ពីលោកផែងវណ្ណៈ ៖ ឯកឧត្តមនាយឧត្ដមសេនីយ៍ ជួន សុវណ្ណ អគ្គស្នងការរង និង ជាស្នងការនគរបាលរាជធានីភ្នំពេញ បានប្រាប់ខ្ញុំអោយដឹងតាម WhatsApp នៅយប់ថ្ងៃទី ២៤ មេសា ថា ឯកឧត្តមនាយឧត្ដមសេនីយ៍ បានបញ្ជាអោយសមត្ថកិច្ចនគរបាលព្រហ្មទណ្ឌរាជធានីភ្នំពេញ ចុះស្រាវជ្រាវករណី បុរសម្នាក់ដកកាំភ្លើងវាយក្បាលកម្មកររើសអេតចាយ ដើម្បីចាត់ការតាមផ្លូវច្បាប់ ។
ហេតុការណ៍នេះបានកើតឡើង នៅថ្ងៃទី ២៤ មេសា ឆ្នាំ ២០១៨ វេលាម៉ោងជាង ១១ ថ្ងៃត្រង់ នៅក្បែខុនដូររបស់ជនបង្ករស្ថិតនៅផ្លូវលេខ ៣៦៨ សង្កាត់ បឹងកេងកង ៣ ខណ្ឌ ចំការមន រាជធានី ។
បើតាមសាក្សីនៅជិតកន្លែងកើតហេតុបានអោយដឹងថា មុនពេលកើតហេតុ បុរសជាម្ចាស់ខុនដូរ និង ជាម្ចាស់រថយន្តស្ព័រ Chevrolet Camaro ពាក់ស្លាកលេខ 2AP-8989 ភ្នំពេញ បានបើករថយន្តដោយរោសំលេងខ្លាំងៗ ។ ពេលនោះកម្មកររើសអេដចាយនៅក្បែនោះក៏ក្រលេកមើលមុខ ពេលឃើញកម្មករមើលមុខម្ចាស់រថយន្តបានបើកត្រលប់រថយន្តមកវិញហើយចុះពីលើរថយន្តដោយមានកាន់កាំភ្លើងខ្លីនៅនឹងដៃវាយកម្មករនោះបែកក្បាលតែម្ដង ។
កម្មកររងគ្រោះមានឈ្មោះ សាំង តុលា អាយុ ២១ ឆ្នាំ មុខរបរកម្មកររើសអេដចាយ រងរបួសបែកក្បាលដេរច្រើនថ្នេរ ។ ចំណែកជនបង្ករត្រូវបានសមត្ថកិច្ចមូលដ្ឋានប្រាប់ថា ឈ្មោះ ប៉ិច តុងហេង ជាម្ចាស់ខុនដូ និង ជាម្ចាស់រថយន្តស្ព័រ មានទីលំនៅផ្ទះលេខ ៥៨ ផ្លូវ ៣៦៨ ភូមិ ៣៨ សង្កាត់ បឹងកេងកង៣ ខណ្ឌ ចំការមន ។
ជនរងគ្រោះបានដាក់ពាក្យបណ្ដឹងនៅនគរបាលមូលដ្ឋានដោយទាមទារសំណង ១០០០០ ដុល្លារ និង សំណូមពរអោយសមត្ថកិច្ចចាត់ការជនល្មើសតាមច្បាប់ ។ លោកនាយប៉ុស្តិបឹងកេងកង ៣ បានអោយដឹងថា លោកបានទទួលពាក្យបណ្ដឹងជនរងគ្រោះរួចហើយ ហើយបានកោះហៅជនបង្ករឈ្មោះ ប៉ិច តុងហេង អិយចូលខ្លួនមកបំភ្លឺនៅម៉ោង ២ រសៀលថ្ងៃនេះ ។
យើងរង់ចាំមើលតើមានការអន្តរាគមន៍ពីអស់លោក លោកស្រី ណាខ្លះក្នុងរឿងហឹង្សាដោយចេតនាមួយនេះ ។
ទោះជាយ៉ាងណាក៏ដោយ យើងខ្ញុំមានការជឿជាក់លើ ឯកឧត្តមនាយឧត្ដមសេនីយ៍ ជួន សុវណ្ណ អគ្គស្នងការរង និងជាស្នងការនគរបាលរាជធានី ដែលជានិច្ចកាលតែងតែជួយរកយុត្តិធម៌អោយអ្នករងគ្រោះ នៅពេលដែលឯកឧត្តមនាយឧត្ដមសេនីយ៍ ទទួលបានព័ត៌មានច្បាស់លាស់ពីខ្ញុំ ។
