ភ្នំពេញៈ រថយន្តដឹកទំនិញធុនធំមួយគ្រឿង បានបើកបុកម៉ូតូ Zoomer X ពេញទំហឹង រួចអូសចូលទៅបោកផ្ទប់នៅនឹងកន្លែងលក់កូនឈើ បណ្តាលឲ្យយុវជន៣នាក់ ត្រូវរថយន្តកិនស្លាប់ភ្លាមៗតែម្ដង។ គ្រោះថ្នាក់ចរាចរណ៍ដ៏រន្ធត់មួយនេះ កើតឡើងកាលពីវេលាម៉ោង០០៖៣០នាទី រំលងអធ្រាត្រឈានចូលថ្ងៃអង្គារ ៥រោច ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៦ ខែមីនា ឆ្នាំ២០១៨នេះ នៅម្ដុំកន្លែងលក់កូនឈើ អំពិល៥ដើម តាមបណ្តោយផ្លូវជាតិលេខ១ ស្ថិតក្នុងភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
ប្រភពព័ត៌មានពីកន្លែងកើតហេតុ ប្រាប់ឲ្យភ្នាក់ងារ Cam Post ដឹងថា នៅមុនពេលកើតហេតុ គេឃើញយុវជនទាំង៣នាក់ ជិះម៉ូតូម៉ាក Zoomer X ពណ៌ក្រហមលាយស មិនស្គាល់ស្លាកលេខ ធ្វើដំណើរតាមបណ្តោយផ្លូវជាតិលេខ១ ទិសដៅពីកើតទៅលិច។ លុះមកដល់ចំណុចកើតហេតុខាងលើ ក៏មានរថយន្តដឹកទំនិញធុនធំមួយគ្រឿង ម៉ាកហ៊ីយ៉ាន់ដាយ ស្លាកលេខ ភ្នំពេញ 3E-0551 (បើកបរដោយបុរសមិនស្គាល់អត្តសញ្ញាណ) បញ្ច្រាសទិសដៅចរាចរណ៍គ្នា ស្រាប់តែរេចង្កូតទៅបុកម៉ូតូចំពីមុខពេញទំហឹង រួចកិនអូសប្រហែល៥០ម៉ែត្រ ចូលកន្លែងលក់កូនឈើ បណ្តាលឲ្យយុវជនទាំង៣នាក់ ត្រូវរថយន្តកិនស្លាប់២នាក់ និងម្នាក់ទៀត ត្រូវកិនជាប់ក្រោមកង់រថយន្ត ស្លាប់យ៉ាងអាណោចអាធ័ម។ រីឯអ្នកបើកបររថយន្តបង្កគ្រោះថ្នាក់ បានចុះរត់គេចខ្លួនបាត់ស្រមោលឈឹង។
សមត្ថកិច្ចប្រាប់ឲ្យដឹងដែរថា សពជនរងគ្រោះទាំង៣នាក់ នៅមិនស្គាល់អត្តសញ្ញាណទេ ដែលជិះម៉ូតូ Zoomer X ពណ៌ក្រហមលាយស មិនស្គាល់ស្លាកលេខ ត្រូវបានសមត្ថកិច្ចកំពុងជួយប្រកាសរកក្រុមគ្រួសារ និងសាច់ញាតិសិន។ បច្ចុប្បន្នសាកសពជនរងគ្រោះទាំង៣ ត្រូវបានដឹកយកទៅតម្កល់ទុកនៅវត្តទឹកថ្លា រង់ចាំប្រកាសរកសាច់ញាតិ។
អង្គភាពសារព័ត៌មាន Cam Post សូមចូលសោកស្ដាយ និងសូមចូលរួមរំលែកទុក្ខដ៏ក្រៀមក្រំនេះជាមួយគ្រួសារនៃសពផង។ សូមបងប្អូនមេត្តាជួយ Share ចែករំលែកបន្ត ក្រែងមានអ្នកបាត់បងប្អូនសាច់ញាតិ៕
ក្រោយពេលកើតហេតុ សមត្ថកិច្ចក៏បានមកដល់កន្លែងកើតហេតុ ធ្វើការវាស់វែងរួចយករថយន្ត និងម៉ូតូ ទៅរក្សាទុកនៅការិល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំធ្វើការស្រាវជ្រាវ និងដោះស្រាយគ្នាពេលក្រោយ។
