Sponsor
អាម៉ាប៉ាប៉ាញ៉ូស

ភ្នំពេញៈ ផ្អើលប្រជាពលរដ្ឋនាំគ្នាទៅចោមរោមមើលពេញភូមិ បន្ទាប់ពីបានប្រទះសាកសពបុរសម្នាក់ អណ្តែតទឹកទន្លេ ដែលមានសភាពហើមស្អុយរលួយ​ អណ្តែតមកជាប់នៅមាត់ច្រាំងទន្លេបាសាក់ ត្រង់ចំណុចមុខសាលារៀនហួរម៉េង ហើយបានរាយការណ៍ទៅសមត្ថកិច្ច ដើម្បីចុះមកត្រួតពិនិត្យ​ភ្លាមៗផងដែរ។

ហេតុការណ៍ដែលបង្កការភ្ញាក់ផ្អើលយ៉ាងខ្លាំងនេះ ​កើតមានឡើង​នៅវេលាម៉ោង១០៖៣០នាទីព្រឹក ថ្ងៃអាទិត្យ ៦កើត ខែជេស្ឋ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២០ ខែឧសភា​ ឆ្នាំ​២០១៨នេះ នៅមាត់ច្រាំងទន្លេបាសាក់ ត្រង់ចំណុចមុខសាលារៀនហួរម៉េង តាមផ្លូវ៣៦៩ ស្ថិតក្នុងភូមិព្រះពន្លា សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ​។

សមត្ថកិច្ចខណ្ឌច្បារអំពៅ ប្រាប់ឲ្យភ្នាក់ងារសារព័ត៌មាន Cam Post ដឹងថា នៅមុនពេលកើតហេតុ​ គឺមានប្រជាពលរដ្ឋរស់នៅក្បែរកន្លែងកើតហេតុ បានប្រទះឃើញសាកសពពុំស្គាល់អត្តសញ្ញាណ ភេទប្រុស អណ្តែតមកឈប់នៅមាត់ច្រាំងទន្លេបាសាក់ ផ្លូវ៣៦៩ ភូមិព្រះពន្លា សង្កាត់ព្រែកប្រា ខណ្ឌច្បារអំពៅ ក៏មករាយការណ៍ប្រាប់សមត្ថកិច្ចប៉ុស្តិ៍នគរបាលព្រែកប្រា ចុះទៅកន្លែងប្រទះឃើញ រួចរាយការណ៍បន្តទៅសមត្ថកិច្ចជំនាញចុះមកពិនិត្យ។

បន្ទាប់មក សមត្ថកិច្ចបានទាក់ទងសហការជាមួយសមត្ថកិច្ចប៉ុស្តិ៍ចាក់អង្រែក្រោម ដើម្បីយកសពឡើងមកធ្វើ​កោសល្យវិច័យ​នៅវត្តចាក់អង្រែក្រោម ក្រោយពីធ្វើកោសល្យវិច័យសពរួចហើយ ការសន្និដ្ឋានតាមការពិនិត្យរបស់ការិយាល័យនគរបាលបច្ចេកទេសរាជធានីភ្នំពេញ និងការបញ្ជាក់របស់វេជ្ជបណ្ឌិត នង សុវណ្ណារ័ត្ន គ្រូពេទ្យកោសល្យវិច្ច័យរាជធានីភ្នំពេញ បានបញ្ជាក់ថា សាកសពនេះ ស្លាប់ដោយសារលង់ទឹក ពិតប្រាកដមែន​។

សាកសពជនរងគ្រោះ នៅមិនទាន់ស្គាល់អត្តសញ្ញាណនៅឡើយទេ ចំពោះភិនភាគនៃសពមានវ័យប្រហែលជាង៤០ឆ្នាំ ភេទប្រុស​ កម្ពស់ប្រហែល ១,៦៥ម៉ែត្រ ពាក់អាវសាច់ក្រណាត់ដៃវែង​ ពណ៌ក្រហម​ ស្លៀកខោសាច់ក្រណាត់ពណ៌ខ្មៅ។

បន្ទាប់ពីសមត្ថកិច្ចធ្វើ​កោសល្យវិច័យរួចហើយ សពបុរសដែលលង់ទឹកស្លាប់ខាងលើនេះ កំពុងតម្កល់ទុកនៅវត្តចាក់អង្រែក្រោម រង់ចាំស្វែងរកក្រុមគ្រួសារសាច់ញាតិ មកទទួលយកទៅធ្វើបុណ្យតាមប្រពៃណី៕

វីដេអូ៖

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor