Friday, April 6, 2018

អតីតប្រធានាធិបតីកូរ៉េខាងត្បូង ជាប់គុក២៤ឆ្នាំ រឿងប្រព្រឹត្តពុករលួយ

រិទ្ធី

តុលាការ​កូរ៉េខាងត្បូងបានបើក​សវនាការដែលមានការ​ផ្សាយ​ផ្ទាល់​តាម​ទូរទស្សន៍ ​រកឃើញថាអតីត​ប្រធានាធិបតី លោកស្រី ប៉ាក ហ្គឺ​ន​ហេ (Park Geun-hye) ពិត​ជាមាន​កំហុស​ដូចជាការចោទប្រកាន់​ ពាក់ព័ន្ធនឹង​ការទទួល​សំណូក បំពាន​អំណាច និង​កំហែង​យក។​ ​ដោយផ្អែកលើកំហុស​ទាំងអស់នេះ តុលាការ​បាន​កាត់ទោសឱ្យ​លោកស្រី ជាប់ពន្ធនាគារ​ដល់​ទៅ​២៤​ឆ្នាំ និងពិន័យ​ទឹកប្រាក់​ចំនួន​១៧​លាន​ដុល្លារ​ផងដែរ ខណៈ​រដ្ឋអាជ្ញា​ចង់ឱ្យ​លោកស្រី​ជាប់ពន្ធនាគារ​ចំនួន​៣០​ឆ្នាំ​។  

​នៅ​ខាងក្រៅ​តុលាការ​ ក្នុង​ទីក្រុង​សេ​អ៊ូ​ល អ្នកគាំទ្រ​អតីតប្រធានាធិបតីរូបនេះ ជាច្រើន​រយ​នាក់​បាន​ប្រមូលផ្ដុំ​តវ៉ា ខណៈ ​​សវនាការនេះធ្វើឡើងដោយអវត្តមានលោកស្រី​។ អ្នកតវ៉ា​បាន​កាន់​បដា និង​ស្រែក​គាំទ្រ​ប្រធានាធិបតី​ស្ត្រី​ទីមួយ ដែលមាន​អត្ថន័យ​បង្ហាញ​ពី​ភាពត្រឹមត្រូវ​របស់លោក​ស្រី។ នេះ​បើតាម​ការផ្សាយ​របស់​ទីភ្នាក់ងារ​ព័ត៌មាន AFP ។​

សូមរំលឹកថា ​កាលពី​ខែមេសា ឆ្នាំ​២០១៧ កន្លងទៅ លោកស្រី ប៉ាក ហ្គឺ​ន​ហេ រង​ការចោទប្រកាន់​ចំនួន​១៨​ករណី រួមមានការទទួល​សំណូក ការបំពាន​អំណាច និង​ការ​បែកធ្លាយ​ឯកសារ​សម្ងាត់​របស់រ​ដ្ឋ​ ម្យ៉ាងទៀត លោកស្រីក៏ជាប់ចោទ​លើ​ករណី​បើកដៃឱ្យ​លោកស្រី Choi ដែលជាមិត្តភក្តិ លូកលាន់​កិច្ចការរដ្ឋ ទាំង​ខ្លួន​មិនមែនជា​មន្ត្រី​រដ្ឋាភិបាល និង​ចូល​ដៃ​ក្នុងការ​កៀប​យកលុយ​ពី​ក្រុមហ៊ុន​ធំៗ​របស់​កូរ៉េខាងត្បូង​ដូចជា Samsung និង Lotte ជាដើមក្នុងទំហំទឹកប្រាក់​ចំនួន​៧២​លាន​ដុល្លារសហរដ្ឋអាមេរិក​។​ កាលពី​ខែមីនា ឆ្នាំ​២០១៧ ​លោកស្រី ប៉ាក ត្រូវបាន​តុលាការ​ធម្មនុញ្ញ​​ដកតំណែង​ជាប្រធានាធិបតី​ និង​ត្រូវបាន​ចាប់ឃុំខ្លួន​រហូតដល់​ពេល​កាត់ទោស​នេះ​។ ទោះជាយ៉ាងណា លោកស្រី ប៉ាក ធ្លាប់​លើកឡើងថាមាន​របៀបវារៈ​នយោបាយ​នៅ​ខាងក្រោយ​ការកាត់ទោស​លោកស្រី ហើយ​លោកស្រី​គ្មាន​កំហុស​អ្វី​ទាំងអស់​។

ចំណែកឯ លោកស្រី Choi ដែលជា​ដើមហេតុ​នៃ​សំណុំរឿង​ពុករលួយ​ដ៏​ធំ​នេះ ក៏ត្រូវ​បាន​តុលាការ​កាត់ទោស​ឱ្យជាប់ពន្ធនាគារ​រយៈពេល​២០​ឆ្នាំ​។ លោកស្រី​រង​ការ​ចោទថា បាន​ប្រើប្រាស់​ទំនាក់ទំនង​ជាមួយ​លោកស្រី ប៉ាក ដើម្បី​កេងចំណេញ​ផលប្រយោជន៍​ផ្ទាល់ខ្លួន​ក្នុង​ទំហំ​ទឹកប្រាក់​រាប់លាន​ដុល្លារ​។ គួរបញ្ជាក់ថា លោកស្រី ឆយ ស៊ូនស៊ីល មានអាយុ ៦១ឆ្នាំ ត្រូវចាប់ខ្លួន និងចោទ​ប្រកាន់ចំនួន ១៨បទល្មើស កាលពីខែវិច្ឆិកា ឆ្នាំ២០១៦ ក្នុងនោះ​រួមមានទាំង ការរំលោភ​អំណាចរដ្ឋ និងប្រព្រឹត្តអំពើ​ពុករលួយផងដែរ។

@Amapapa.News