Sunday, April 15, 2018

ជេរយូរហើយ រឿងឆ្កែជុះអាចម៍មុខផ្ទះ យប់ចូលឆ្នាំស្រវឹងស្រា ទាស់សម្ដីគ្នាវាយស្ត្រីម្នាក់ ខៀវភ្នែក!

អាម៉ាប៉ាប៉ាញ៉ូស

​ភ្នំពេញៈ បុរស​ម្នាក់ និងក្រុមគ្រួសារ ត្រូវបានសមត្ថកិច្ចហៅទៅបំភ្លឺទាំងកណ្ដាលយប់ ក្រោយពី​មានជម្លោះ​ពាក់ព័ន្ធនឹងការវាយ​ស្ត្រី​ម្នាក់ ​បណ្តាល​ឲ្យ​រងរបួស​​ប៉ោងភ្នែក ​​ខណៈដែលកំពុងរាំលេងជួបជុំញាតិមិត្តជិតខាងក្នុងភូមិជាមួយគ្នា ទើប​ស្ត្រី​រងគ្រោះ​បានទៅប្ដឹងសមត្ថកិច្ចប៉ុស្តិ៍នគរបាលទួលសង្កែ​ ដើម្បីឲ្យ​សមត្ថកិច្ចឃាត់ខ្លួន​ជនដៃដល់ រួច​ដាក់ពាក្យបណ្តឹងតែម្តង។

ហេតុ​ការណ៍​នេះ​ បានកើតឡើងកាលពី​ម៉ោង​ជិត១រំលងអធ្រាត្រ​ ឈានចូលថ្ងៃអាទិត្យ ១៥រោច ខែចេត្រ ឆ្នាំច សំរឹទ្ធស័ក ព.ស.២៥៦២ ត្រូវនឹងថ្ងៃទី​១៥ ​ខែមេសា ឆ្នាំ​២០១៨ នៅ​ចំណុចភូមិចុងខ្សាច់ សង្កាត់ទួលសង្កែ ខណ្ឌឫស្សីកែវ​ រាជធានីភ្នំពេញ​។

​​បើតាមសំដីស្ត្រី​រងគ្រោះ​ឈ្មោះ អ៊ូច ស្រីលក្ខណ៍​ អាយុ៥០ឆ្នាំ ​ជនជាតិខ្មែរ​ មាន​ទីលំនៅ​ភូមិ​កើតហេតុខាងលើ បានប្រាប់មកកាន់ភ្នាក់ងារ CAM POST ដឹងថា​ កាលពីមុនថ្ងៃកើតហេតុ​ ជារៀងរាល់ព្រឹក ឆ្កែរបស់ម្ចាស់ផ្ទះដែលមានជម្លោះជាមួយគាត់ តែតែងមកជុះអាចម៍នៅមុខផ្ទះគាត់ ធ្វើឲ្យគាត់ទ្រាំកើបអាចម៍ឆ្កែនោះចេញស្ទើតែរាល់ថ្ងៃ។ ទាំងដែលពេលខ្លះស្រែកជេពិតមែន ព្រោះវាក្លិនស្អុយប៉ះពាល់ការរស់ពេកទៅហើយ តែបែជានៅមុនពេលកើតហេតុ​នេះ ខណៈគាត់កំពុងរាំលេងជួបជុំញាតិមិត្តជិតខាងក្នុងភូមិ ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ស្រាប់តែ​បុរស​ឈ្មោះ ដារ៉ា ភេទ​ប្រុស អាយុ​៣១ឆ្នាំ​ ជនជាតិខ្មែរ មានមុខ​រត់ម៉ូតូឌុប ត្រូវជាកូនរបស់អ៊ុំស្រ្ដីម្ចាស់ផ្ទះ និងស្នាក់នៅក្នុងភូមិកើតហេតុខាងលើ បានដើរចូលទៅសួរនាំរករឿងគាត់ ទាំងមាន​អាការៈស្រវឹងស្រាខ្លាំង ដោយបុរសរូបនោះបានសួរនាំគាត់ថា ហេតុអ្វីបានជាជេដៀមដាមសត្វឆ្កែរបស់ខ្លួន។ រំពេចនោះ ក៏ឈ្លោះប្រកែកគ្នា ស្រាប់តែពេលនោះ បុរសខាងលើច្រឡោតខឹងយ៉ាងខ្លាំង ក៏ស្ទុះទៅរកវាយស្រ្តីរងគ្រោះ តែក៏មានអ្នកជួយឃាត់ និងត្រឡប់ទៅផ្ទះវិញរៀងខ្លួន។

ក្រោយពីក្រុមគ្រួសារឃាត់យកទៅផ្ទះរៀងៗរួចមក ស្រាប់តែគេឃើញយុវជនម្នាក់ដែលជាប្អូនរបស់ស្ត្រីរងគ្រោះបានដើរមកពីក្រៅទៅផ្ទះ រួចក៏បានស្ទុះទៅវាយច្របាច់ក បម្រុងវាយយុវជននោះ ទើបស្ត្រីរងគ្រោះកាន់កាំបិតប៉័ងតោ ចេញទៅជួយឃាត់វិញ ដោយយកទៅចង្អុល​មុខ និងស្រែកដាក់ម្ដាយរបស់បុរសរូបនោះវិញ រួចក៏បន្តឈ្លោះប្រកែកគ្នាម្ដងទៀត រហូតដល់ថ្នាក់ស្ត្រីរងគ្រោះទះកំផ្លៀងអ៊ុំស្រី រួចស្ទុះទៅបម្រុងកាប់ទៅលើអ៊ុំស្រីជាម្ដាយរបស់បុរសរូបនោះ តែត្រូវបានអ៊ុំស្រីចាប់ដៃជាប់ រួចទាញកាំបិតចេញពីដៃ បណ្ដាលឲ្យមុតត្រូវដៃរបួសបន្តិចបន្តួច ទើបបុរសដៃដល់ដែលជាកូនអ៊ុំស្រីនោះស្ទុះចូលទៅវាយមួយដៃចំភ្នែកខាងឆ្វេងពេញទំហឹង បណ្ដាលឲ្យស្ត្រីរងគ្រោះ​ជាំភ្នែក ទើបសាច់ញាតិក្រុមគ្រួសារទាំងសងខាងអូសទៅផ្ទះរៀងខ្លួន។

​ដោយសារទ្រាំមិនបាន ស្ត្រីរងគ្រោះ​បានមក​ដាក់ពាក្យ​បណ្តឹង​នៅ​ប៉ុស្តិ៍នគរបាលរដ្ឋបាល​ឫស្សីកែវ​ រួច​កម្លាំងសមត្ថកិច្ចប៉ុស្តិ៍បាន​ចុះ​ទៅដល់កន្លែងកើតហេតុភ្លាមៗ​ រួចនាំខ្លួន​បុរសដៃដល់​មកសួរនាំតែម្តង​។

ដោយឡែកករណីនេះភ្នាក់ងារសារព័ត៌មាន CAM POST មិនអាចសុំការបំភ្លឺពីសមត្ថកិច្ចផ្ទាល់បាននោះទេ ដោយសមត្ថកិច្ចបានប្រាប់មកថា មិនទាន់ដឹងករណីច្បាស់លាស់ទេ កុំទាន់ចេញផ្សាយ ចាំដល់មេប៉ុស្តិ៍មកសិន៕

@Amapapa.News