មួញមួយចំនួន ដែលស្និទ្ធ និងផ្តល់ផលប្រយោជន៍យ៉ាងច្រើនដល់លោក ជុំ ប៉ុណ្ណារ័ត្ន ចង់ក្លាយជាសេដ្ឋីដល់សព្វថ្ងៃនេះ។ អ៊ីចឹងហើយ ទើបធ្វើឱ្យលោកឈ្លក់ នឹងទឹកលុយរបស់ឈ្មួញខិលខូច ភ្លេចតួនាទីរបស់ខ្លួន ជាមេនគរបាលអន្តោប្រវេសន៍ប្រចាំច្រកអន្តរជាតិព្រែកចាក។
តែបើតាមក្រុមអ្នករត់ការឯកសារ ក្រុមហ៊ុន នាំចូលទំនិញមួយចំនួន បានខ្សឹបទម្លាយឲ្យនាយ ក្តាមប្រៃ យើងបានដឹងដែរថា មេនគរបាលអន្តោប្រវេសន៍ លោក ជុំ ប៊ុណ្ណារ័ត្ន រូបនេះ កំពុងតែយកតួនាទីប្រព្រឹត្តអំពើពុករលួយយ៉ាងខ្លាំង តាមរយៈការកោសរូសឲ្យក្រុមហ៊ុន ឈ្មួញ តូចតាចឱ្យបង់លុយក្រោមតុតាមតែចិត្តទាមទាររបស់ខ្លួន ហើយបើទោះបីពួកគេនាំចូលទំនិញស្របច្បាប់ ហើយមានឯកសារបង់ពន្ធ ជូនរដ្ឋត្រឹមត្រូវយ៉ាងណាក៏ដោយ ក៏លោក ជុំ ប៊ុណ្ណារ័ត្ន តម្រូវឱ្យបង់បន្ថែមជូនគាត់ក្រៅបញ្ជីផងដែរ។
ក្រុមអ្នករត់ការខាងលើ នៅបានខ្សឹបប្រាប់នាយ ក្តាមប្រៃ ឱ្យដឹងទៀតថា រាល់ទំនិញ ១កុងតឺន័រ ឬមួយរថយន្តតូច ឬធុនធំ ត្រូវតែចំណាយលុយបង់ជាច្រើនរយដុល្លារ ទើបអាចនាំទំនិញពីទឹកដីវៀតណាម ចូលទឹកដីខ្មែរបាន ដោយគ្មានការរំខាន។ ហើយបើមិនព្រមបង់តាមការកំណត់ តាមការទាមទាររបស់លោក ជុំ ប៉ុណ្ណអារ័ត្ន មេនគរបានន្ដោប្រវេសន៍ នៅច្រកនេះទេ គឺដាច់ខាតមិនអាចធ្វើដំណើរនាំចូលទំនិញទៅមករួចឡើយ ពោលគឺត្រូវជាប់ត្រឹមទល់ដែនព្រែកចាកតែម្តង។
ក្រុមមន្ត្រីសមត្ថកិច្ចខាងលើ បានខ្សឹបប្រាប់នាយ ក្តាមប្រៃ ឱ្យដឹងបន្តយ៉ាងដូច្នេះទៀតថា បើតាមបារ៉ែមថ្លៃបាយ "លុយក្រោមតុ" របស់លោក ជុំ ប៊ុណ្ណារ័ត្ន មេនគរបាល អន្តោប្រវេសន៍ ច្រកទ្វារអន្តរជាតិព្រែកចាក ខេត្តកំពតនេះ ដូចជាដាក់បញ្ជាឲ្យមន្ត្រីដាក់កំហឹតជំរិតទារលុយក្រោមតុ ពីប្រជាពលរដ្ឋ អ្នករកស៊ី ឈ្មួញ ឧកញ៉ា ចេញចូលនាំទំនិញឆ្លងកាត់ច្រកនេះ មានជាអាទិ ចាប់ពី២០ម៉ឺន ៣០ម៉ឺន ៥០ម៉ឺន ១លានរៀល និងពី១០០$.៣០០$ ៥០០$ និងប្រជាពលរដ្ឋក្រីក្រ ២ម៉ឺនរៀល អ្នករកស៊ីតូចតាចបន្ដិចបន្តួច ចាប់ពី៣ម៉ឺនរៀល ដល់៥ម៉ឺនរៀល និងអ្នកជំងឺឆ្លងកាត់គ្មានអត្តសញ្ញាណប័ណ្ណពី២០ទៅ៣០ដុល្លារ ដោយគ្មានការយោគយល់បុគ្គលណាឡើយ។ ចំពោះឈ្មួញធំៗលោក ជុំ ប៉ុណ្ណារ័ត្ន ស៊ីក្រៅតារាង យ៉ាងត្រជាក់ល្ហឹមតែម្តង។
