លោក ម៉ម សូណង់ដូ អតីតប្រធានគណបក្សសំបុកឃ្មុំសង្គមប្រជាធិបតេយ្យ បានសម្រេចត្រឡប់ចូលធ្វើនយោបាយវិញបន្ទាប់ឈប់ធ្វើជិត៧ខែ។ លោក ម៉ម សូណង់ដូរ បានប្រកាសលាលែងពីប្រធានគណបក្សសំបុកឃ្មុំសង្គមប្រជាធិបតេយ្យកាលពីថ្ងៃទី៤ ខែសីហា ឆ្នាំ២០១៧ ក្រោយពីមិនទទួលការគាំទ្រក្នុងការប្រកួតប្រជែងការបោះឆ្នោតឃុំ សង្កាត់។
លោក ម៉ម សូណង់ដូ បានឲ្យដឹងថាគណបក្សសំបុកឃ្មុំសង្គមប្រជាធិបតេយ្យនឹងធ្វើសមាជវិសាមញ្ញមួយដែលនឹងពិភាក្សាពីការចូលមកធ្វើនយោបាយរបស់លោកឡើងវិញ នៅថ្ងៃទី១១ ខែមីនា ឆ្នាំ២០១៨ខាងមុខ។ លោកបន្ថែមថាការវិលត្រឡប់របស់លោកនៅពេលនេះ គឺដើម្បីបន្តការងារសង្គ្រោះជាតិបន្តពីបក្សប្រឆាំងដ៏ធំជាងគេនៅកម្ពុជាដែលត្រូវបានរំលាយ ហើយនឹងនាំមកនូវទម្រង់នយោបាយប្រឆាំងថ្មីមកកម្ពុជាដែលខុសពីបក្សសង្គ្រោះជាតិ។
អតីតប្រធានវិទ្យុសំបុកឃ្មុំរូបនេះថ្លែងថា៖ ប្រជាពលរដ្ឋខ្មែរមិនសូវមានការពិចារណាទេ ចូលចិត្តតែអាណាជេរខ្លាំងអាហ្នឹងពូកែណាស់ ធ្វើខុសក៏ដោយកាប់ទៅចាក់ទៅ។ តែបញ្ហាយើងមិនអាចដោះស្រាយបានទេ ត្រូវទីពឹងទៅលើច្បាប់ ទៅលើសតិអារម្មណ៍ និងឆន្ទៈចង់បានសន្តិភាព យើងចាញ់តែចង់ឈ្នះយើងចាប់ដៃគ្នា។ យើងមិនទាន់ឈ្នះផងយើងបោះបោកពាក្យសម្តី នាំប្រជាពលរដ្ឋក្រោយឈរធ្វើបាតណាបាតណីបងមិនធ្វើតាមផ្លូវហ្នឹងទេ។ យើងវ៉ៃគ្នាដោយយកកិត្តិយស យើងកុំចាំគេដេកបានលួចទៅកាប់គេ ហើយគេបែរខ្នងទៅកាប់គេ ហើយនាំគ្នាសន្ធឹកសន្ធាប់ទៅវ៉ៃគេមកពីយើងគ្នាច្រើន យើងកុំធ្វើចឹងអី យើងទុកគូបដិបក្ខយើងឲ្យមានពេលវេលាការពារខ្លួនហើយយើងទៅវ៉ៃទៅ។
លោកបណ្ឌិត ឡៅ ម៉ុងហៃ អ្នកវិភាគឯករាជ្យ យល់ថាការវិលត្រឡប់ចូលធ្វើនយោបាយវិញរបស់លោក ម៉ម សណង់ដូ ជាការធ្វើនយោបាយតាមតែចិត្តខ្លួន ហើយគ្រាន់តែចូលដើម្បីបង្គ្រប់កិច្ចឲ្យរដ្ឋាភិបាលដែលកំពុងរងការចោទប្រកាន់ពីសហគមន៍អន្តរជាតិដែលថាប្រជាធិបតេយ្យនៅកម្ពុជាដើរថយក្រោយ។
សូមបញ្ជាក់ថាម្ចាស់បទ តើខ្ញុំអាចរស់បានដល់ពេលណាដែលរិះគន់រដ្ឋាភិបាលឥតសំចៃមាត់រូបនេះ ត្រូវបានតុលាការចាប់ដាក់ពន្ធនាគារចំនួន ៣ដងរួចមកហើយ ក្នុងសំណុំរឿងកុប្បកម្មប្រឆាំងថៃនៅកម្ពុជាអំឡុងឆ្នាំ២០០៣ សំណុំរឿងសន្ធិសញ្ញាព្រំដែនបំពេញបន្ថែមឆ្នាំ២០០៥ និងចុងក្រោយ គឺសំណុំរឿងតំបន់អប្បគមន៍នៅឃុំប្រម៉ាក្នុងខេត្តក្រចេះ។
