កណ្ដាល៖ បើយោងតាមលោកវរសេនីយ៍ឯក សេង សុជាតិ អធិការនគរបាលស្រុកស្អាង បានបញ្ជាក់ថាមាន រថយន្តម៉ាកវីស្ទូ ពណ៌ទឹកប្រាក់ ពាក់ផ្លាកលេខ ភ្នំពេញ 2AE-8952 បើកបរដោយឈ្មោះលឿង ថៃឡឺយ ភេទប្រុស អាយុ៣០ឆ្នាំ ជនជាតិវៀតណាម មានទីលំនៅ ឃុំខាន់អាង ស្រុកអាន់ភូ ខេត្តអាងយ៉ាងប្រទេសវៀតណាម ធ្វើដំណើរក្នុងទិសដៅពីត្បូងមកជើង ។
លុះបើកមកដល់ចំណុចកើតហេតុ បានរេចង្កូតចូលទៅបុករថយន្តធំម៉ាកហ៊ីយ៉ាន់ដាយ ពណ៌ស ពាក់ផ្លាកលេខព្រះសីហនុ3A-5568 បើកបរដោយឈ្មោះណុល ម៉េងហុង ភេទប្រុស អាយុ១៩ឆ្នាំ រួមដំណើរជាមួយឈ្មោះគា ឆាង ភេទប្រុស អាយុ១៩ឆ្នាំ ដែលកំពុងបើកបញ្ច្រាសទិសគ្នាពីជើងមកត្បូង បណ្ដាលឱ្យអ្នកបើកបររថយន្តតូចជនជាតិវៀតណាម គៀបស្លាប់ភ្លាមៗនៅក្នុងរថយន្ត និង ធ្វើឱ្យរថយន្តធំជ្រុលទៅប៉ះឈ្មោះម៉ាន់ ម៉ុន ភេទប្រុសអាយុ៦៥ឆ្នាំ កំពុងឈរទទួលភ្ញៀវនៅចិញ្ចើមផ្លូវខាងកើត រងរបួសធ្ងន់និងខូចខាតម៉ាស៊ីនថតវីដេអូ ភ្លើងLED កៅអីកាត់សក់ ជើងថតវីតដេអូ មួយចំនួនទៀត ។
លោកអធិការស្រុកស្អាង បន្តថា បន្ទាប់ពីទទួលបានព័ត៌មានភ្លាម សមត្ថកិច្ចបានចុះពិនិត្យទីកន្លែងកើតហេតុនិងវាស់វែងយកវត្ថុតាងមករក្សាទុកនៅអធិការដ្ឋាននគនរបាលស្រុកស្អាង ដើម្បីកសាងសំណុំរឿងតាមនីតិវិធីច្បាប់ ។ ចំណែកជនរងគ្រោះត្រូវបានក្រុមគ្រួសាដឹកយកទៅសង្គ្រោះនៅមន្ទីរពេទ្យកាល់ម៉ែត្រ រាជធានីភ្នំពេញ ។ រីឯសពបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ។ ចំពោះអ្នកបើករថយន្តធំបាននាំយកមកសាកសួរនៅអធិការដ្ឋាននគរបាលស្រុលស្អាង ។
សមត្ថកិច្ច សន្និដ្ឋានថា ករណីនេះបង្កឡើងដោយអ្នកបើកបររថយន្តតូចបើកចូលស្ដាំរបស់រថយន្តធំ ដោយធ្វេសប្រហែស ខ្វះការប្រុងប្រយ័ត្ន ។ ចំណែកអ្នកបើកបររថយន្តធំបើកក្នុងល្បឿនលឿនខ្វះការប្រុងប្រយ័ត្ន ទើបបង្កឱ្យមានគ្រោះថ្នាក់កើតឡើង ៕
