
សៀមរាបៈ ផ្ទះសម្បែងរបស់ប្រជាពលរដ្ឋនៅក្នុងស្រុកចំនួន៣ នៃខេត្តសៀមរាប ត្រូវបានគ្រោះធម្មជាតិបំផ្លិចបំផ្លាញ នៅរសៀលថ្ងៃអាទិត្យ ៦កើត ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២០ ខែឧសភា ឆ្នាំ២០១៨។
មន្ត្រីនគរបាលមូលដ្ឋាន បានឲ្យដឹងថា ស្រុកចំនួន៣ ដែលរងគ្រោះដោយខ្យល់កន្ត្រាក់ និងរន្ទះបាញ់ រួមមាន ភូមិជ្រៃ, ភូមិទឹកវិល, ភូមិសណ្តាន់, ភូមិទឹកថ្លា សង្កាត់ទឹកវិល ក្រុងសៀមរាប ការខូចខាតមាន របើកដំបូលលំនៅដ្ឋានប្រជាពលរដ្ឋចំនួន២០ខ្នង, ផ្ទះរលំដល់ដីចំនួន២១ខ្នង, ដើមឈើដួលរលំរបួសដល់មនុស្សម្នាក់។

ចំណែក នៅស្រុកប្រាសាទបាគង ឃុំមានជ័យ រន្ទះបាញ់គោងាប់មួយក្បាល, ឃុំបាគង របើកប៉ាយសាលាស្រុកមួយផ្ទាំងមកដល់ដី, រលំតូបលក់ដូរមួយខ្នងមានទំហំ៥ម៉ែត្រគុណ៦ម៉រត្រ, ឃុំអំពិល រលំផ្ទះចំនួន៤ខ្នង ខូចម៉ូតូមួយគ្រឿង ទូរទស្សន៍២គ្រឿង, កង់មួយគ្រឿង និងស្រូវមួយតោន និងឃុំកណ្តែក របើកដំបូលមួយខ្នង។

ខណៈស្រុកពួក ឃុំពួក ប៉ះពាល់ចំនួន២ភូមិ របើកដំបូលមួយខ្នង, ដួលបង្គោលអង្គតែនវិទ្យុមួយដើម និងរលំស្លាកសញ្ញាគណបក្សចំនួនមួយកន្លែង, ឃុំខ្នាត ប៉ះពាល់ចំនួន៣ភូមិ បណ្ដាលឲ្យរលំផ្ទះចំនួន៥ខ្នង របើកដំបូល៨ខ្នង។

សរុបការខូចខាត រលំផ្ទះចំនួន២៧ខ្នង របើកដំបូល៣០ខ្នង ដួលបង្គោលអង្គតែនមួយកន្លែង រលំស្លាកគណបក្សចំនួន១ស្លាក ខូចម៉ូតូ៩គ្រឿង, កង់មួយគ្រឿង រន្ទះបាញ់ងាប់គោមួយក្បាល, ខូចស្រូវមួយតោន របួសមនុស្សម្នាក់ស្រាល និងសម្ភារៈមួយចំនួន។

យ៉ាងណា ករណីខាងលើនេះ សមត្ថកិច្ចបញ្ជាក់ថា មិនបណ្ដាលឲ្យប៉ះពាល់ដល់អាយុជីវិតមនុស្សឡើយ៕





