អ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត ( Rhona Smith) នឹងមកបំពេញទស្សនកិច្ចនៅប្រទេសកម្ពុជា តបតាមការអញ្ជើញរបស់រដ្ឋាភិបាល។
មន្ត្រីនាំពាក្យរបស់អង្គការសហប្រជាជាតិទទួលបន្ទុកសិទ្ធិមនុស្សក្នុងតំបន់អាស៊ីបានឲ្យដឹងថាដំណើរទស្សនកិច្ចរបស់លោកស្រី រ៉ូណា ស្មីត ( Rhona Smith) លើកនេះ មានរយៈពេល១០ថ្ងៃ គិតចាប់ពីថ្ងៃទី៥ ដល់ថ្ងៃទី១៤ ខែមីនា ឆ្នាំ២០១៨។
មន្ត្រីនាំពាក្យរបស់អង្គការសហប្រជាជាតិទទួលបន្ទុកសិទ្ធិមនុស្សក្នុងតំបន់អាស៊ី មិនទាន់អាចបញ្ជាក់បានអំពីរបៀបវារៈនៃដំណើរទស្សនកិច្ចលើកទី៤របស់អ្នកស្រីនោះទេ តែអ្នកឃ្លំាមើលសិទ្ធិមនុស្សក្នុងប្រទេសនិយាយថា ទសន្សកិច្ចរបស់អ្នកស្រីស្មីត មានសារៈសំខាន់ដល់ការពង្រឹងការគោរពសិទ្ធិមនុស្សនៅកម្ពុជា
ដំណើរទស្សនកិច្ចនេះ កើតឡើងតែ២សប្ដាហ៍ប៉ុណ្ណោះ បន្ទាប់ពីលោកស្រី Rhona Smith និងអ្នករាយការណ៍ពិសេសម្នាក់ទៀតលោក David Kaye បានសម្ដែងនូវក្ដីព្រួយបារម្ភ ទៅលើសេចក្ដីព្រាងកែប្រែរដ្ឋធម្មនុញ្ញ និងសេចក្ដីព្រាងច្បាប់ដាក់ទោសអ្នកប្រមាថព្រះមហាក្សត្រ។ លោកស្រី បានរិះគន់ថាសេចក្ដីព្រាងច្បាប់ទាំងពីរនេះមិនស្របទៅនឹងច្បាប់សិទ្ធិមនុស្សអន្ដរជាតិនោះទេ ដោយថា ច្បាប់នេះនឹងរិតត្បិតសិទ្ធិបញ្ចេញមតិ និងសិទ្ធិនយោបាយរបស់បុគ្គល។
ប៉ុន្ដែ មន្ត្រីជាន់ខ្ពស់រាជរដ្ឋាភិបាលកម្ពុជា បានច្រាលចោលការលើកឡើងនេះ ដោយថារដ្ឋាភិបាលកំពុងធ្វើច្បាប់ការពារកិត្តិនាមព្រះមហាក្សត្រ ការពារអធិបតេយ្យភាព និងផលប្រយោជន៍ជាតិ។
ជុំវិញបញ្ហានយោបាយ និងលទ្ធិប្រជាធិបតេយ្យនៅកម្ពុជានេះ ប្រទេសលោកសេរីមួយចំនួន រួមមាន អាល្លឺម៉ង់ សហរដ្ឋអាមេរិក សហភាពអឺរ៉ុប និងអូស្ដ្រាលីជាដើម បានបង្ហាញក្ដីបារម្ភរបស់ពួកគេ ដោយថា រដ្ឋាភបាលកំពុងដឹកនាំផ្ទុយគន្លងប្រជាធិបតេយ្យ និងរំលោភសិទ្ធិពលរដ្ឋ។
ក្នុងដំណើរទស្សនកិច្ចកន្លងមក លោកស្រី រ៉ូណា ស្មីត បានជួបជាមួយមន្ដ្រីជាន់ខ្ពស់រដ្ឋាភិបាល តំណាងអង្គការសង្គមស៊ីវិល និងតំណាងសហគមន៍។