សកម្មភាពខាងលើរបស់លោក ជុំ ប៊ុណ្ណារ័ត្ន មេនគរបាលអន្តោប្រវេសន៍ច្រកអន្តរជាព្រែកចាក នាខេត្តកំពតនេះ បានរងនូវការរិះគន់យ៉ាងខ្លាំង ពីមន្ត្រីគ្រប់ស្ថាប័ននៅទីនោះ រួមទាំងប្រជាពលរដ្ឋ និងអ្នករកស៊ីផងដែរ ដែលធ្វើឲ្យប៉ះពាល់យ៉ាងខ្លាំង ដល់របររកស៊ីរបស់ក្រុមឈ្មួញ ដែលនាំចូលទំនិញស្របច្បាប់ និងប្រជាពលរដ្ឋក្រីក្រ និងអ្នកជំងឺឆ្លងដែន ផងដែរ។
ក្រុមមន្ត្រីខាងលើ បានលើកឡើងថា លោក ជុំ ប៉ុណ្ណារ័ត្ន បានធ្វើឲ្យប៉ះពាល់ខ្លាំងបំផុតនោះ គឺជាកិត្តិយស នឹងសេចក្ដីថ្លៃថ្នូររបស់អង្គភាព នៃអគ្គនាយកដ្ឋាន នគបាលអន្តោប្រវេសន៍ក្រសួងមហាផ្ទៃ ដែលតែងតាំងបុគ្គលរូបនេះទៅជាតំណាង ជាភ្នែក ជាច្រមុះ មិនមែនឱ្យបុគ្គលទៅចាប់ជំរិតប្រជាពលរដ្ឋ ឈ្មួញ ឧកញ៉ា យកលុយស្រស់ៗ តាមអំពើចិត្តនោះទេ។
ប្រភពផ្សេងទៀត បានខ្សឹបមកប្រាប់នាយ ក្តាមប្រៃ ឱ្យបានដឹងផងដែរថា លោក ជុំ ប៊ុណ្ណារ័ត្ន មុនឡើងមកធ្វើជាមេនគរបាលច្រកព្រែកចាកនេះ គឺគាត់ធ្លាប់ធ្វើជាប្រធានក្រុមនគរបាលសេដ្ឋកិច្ចក្រសួងមហាផ្ទៃរាប់សឹបឆ្នាំ ដែលគាត់មានជំនាញបំផុតខាងប្រដេញចាប់ចុះប្រមូលលុយ ពីក្រុមឈ្មួញរកស៊ីនៅខេត្តកំពត រាប់សិបឆ្នាំ មកហើយ។ លើសពីនេះទៅទៀតតាមជំនាញរបស់គាត់ស្គាល់មុខឈ្មួញ រកស៊ី ដឹកទំនិញខុសច្បាប់ដូចថ្ងៃអ៊ីចឹង។
នាយក្តាមប្រៃ បានរំលឹកផងដែរថា យោងតាមសេចក្តីប្រកាស លេខ៣៥៨០ ប្រក ចុះថ្ងៃទី១៤ ខែកក្កដា ឆ្នាំ២០១៧ របស់ក្រសួងមហាផ្ទៃ លោកវរសេនីយ៍ឯក ជុំ ប៊ុណ្ណារ័ត្ន អត្ថលេខ ១៩៩៩៩ ពីមុនជា នាយរងប៉ុស្តិ៍ ច្រកទ្វារព្រំដែនអន្តរជាតិ ត្រពាំងស្រែ ក្រោយមកត្រូវបានតែងតាំងជា នាយប៉ុស្តិ៍នគរបាល ច្រកទ្វារព្រំដែន អន្តរជាតិព្រែកចាក ជំនួសលោកវរសេនីយ៍ឯក ណុប សារឹម កាលពីថ្ងៃទី២០ ខែកក្កដា ឆ្នាំ២០១៧ ដែលត្រូវបានដកចេញពីតួនាទីកន្លងទៅ៕
