កណ្ដាលៈ តាមការឲ្យដឹងពីសមត្ថកិច្ចសពស្រ្តីរងគ្រោះ ដែលត្រូវជនមិនស្គាល់អត្តសញ្ញាណកាប់សម្លាប់យ៉ាងសុះសាច់ រួចយកសពញាត់ចូលក្នុងធុងទឹកកក ដោយមានចាក់សោជាប់ពីខាងក្រៅ ហើយទៅប្លុងចោលនៅក្បែរស្ពានព្រែកតាមាក់ ពេលនេះត្រូវបានសមត្ថកិច្ចស្គាល់អត្តសញ្ញាណហើយ។
សមត្ថកិច្ច បានឲ្យដឹងថា សពស្រ្តីរងគ្រោះ ឈ្មោះ យឿន ធានី អាយុ២៩ឆ្នាំ មានស្រុកកំណើត នៅភូមិក្រូចសើច ឃុំហាន់ជ័យ ស្រុកកំពង់សៀម ខេត្តកំពង់ចាម ហើយបច្ចុប្បន្នសព ត្រូវបានគ្រួសារយកទៅធ្វើបុណ្យតាមប្រពៃណីនៅស្រុកកំណើតរួចរាល់ហើយ ប៉ុន្តែសមត្ថកិច្ចមិនអាចបញ្ជាក់ពីមូលហេតុ ថាផ្ដើមចេញពីករណីអ្វីនៅឡើយទេ។ ដោយឡែកជនដៃដល់ ពេលនេះសមត្ថកិច្ចជំនាញកំពុងដុតដៃដុតជើងស្វែងរកតាមចាប់ខ្លួន ដើម្បីយកផ្តន្ទាទោសឲ្យខានតែបាន។
សូមបញ្ជាក់ថា មានការភ្ញាក់ផ្អើលឡើង និងគួរឲ្យរន្ធត់យ៉ាងខ្លាំង បន្ទាប់ពីប្រជាពលរដ្ឋបានប្រទះឃើញសពស្ត្រីវ័យក្មេងម្នាក់ ត្រូវជនមិនស្គាល់អត្តសញ្ញាណកាប់សម្លាប់ទាំងអាក្រាតកាយ ហើយញាត់ចូលក្នុងធុងទឹកកកពណ៌ទឹកក្រូច យកមកផ្លុងទម្លាក់ចោល ថែមចាក់សោជាប់ផងដែរ។
ហេតុការណ៍ភ្ញាក់ផ្អើលនេះ កើតឡើងនៅរសៀលថ្ងៃទី១៦ មីនា ឆ្នាំ២០១៨នេះ នៅចំណុចជិតគល់ស្ពានព្រែកតាម៉ាក់ ស្រុកខ្សាច់កណ្តាល ខេត្តកណ្តាល។
ក្រោយហេតុការណ៍ប្រទះឃើញភ្លាមៗ កម្លាំងសមត្ថកិច្ចចម្រុះមានទាំងនគរបាល និងកម្លាំងអាវុធហត្ថ កំពុងចុះត្រួតពិនិត្យ និងធ្វើកោសលវិច័យស្វែងរកតម្រុយ៕