ទោះបីជាប្រទេសកម្ពុជាជាប្រទេសមានផ្ទៃដីតូច ប្រជាជនជាង១៥លាននាក់ ប៉ុន្តែពិភពលោកបានស្គាល់ប្រទេសកម្ពុជាតាមយរៈវប្បធម៌ អរិយធម៌ ដ៏ផូរផង់ ជាពិសេសប្រាសាទអង្គរវត្ត។ យោងតាមក្រសួងទេសចរណ៍បានឲ្យដឹងថា កាលពីឆ្នាំ២០១៦ ប្រធានក្រុមប្រឹក្សាទេសចរណ៍ និងពាណិជ្ជកម្មអឺរ៉ុប (European Council on Tourism and Trade) លោក អានតុន ការាហ្គា (Anton Caragea) និងលោក មៀគា ខុនស្តេនទីនេស្កូ (Mircea Constantinescu) ប្រធានបណ្ឌិតសភាទេសចរណ៍អឺរ៉ុប (European Tourism Academy) បានធ្វើដំណើរផ្ទាល់មកកម្ពុជាដើម្បីទស្សនានូវតំបន់ទេសចរណ៍វប្បធម៌ ប្រវត្តិសាស្ត្រដ៏សម្បូរបែបរាប់មិនអស់។
លោកទាំងពីរបានកំណត់ថាកម្ពុជា ជាគោលដៅទេសចរណ៍វប្បធម៌ដ៏ពេញនិយម (Favorite Cultural Destination Distinction 2016) ដោយចាត់ទុកព្រះរាជាណាចក្រកម្ពុជា ជាព្រះរាជាណាចក្រអច្ឆរិយលើ៤ចំណុចគឺ៖
១.-អច្ឆរិយភាពខាងវប្បធម៌ ជាពិសេសប្រាសាទអង្គរវត្ត (Angkor Wat temple) ដែលជាស្នាដៃល្អឯកគ្មានពីររបស់មនុស្សខ្មែរតំណាងឱ្យមនុស្សជាតិទាំងមូល និងអច្ឆរិយភាពខាងធម្មជាតិ។
២- បឹងទន្លេសាបជាបឹងធំជាងគេនៅអាស៊ីដែលមានទឹកហូរត្រឡប់ ដែលគ្មានពីរលើពិភពលោក។
៣- ភាពពិសេសរបស់ព្រះពុទ្ធសាសនានៅកម្ពុជា ដែលមិនត្រឹមតែអប់រំមនុស្សឱ្យក្លាយជាពុទ្ធសាសនិកប៉ុណ្ណោះទេ តែថែមអប់រំមនុស្សទូទៅឲ្យធ្វើតែអំពើល្អ។ ព្រះពុទ្ធសាសនាត្រូវបានកំណត់ជាសាសនារបស់រដ្ឋ។
៤- ភាពញញឹមរួសរាយរាក់ទាក់របស់ប្រជាជនកម្ពុជា ដែលលោក Anton Caragea បានគូសបញ្ជាក់ថា បើចង់ឃើញភាពញញឹមរួសរាយរាក់ទាក់ពិតប្រាកដរបស់មនុស្សគឺត្រូវមកកម្ពុជា។
