
ក្នុងសន្និសីទសារព័ត៌មាននៅថ្ងៃទី០៩ ខែមីនា ឆ្នាំ២០១៨ រដ្ឋាភិបាលចិនបានទាត់ចោលការចោទប្រកាន់ថា ខ្លួនបានស្នើឲ្យប្រទេសដែលខ្ចីលុយយកធនធានរ៉ែដើម្បីប្ដូរយកប្រាក់កម្ចីរបស់ចិន។ ការបដិសេធនេះធ្វើឡើង បន្ទាប់ពីសាស្ត្រាចារ្យជនជាតិចិនម្នាក់ឈ្មោះ Zhuang Guotu បានផ្តល់បទកិច្ចសម្ភាសជាមួយសារព័ត៌មាន Global Times ដែលថាចិនសំឡឹងឃើញធនធានរ៉ែរបស់ហ្វីលីពីន ពេលដែលឲ្យហ្វីលីពីនខ្ចីលុយដើម្បីអភិវឌ្ឍប្រទេស។ សូមបញ្ជាក់ថាក្រោមការដឹកនាំរបស់រដ្ឋាភិបាល លោកប្រធានាធិបតី រ៉ូឌ្រីហ្គោ ឌូទើតេ (Rodrigo Duterte) ចិនបានផ្ដល់ហិរញ្ញវត្ថុជាច្រើនទៅឲ្យហ្វីលីពីន។
នៅក្នុងកិច្ចសម្ភាសនោះ នាពេលថ្មីៗនេះ សាស្ត្រាចារ្យ មកពីសាកលវីទ្យាល័យ Xiamen និយាយថា ធនធានរ៉ែ ជាផ្នែកមួយនៃកិច្ចព្រមព្រៀងសងបំណុលរវាងចិន និងប្រទេសដែលខ្ចីលុយពីចិន។ លោកសាស្រ្តាចារ្យបានលើកយកករណីផ្ដល់កម្ចីទៅហ្វីលីពីនពីសំណាក់ចិន ដែលតែងតែមានភ្ជាប់កិច្ចព្រមព្រៀងសងលុយវិញ ហើយចិនចង់បានធនធានរ៉ែរបស់ហ្វីលីពីនធ្វើជាថ្នូរ។
ជាការឆ្លើយតប លោក Geng Shuang អ្នកនាំពាក្យក្រសួងការបរទេសចិន បានបដិសេធការលើកឡើងរបស់លោកសាស្រ្តាចារ្យ Zhuang Guotu និងហៅការលើកឡើងរបស់សាស្ត្រាចារ្យរូបនេះ មិនមែនជាជំហររបស់រដ្ឋាភិបាលចិនឡើយ។ បើតាមអ្នកនាំពាក្យរូបនេះ ជាផ្នែកមួយនៃកិច្ចព្រមព្រៀង ចិនពិតជាតម្រូវប្រទេសដែលខ្ចីប្រាក់របស់ខ្លួនឲ្យប្រើប្រាស់ឥណទានជាក់លាក់ណាមួយដើម្បីសងទឹកប្រាក់ដែលជំពាក់។
អ្នកនាំពាក្យរូបនេះបញ្ជាក់ថា៖ ចិនមិនដែល និងមិនស្នើប្រទេសពាក់ព័ន្ធប្រើប្រាស់ធនធានធម្មជាតិរបស់ខ្លួនជាថ្នូរក្នុងកិច្ចព្រមព្រៀងខ្ចីលុយឡើយ។ ការផ្ដល់ជំនួយ និងការគាំទ្ររបស់ចិនទៅឲ្យហ្វីលីពីន ក៏គ្មានលក្ខខណ្ឌភ្ជាប់ដែរ ហើយការសងបំណុល គឺជាការអនុវត្តនៅជុំវិញពិភពលោក។
ជាមួយគ្នានោះ អ្នកនាំពាក្យដដែលនេះ ក៏បានអះអាងដែរថា ចិនមិនយករឿងសមុទ្រចិនខាងត្បូងទៅភ្ជាប់ជាមួយទំនាក់ទំនងសេដ្ឋកិច្ច និងគម្រោងអភិវឌ្ឃន៍ឡើយ។ ការដោះស្រាយបញ្ហាសមុទ្រចិនខាងត្បូង គឺធ្វើឡើងឈរលើគោលការណ៍រក្សាទំនាក់ទំនងចិន និងហ្វីលីពីនឲ្យបានល្អប្រសើរ។ ជាមួយគ្នានេះ ចិនត្រៀមខ្លួនរួចរាល់ដើម្បីធ្វើការជាមួយហ្វីលីពីនដើម្បីដោះស្រាយការខ្វែងគំនិតតាមរយៈការជជែក និងការប្រឹក្សាយោបល់ទៅមក។
ចុងបញ្ចប់នៃសន្និសីទព័ត៌មាននោះ អ្នកនាំពាក្យក្រសួងការបរទេសចិនបញ្ជាក់ថា ទំនាក់ទំនងរវាងចិន និងហ្វីលីពីន បានផ្លាស់ប្ដូរមុខមាត់តាំងពីឆ្នាំ២០១៦ ហើយចិនបានជួយយ៉ាងសកម្ម ក្នុងការពង្រីកសេដ្ឋកិច្ច និងការរស់នៅរបស់ប្រជាជនហ្វីលីពីន។
សូមបញ្ជាក់ថា៖ ក្រោយការឡើងកាន់តំណែងប្រធានាធិបតីរបស់លោក Rodrigo Duterte ដែលទំនាក់ទំនងក្រុងម៉ានីល និងក្រុងប៉េកាំងល្អខ្លាំង ទោះជាមានជម្លោះនៅសមុទ្រចិនខាងត្បូងយ៉ាងណាក្ដី។