Friday, May 25, 2018

នាយករដ្ឋមន្ត្រីកម្ពុជា ព្រមានដករដ្ឋមន្ត្រី បើនៅតែសាចទឹកដាក់គ្នា

អាម៉ាប៉ាប៉ាញ៉ូស

ភ្នំពេញៈ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបន្ទោសធ្ងន់ៗ និងព្រមានដករដ្ឋមន្ត្រីរបស់ខ្លួន បើសិនជានៅតែមានការឈ្លោះប្រកែកខ្វែងគំនិតគ្នាក្នុងជួររាជរដ្ឋាភិបាល ជុំវិញហេតុការណ៍ប្រជាពលរដ្ឋស្លាប់ និងរងរបួសជាច្រើនរយនាក់ នៅខេត្តក្រចេះ កាលពីដើមខែឧសភា ឆ្នាំ២០១៨កន្លងទៅ។

ការបន្ទោស និងព្រមានយ៉ាងធ្ងន់ៗបែបនេះ នៅមុនពេលសម្ដេចចាប់ផ្ដើមកិច្ចប្រជុំគណៈរដ្ឋមន្ត្រី នាព្រឹកថ្ងៃសុក្រ ១១កើត ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៥ ខែឧសភា ឆ្នាំ២០១៨ នៅទីស្ដីការគណៈរដ្ឋមន្ត្រី រាជធានីភ្នំពេញ។ សម្ដេចបញ្ជាក់ថា សម្ដេចមិនហាមឃាត់មិនឲ្យមានការស្រាវជ្រាវលើហេតុការណ៍ប្រជាពលរដ្ឋពុលនៅខេត្តក្រចេះនេះនោះទេ ប៉ុន្តែសម្ដេចស្នើឲ្យរដ្ឋមន្ត្រីក្រសួងទាំង៣ រួមមានក្រសួងសុខាភិបាល ក្រសួងឧស្សាហកម្ម និងសិប្បកម្ម និងក្រសួងរ៉ែ និងថាមពល បញ្ឈប់ការធ្វើការទាំងទទឹងទិស យកឈ្នះខ្លួនឯងដោយខ្វះការទទួលខុសត្រូវ ហើយសាចទឹកដាក់គ្នាបែបទៀត។

សូមស្ដាប់ប្រសាសន៍ទាំងស្រុងរបស់សម្ដេចតេជោ ហ៊ុន សែន ៖

សូមជម្រាបថា រដ្ឋមន្ត្រីក្រសួងចំនួន៣ រួមមានលោក ម៉ម ប៊ុនហេង រដ្ឋមន្ត្រីក្រសួងសុខាភិបាល លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម និងលោក ស៊ុយ សែម រដ្ឋមន្ត្រីក្រសួងរ៉េ និងថាមពល កាលពីថ្ងៃទី២៤ ខែឧសភា ឆ្នាំ២០១៨ បានធ្វើប្រកាសព័ត៌មានរួមគ្នា បញ្ជាក់ថា “ការពុលនៅភូមិស្រែនន និងភូមិអាលច ឃុំកន្ទួត ស្រុកចិត្របុរី ខេត្តក្រចេះ បណ្តាលមកពីស្រាស ដែលមានលក់ ឬផលិតនៅក្នុងមូលដ្ឋាន ហើយដែលមានសារធាតុមេតាណុល កម្រិតខ្ពស់ និងទឹកព្រែកទេ និងអូរគគី មានសារធាតុគីមី មានកំហាប់ខ្ពស់ ដែលបណ្តាលមកពីថ្នាំសម្លាប់ស្មៅ និងថ្នាំសម្លាប់សត្វល្អិត”

ជុំវិញហេតុការណ៍នេះ ក្រសួងទាំង៣ បានខ្វែងគំនិតគ្នាក្នុងការរកឃើញមូលហេតុ ដែលបណ្ដាលឲ្យពលរដ្ឋរាប់រយនាក់ពុល។ ដំបូង​ឡើយ ក្រសួងសុខាភិបាល​រក​ឃើញថា ករណីនេះ ​បណ្តាលមកពី​ការពុល​ស្រា និង​មួយចំនួនទៀត សង្ស័យថា ​ពុល​ទឹក​ព្រែក ដែល​ប្រជាពលរដ្ឋ​បាន​ប្រើប្រាស់ប្រចាំថ្ងៃ។ ប៉ុន្តែ​ក្រោយមក លោក ចម ប្រសិទ្ធ បាន​ចេញមក​អះអាងថា ករណី​ពុល​ស្លាប់​នៅក្នុង​ខេត្តក្រចេះ​នេះ គឺ​បណ្តាលមកពី​សារធាតុ​ស្យា​នី​ត ដែល​គេ​ប្រើប្រាស់​សម្រាប់​លាង​រ៉ែ​មាស​ទៅវិញ។ តែ​មូលហេតុ​របស់លោក​ ចម ប្រសិទ្ធ​ នេះ ត្រូវបាន​លោក ​ស៊ុយ សែម ​ទាត់ចោល ដោយបានអះអាងស្រដៀងរដ្ឋមន្ត្រីក្រសួងសុខាភិបាលថា ករណី​ពុល​នេះ គឺ​បណ្តាលមកពី​ថ្នាំពុល​សម្លាប់​សត្វល្អិត ថ្នាំ​សម្លាប់​ស្មៅ និង​ករណី​មួយចំនួនទៀត គឺ​បណ្តាលមកពី​ពុល​ស្រា។

បើទោះជាបែបណាក្ដី រហូតមកទល់ពេលនេះ ក្រសួងទាំង៣ បានស្រុះស្រួលគ្នា ហើយអះអាងថា ពួកគេនឹងបន្តសហការគ្នា ដើម្បីបង្ការ ទប់ស្កាត់ និងជៀសវាង នូវបញ្ហាដែលកើតឡើងជាយថាហេតុ។

សូមបញ្ជាក់ថា កាលពីដើម​ខែឧសភា​ក​ន្ល​ង​ទៅនេះ មាន​ករណី​ពុល​ពលរដ្ឋ​នៅក្នុង​ភូមិ​ចំនួន៤ ក្នុង​ឃុំ​កន្ទួត ស្រុក​ចិត្រ​បុរី ខេត្តក្រចេះ ដោយ​អ្នកភូមិ​ជាច្រើន មាន​រោគសញ្ញា ឈឺពោះ ក្អួតចង្អោរ ឈឺ​ក អស់កម្លាំង ទន់ដៃទន់ជើង វិលមុខ និង​ថប់ដង្ហើម។ ករណី​ពុល​នេះ បានសម្លាប់​ប្រជាពលរដ្ឋ​ចំនួន១៣នាក់ និង​ជាង២០០នាក់​ទៀត ​ត្រូវបាន​បញ្ជូនទៅ​សង្គ្រោះបន្ទាន់​នៅ​មន្ទីរពេទ្យ៕

@Amapapa.News

Feature Ads