មណ្ឌលគិរីៈ បន្ទាប់ពីផ្ទុះការបាញ់ប្រហារនៅតាមព្រំដែនកម្ពុជា-វៀតណាម ដោយមេប៉ុស្ដិ៍អូរលែ បាញ់សម្លាប់មន្ត្រីបរិស្ថាន មន្ត្រីប៉េអឹម និងមន្ត្រីអង្គការសង្គមស៊ីវិល ស្លាប់អស់៣នាក់ ធ្វើឲ្យផ្អើលពេញប្រទេសកាលពីដើមឆ្នាំ២០១៨មកនោះ ឥឡូវនេះ មានដំណឹងថ្មីថា ស្នងការនគរបាលខេត្តមណ្ឌលគិរី ដែលជាមេកើយ ត្រូវក្រសួងមហាផ្ទៃ ដកចេញពីតំណែង ដាក់អ្នកថ្មីជំនួសហើយ។
ចូលកាន់តំណែងបានជិត៨ខែ ពោល គឺចាប់ពីខែកក្កដា ឆ្នាំ២០១៧ រហូតមកទល់នឹងខែមីនា ឆ្នាំ២០១៨នេះ ស្នងការនគរបាលខេត្តមណ្ឌលគិរី ឧត្តមសេនីយ៍ទោ អ៊ុក សំណាង ត្រូវបានក្រសួងមហាផ្ទៃ សម្រេចផ្ទេរឲ្យកាន់ភារកិច្ចថ្មី មកបម្រើការងារជាអនុប្រធាននាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃវិញ។ ដកលោកផ្កាយ២ អ៊ុក សំណាង ក្រសួងមហាផ្ទៃ មិនបង្អង់យូរឡើយ គឺដាក់លោកផ្កាយ១ ឡោ សុខា ឲ្យកាន់តំណែងជាស្នងការនគរបាលខេត្តភូមិឦសាននេះជំនួសវិញ។
ការផ្ទេរភារកិច្ចដកឲ្យលោក អ៊ុក សំណាង ទៅអង្គុយនៅនាយកដ្ឋាននគរបាលព្រហ្មទណ្ឌនេះ ត្រូវបានគេមើលឃើញថា ធ្វើឡើងបន្ទាប់កើតមានករណីបាញ់ប្រហារបង្កឡើងដោយនាយប៉ុស្ដិ៍នគរបាលអូរលែ លោក ផល ពេញ ដែលបានបាញ់សម្លាប់មន្ត្រីបរិស្ថាន មន្ត្រីកងរាជអាវុធហត្ថ និងមន្ត្រីអង្គការសង្គមស៊ីវិល សរុប៣នាក់ ឲ្យស្លាប់ក្នុងថ្លុកឈាម កាលពីថ្ងៃទី៣០ ខែមករា ឆ្នាំ២០១៨។
សូមបញ្ជាក់ថា លោក អ៊ុក សំណាង អតីតស្នងការនគរបាលខេត្តតាកែវ បានឡើងកាន់តំណែងជាស្នងការនគរបាលខេត្តមណ្ឌលគិរី ជាផ្លូវការនាព្រឹកថ្ងៃទី១៤ ខែកក្កដា តាមរយៈពិធីផ្លូវការក្រោមអធិបតីភាពនាយឧត្តមសេនីយ៍ នេត សាវឿន អគ្គស្នងការនគរបាលជាតិ និងអភិបាលខេត្ត លោក ស្វាយ សំអាង។
យោងប្រកាសចុះថ្ងៃទី៣ ខែកក្កដា ឆ្នាំ២០១៧ ដែលចុះហត្ថលេខាដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក អ៊ុក សំណាង ត្រូវបានផ្ទេរភារកិច្ចពីស្នងការ នៃស្នងការដ្ឋាននគរបាលខេត្តតាកែវ ទៅជាស្នងការខេត្តនគរបាលមណ្ឌលគិរីវិញ។ លោកត្រូវជំនួសតំណែងលោក តូច យ៉ុន ដែលត្រូវបានតែងតាំងជាអនុប្រធាននាយកដ្ឋាននគរបាលបច្ចេកទេសព្រំដែន នៃក្រសួងមហាផ្ទៃ។
ដោយឡែក តំណែងរបស់លោក អ៊ុក សំណាង នៅខេត្តតាកែវ ត្រូវបានជំនួសដោយលោក សុខ សំណាង ដែលឡើងកាន់តំណែងផ្លូវការ តាំងពីថ្ងៃទី៧ ខែកក្កដា ឆ្នាំ២០១៧មកនោះ។ លោក សុខ សំណាង បានផ្ទេរចេញពីអនុប្រធាននាយកដ្ឋានច្រកទ្វារទី២ នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ៕
