ទាក់ទងនឹងស្នេហាត្រីកោណរវាងប្ដីប្រពន្ធមួយគូ នឹងបុរសជនជាតិចិនម្នាក់ បង្កឲ្យមានមានហេតុការណ៍ភ្ញាក់ផ្អើលមួយ នៅព្រឹកថ្ងៃទី២១ ខែមីនា ឆ្នាំ២០១៨នេះ នៅក្នុងភូមិបាលិលេយ្យ១ សង្កាត់ក្រុងប៉ោយប៉ែត ក្រុងប៉ោយប៉ែត។
បើតាមសមត្ថកិច្ចបានបញ្ជាក់ឲ្យដឹងថា ស្រ្ដីវ័យក្មេងរូប ដែលជាប្រពន្ធ ឈ្មោះ ប ល អាយុ១៩ឆ្នាំ រស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត រីឯបុរសជាប្តី ឈ្មោះ រ៉ូ អាយុជាង២០ឆ្នាំ មានលំនៅក្នុងភូមិកណ្ដាល សង្កាត់ផ្សារកណ្តាល ក្រុងប៉ោយប៉ែត។
ដោយឡែក បុរសជាអ្នកជ្រៀតស្នេហ៍ ជាជនជាតិចិន ដែលសង្ស័យថាជាសហាយ នោះ គឺមិនត្រូវបានស្គាល់ពីអត្តសញ្ញាណទេ ។
បើតាមបុរសជាប្តី បាននិយាយប្រាប់សមត្ថកិច្ចថា ទំនាក់ទំនងរបស់គេគឺបានរៀបការដោយស្របច្បាប់ ជាមួយនឹងប្រពន្ធរបស់ខ្លួន តាំងពីខែធ្នូ ឆ្នាំ២០១៦មកម៉្លេះ តែក្រោយពេល ពួកគេបានរៀបការ និងរួមរស់ជាមួយគ្នា អស់មួយរយៈរួចមក ប្រពន្ធរបស់ខ្លួនចេះតែលួចចេញក្រៅ និងមានទំនាក់ទំនងនឹងបុរសផ្សេង ធ្វើឲ្យខ្លួនកើតមានចិត្តសង្ស័យ។
បុរសជាប្តីក៍បានបន្តថា ដោយសារតែមានចំណុចគួរមិនឲ្យទុកចិត្តជាច្រើន ទើបរូបគេបានបំពាក់ប្រព័ន្ធ GPS ទើបដឹងថា ប្រពន្ធរបស់ខ្លួនមានទំនាក់ទំនងជាមួយជនជាតិចិននោះមែន។
ទង្វើនេះហើយ ទើបធ្វើឲ្យខ្លួនមានចិត្តខឹងសម្បារយ៉ាងខ្លាំង រហូតអត់ទ្រាំមិនបាន ក៍សម្រេចចិត្តទៅដាក់ពាក្យបណ្ដឹង ដោយទាមទារថ្លៃបណ្តាការ ចំនួន៥០០០ដុល្លារ វិញ។
ក្រោយពេលទទួល បានសេចក្ដីរាយ ការណ៍ពីបុរសជាប្ដីភ្លាម សមត្ថកិច្ចបានចុះទៅកាន់កន្លែងកើតហេតុ នាំភាគីពាក់ព័ន្ធ ទៅសាកសួរ តាមនីតិវិធី។
តែយ៉ាងណា ស្ត្រីជាប្រពន្ធបានបដិសេធយ៉ាងដាច់អហង្ការថា នាងមិនបានទាក់ទងជាមួយនឹងប្រុសឈ្មោលណាម្នាក់ឡើយ៕
