
កម្សាន្តៈ ដោយសារតែត្រូវការលុយប្រញាប់ប្រញាល់ លោក ករុណា ពេជ្រ បានបង្ខំចិត្តប្រកាសលក់ផ្ទះ ដែលខំរកចេញពីកម្លាំងញើសឈាម ព្រោះតែជួយព្យាបាលលោកមានគុណជារឿងចាំបាច់ ។
ក្នុងចំណោមតារាចម្រៀងក្នុងផលិតកម្មថោន លោក ករុណា ពេជ្រ ត្រូវបានគេដឹងថា ជាតារាចម្រៀងម្នាក់ ដែលមានមុខដំណែង ការងារ មុខរបរ និងទ្រព្យធនច្រើនជាងគេ។ ប៉ុន្តែពេលនេះលោកបែរជាប្រកាសលក់ទ្រព្យធំមួយ គឺផ្ទះដែលលោកធ្លាប់បានរស់នៅទីនេះជិត១០ឆ្នាំមកហើយនោះ។ ផ្ទះនេះត្រូវបានគេដឹងថា នៅបុរីពិភពថ្មីជិតវត្តសំរោងអណ្តែត និងមានតម្លៃជាងកន្លះលានដុល្លារអាមេរិក។ ទោះបីជាប្រកាសលក់ផ្ទះវីឡាប្រណីតនេះក្តី ក៏លោកមិនបញ្ជាក់អំពីតម្លៃដែលលក់នោះដែរ ។ អ្វីដែលគេចាប់អារម្មណ៍ គឺពាក្យថ្លែងសរសើរ ពីអ្នកគាំទ្រលោកដែមានភាពកត្តញ្ញូខ្លាំងចំពោះអ្នកមានគុណ។ តារារូបនេះក៏ទទួលបានសារលើកទឹកចិត្តជាច្រើន ពីអ្នកគាំទ្រ និងអ្នកសិល្បៈដូចគ្នាផងដែរ ។


គួរបញ្ជាក់ដែរថា បន្ទាប់ពីប្រឡូកក្នុងរយៈពេលខ្លីក្នុងផលិតកម្មថោន តារាចម្រៀង ករុណា ពេជ្រ ទទួលបានការគាំទ្រច្រើន ទើបលោកសម្រេចចិត្តទិញផ្ទះវីឡាប្រណីតមួយនេះ រួមជាមួយពិធីឡើងគេហដ្ឋានយ៉ាងគគ្រឹគគគ្រេង។ លោកក៏ទទួលបានតំណែងជាអ្នកគ្រប់គ្រងទូទៅឲ្យផលិតកម្ម និងក្លឹបកម្សាន្តថោនផងដែរ មុនពេលដែលលោកត្រូវបានផ្លាស់ទៅគ្រប់គ្រងផ្សារContainer និង Pub Street ដែលទើបបើកដំណើរការនៅខេត្តសៀមរាប កាលពីពេលថ្មីៗនេះ៕




