នៅព្រឹកថ្ងៃ៥កើត ខែចេត្រ ឆ្នាំរកា នព្វស័ក ព.ស ២០៦១ ត្រូវនឹងថ្ងៃទី២១ ខែមីនា ឆ្នាំ២០១៨ នាទីស្តីការក្រសួង បរិស្ថាន មានរៀបចំសន្និសីទសារព័ត៌មានស្តីពី ទិវាមួយម៉ោងសម្រាប់ភពផែនដី ក្រោមប្រធាបទ ផ្សារភ្ជាប់ទំនាក់ទំនងជាមួយនឹងផែនដី ក្រោមអធិបតីភាព ឯកឧត្តម ឃុត ចាន់ដារ៉ា អនុរដ្ឋលេខាធិការក្រសួងបរិស្ថាន ឯកឧត្តម បានលើកឡើងថាការរៀបចំទិវាមួយម៉ោងសម្រាប់ភពផែនដីនេះ គឺជាសកម្មភាពមួយដែលជំរុញ ក៏ដូចជាផ្លាស់ប្តូរនូវឥរិយាបថរបស់ប្រជាជនឱ្យចេះសន្សំសំចៃថាមពល និងចូលរួមការពារភពផែនដី តាមសកម្មភាពផ្សេងៗ សម្រាប់ភពផែនដី តាមរយៈការផ្លាស់ប្តូរ ទម្លាប់ប្រចាំថ្ងៃរបស់យើង រួមទាំងចូលរួមក្នុងកិច្ចគាំពារបរិស្ថាន។ ឯកឧត្តមបន្តថា ក្រសួងបរិស្ថាន បានអនុវត្តការងារយ៉ាងសកម្មនៅក្នុងការងារបរិស្ថាន ហើយអ្វីដែលសំខាន់គឺទាមទាការចូលរួមឱ្យបានច្រើនពីសំណាក់ ដៃគូឯកជន យុវជន និងមហាជន នៅក្នុងការងារវិស័យបរិស្ថាន។
ក្នុងឱកាសនេះនេះដែរ លោក សេង ទៀក នាយកអង្គការWWFកម្ពុជា បានលើកឡើងដែរថា នេះជាលើកទី៦ ដែលកម្ពុជាបានរៀបចំកម្មវិធីនេះឡើង ហើយក៏មានការចូលរួមយ៉ាងច្រើនពីមហាជន និងដៃគូ គាំទ្រនៅក្នុងទិវាមួយម៉ោង សម្រាប់ភពផែនដីនេះ ដើម្បីក្រើនរំលឹកឱ្យប្រជាជនទូទៅចូលរួមរាល់សកម្មភាពទាក់ទងកិច្ចការពារភពផែន។ លោក សេង ទៀក បានលើកឡើងថាប្រជាពលរដ្ឋអាចអនុវត្តន៍សកម្មភាពប្រចាំថ្ងៃម្តងបន្តិចៗ យើងអាចជួយភពផែនដី តាមរយៈការប្រើប្រាសថាមពលប្រកបដោយការទទួលខុសត្រូវ។
យោងតាមការចុះផ្សាយរបស់ក្រសួងបរិស្ថានបានឱ្យដឹងថា៖ ក្នុងដំណើការសួរឆ្លើយជាមួយវាគ្មិនកិត្តិយស ដែលអញ្ជើញចូលរួមជាថ្នាក់ដឹកនាំក្រសួងបរិស្ថាន អង្គការ និងស្ថាប័នដៃគូសហការ តារាចម្រៀងល្បីឈ្មោះ កញ្ញា មាស សុខសោភា ដែលជាទូតសុឆន្ទៈនៃអង្គការ WWF និងបានអញ្ជើញជាចូលរួមផងដែរ បានចាត់ទុកថាព្រឹត្តិការណ៍មានប្រយោជន៍សម្រាប់ប្រជាជនទូទៅ លើភពផែនដី ហើយកញ្ញាចូលរួមផ្សព្វផ្សាយបន្តឱ្យបានទូលំទូលាយទៅដល់ មហាជន ទាក់ទងនឹងនិរន្តរភាពបរិស្ថាន និងចូលរួម ផ្លាស់ប្តូរជាវិជ្ជមាន ក្នុងការជួយភពផែនដីរបស់យើង។
សូមបញ្ជាក់ថា ទិវា១ម៉ោងសម្រាប់ភពផែនដី នឹងប្រព្រឹត្តទៅនៅថ្ងៃទី២៤ ខែមីនា ឆ្នាំ២០១៨ វេលាម៉ោង ៥:៣០-៩:០០យប់ នៅបរិវេណមុខទីស្តីការក្រសួងបរិស្ថាន។ ក្រសួងបរិស្ថានលើកទឹកចិត្តធ្វើយ៉ាងណាឱ្យមានការចូលរួមយ៉ាងផុសផុលពីសំណាក់ក្រសួង ស្ថាប័នពាក់ព័ន្ធ វិស័យ ឯកជន មហាជន សហគមន៍មូលដ្ឋាន ក្នុងការប្រមូលផ្តុំគ្នាដើម្បីធ្វើសកម្មភាពលើសពីមួយម៉ោង និងការបង្កើតទំនាក់ទំនងជាសកល ដើម្បីនិរន្តរភាពនៃអនាគតសម្រាប់ភពផែនដី។
