បន្ទាយមានជ័យៈ វាពិតជាឈាមស្រែកស្បែកហៅមែន! ទីបំផុតករណីឃាតកម្មមួយ ដែលកើតទៅលើបុរសម្នាក់ បានជាងមួយឆ្នាំទៅហើយនោះ សមត្ថកិច្ចបានកំណត់មុខសញ្ញានឹងចាប់ខ្លួនមនុស្សពីរនាក់ជាម្តាយនិងកូនយកមកសាងសំណុំរឿងបញ្ជូនទៅកាន់សាលាដំបូងខេត្តបន្ទាយមានជ័យ។
លោកឧត្តមសេនីយ៍ទោ អាត់ ខែម ស្នងការនៃស្នងការដ្ឋាននគរបាលខេត្តបន្ទាយមានជ័យបានឲ្យដឹងថា កាលពី១៤ខែមុន មានបុរសម្នាក់ដែលដើរដាក់អង្គប់កណ្តុរបានប្រទះឃើញគ្រោងឆ្អឹងសាកសពបុរសម្នាក់នៅក្បែរដំបូកមួយជិតបឹងឆ្ងាយពីភូមិ។ សមត្ថកិច្ចក៏បានចុះទៅពិនិត្យ និងស្វែងរកគ្រួសារណា ដែលបាត់សមាជិកឲ្យមកមើល។ តែអ្វីដែលកត់សម្គាល់ គឺមានតែគ្រួសារមួយប៉ុណ្ណោះ ដែលបាត់សមាជិកជាឪពុក។ លុះសមត្ថកិច្ចហៅឲ្យទៅមើលគ្រួសារខាងលើយកលេសរាងខ្លួន ដោយស្រ្តីជាប្រពន្ធនិយាយថា មិនមានពេលទេ ព្រោះជាប់ដើរសងបំណុលប្តី ឯកូនប្រុសអះអាងថា មិនមែនជាគ្រោងឆ្អឹងឪពុកខ្លួនទេ ព្រោះឪពុកខ្លួនចាកចេញទៅធ្វើការនៅភ្នំពេញបាត់ហើយ។
លោកឧត្តមសេនីយ៍ទោ អាត់ ខែម បាននិយាយថា ដោយដាក់ការសង្ស័យជាករណីឃាតកម្ម លោកក៏បានដាក់កម្លាំងជំនាញស៊ើបអង្កេតលើករណីនេះ។ អស់រយៈពេល១៤ខែគត់ ករណីនេះ ចាប់ផ្តើមមានពន្លឺឡើង សមត្ថកិច្ចបានចាប់ឃាត់មនុស្សពីរនាក់ជាម្តាយនិងកូនមកសាកសួរ។ ទីបំផុតឃាតក ត្រូវបានវែកមុខ ឃាតក គឺជាកូននឹងជាប្រពន្ធនៃបុរសដែលល់តែគ្រោងឆ្អឹងដែលរស់នៅក្នុងភូមិទ្រឡោកលិច ឃុំ ភ្នំលៀបស្រុកព្រះនេត្រព្រះ។
លោកឧត្តមសេនីយ៍ត្រី សិទ្ធ ឡោះ ស្នងការរងទទួលផែនព្រហ្មទណ្ឌ បានឲ្យដឹងថា នៅចំពោះមុខសមត្ថកិច្ចស្ត្រីឈ្មោះ អាន តឹក អាយុ៥៧ឆ្នាំ និងកូនប្រុសឈ្មោះ សូ វុធ អាយុ២៩ឆ្នាំ បានសារភាពថា កាលពីវេលាម៉ោង១០យប់ថ្ងៃទី៩ ខែវិច្ឆិកា ឆ្នាំ២០១៦ ពួកគេមានជម្លោះជាមួយឪពុកក្រោយពីវិលត្រឡប់មកពីពិធីឡើងផ្ទះគេក្បែរភូមិ។ ជម្លោះពាក្យសម្តីចេះតែតានតឹងរហូតធ្វើឲ្យកូនតិរច្ឆានហ៊ានច្រានឪពុកឈ្មោះ និប អឺត អាយុ៥៥ឆ្នាំទម្លាក់ពីផ្ទះ បណ្តាលឲ្យធ្លាក់បាក់ក និងជង់កាំបិតស្លាប់ក្នុងថ្លុកឈាម។ ក្រោយមកពីរនាក់ម្តាយកូនក៏លើកដាក់លើគោយន្តដឹកទៅទម្លាក់ចោលនៅឆ្ងាយពីភូមិ៣០គីឡូម៉ែត្រ បន្ទាប់មកក៏ប្រាប់អ្នកភូមិថា បុរសរងគ្រោះចេញទៅធ្វើការនៅភ្នំពេញបាត់ហើយ៕
