ព្រះសីហនុៈ មនុស្សស្រីម្នាក់ បានស្លាប់ភ្លាមៗនៅកន្លែងកើតហេតុ និង២នាក់ទៀត រងរបួសធ្ងន់ ក្រោយពីមានហេតុការណ៍គ្រោះថ្នាក់ចរាចររវាងរថយន្តដឹកស៊ីទែនស៊ីម៉ង់ត៍បុកម៉ូតូមួយគ្រឿង ហើយបន្តទៅបុករថយន្តកែច្នៃមួយគ្រឿងទៀត។
គ្រោះថ្នាក់ចរាចរណ៍នេះ កាលពីវេលាម៉ោង១០និង២០នាទីព្រឹកថ្ងៃទី៩ ខែមីនា ឆ្នាំ២០១៨ លើផ្លូវជាតិលេខ៤ ចន្លោះគីឡូម៉ែត្រ ២០២-២០៣ ស្ថិតនៅក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
មន្រ្តីនគរបាល ខេត្តព្រះសីហនុ បានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្ត១គ្រឿង ពណ៌ក្រហម គ្មានស្លាកលេខ សណ្តោងរ៉ឺម៉កដឹកស៊ីទែនស៊ីម៉ងត៍ មានទិសដៅពីភ្នំពេញ ឆ្ពោះមកខេត្តព្រះសីហនុ លុះដល់ចំណុចខាងលើ បានបុកម៉ូតូ១គ្រឿងម៉ាក HONDA C125 ពណ៌ខ្មៅ ស្លាកលេខភ្នំពេញ 1AB-4498 ជិះគ្នា២នាក់ បន្ទាប់មកក៏ជ្រុលចង្កូតចូលទៅបុករថយន្តកែច្នៃ១គ្រឿងទៀត ដឹកដើមកាស្យា កំពុងឈប់ចាក់ទឹក នឹងត្រូវចំស្ត្រីម្នាក់ទៀត កំពុងចាក់ទឹករថយន្តឈ្មោះ ជ្រិច អាយុជាង៤០ឆ្នាំ មានទីលំនៅ ភូមិតានៃ ឃុំតានៃ ស្រុកព្រៃនប់ ខេត្តព្រះសីហនុ បណ្ដាលឲ្យស្លាប់។ ចំណែកអ្នកបើកម៉ូតូ និងអ្នករួមដំណើរលើម៉ូតូ រងរបួសធ្ងន់។ ក្រោយកើតហតុអ្នកបើកបររថយន្តដឹកស៊ីម៉ងត៍ រត់គេចខ្លួនបាត់។
ភ្លាមៗនោះ សមត្ថកិច្ចជំនាញចុះទៅធ្វើការវាស់វែង រួចរថយន្តទាំង២គ្រឿង និងម៉ូតូ មករក្សាទុកនៅអធិការដ្ឋាននគរបាលស្រុកព្រៃនប់ រង់ចាំដោះស្រាយគ្នានៅពេលក្រោយ៕
