Sponsor
អាម៉ាប៉ាប៉ាញ៉ូស

ភ្នំពេញៈ ជនសង្ស័យ​ម្នាក់ ​ក្នុង​ចំណោម​បក្ខពួក​ពីរ​នាក់ ត្រូវបាន​កម្លាំង​សមត្ថកិច្ច​ប៉ុស្តិ៍នគរបាល​ស្ទឹងមានជ័យ​៣ ​ឃាត់ខ្លួនយកទៅសាកសួរ​ បន្ទាប់​ពី​ជនសង្ស័យ​រូបនោះ​ បាន​ធ្វើ​សកម្មភាព​កាច់ក​ម៉ូតូ​របស់​ជនរងគ្រោះ​ម្នាក់​ ដែល​ទុក​នៅ​ក្នុង​ផ្ទះ​បានសម្រេច។ ហេតុការណ៍នេះ បានកើត​ឡើង​នៅវេលាម៉ោង១១៖៣០នាទីព្រឹក ថ្ងៃទី​២០​ ខែ​ឧសភា​ ឆ្នាំ​២០១៨​ ក្នុង​បុរីសូនី​ ផ្ទះលេខ១២៤​ ផ្លូវ​លេខ៣៦​ ទុលមុខ​ហាងការហ្វេ​ធម្មជាតិ ភូមិឫស្សី​១​ សង្កាត់​ស្ទឹងមានជ័យ​៣ ខណ្ឌមានជ័យ​ រាជធានីភ្នំពេញ។

សមត្ថកិច្ចឲ្យដឹងថា ជនសង្ស័យ​មានឈ្មោះ​ សន​ ចាន់ឡុក​ ភេទប្រុស​ អាយុ​៣៤ឆ្នាំ​ មុខរបប​កម្មករ​សំណង់​ ស្នាក់នៅ​ផ្ទះជួល​ ភូមិ​បឹង​ឈូក​ សង្កាត់​ អូបែកក្អម​ ខណ្ឌ​សែនសុខ​ រាជធានីភ្នំពេញ មានស្រុកកំណើត​ ភូមិ​ពង្រ​ ឃុំ​ពង្រ​ ស្រុកបាធាយ៍​ ខេត្ត​កំ​ពង់ធំ​ ដកហូតម៉ូតូ​ម៉ាក YAMAHA  FINO ពណ៌ក្រហម​លាយ​ស​ ពាក់ស្លាកលេខ​ ភ្នំពេញ​ 1AM-4174 មួយគ្រឿង​ ជារបស់​ជនសង្ស័យ​។

ចំណែក​ជនរងគ្រោះ​មានឈ្មោះ​ ប៉ែន​ នៅវីណា​ ភេទប្រុស​ អាយុ៣០ឆ្នាំ​ មុខរបបមន្ត្រី​កងរាជ​អាវុធ​ហត្ថ​ក្រុង​ភ្នំពេញ​ ស្នាក់នៅផ្ទះជួល​កើតហេតុ​ខាងលើ​ មាន​ស្រុកកំណើត​ស្រុករមាសហែក ខេត្តស្វាយរៀង។ ហើយម៉ូតូ​ដែលជនសង្ស័យ​កាច់ក​លួចយក​ទៅ​គឺ​ម៉ាក​ ហុងដាឌ្រីម ធុនសេ១២៥ ស៊េរីឆ្នាំ២០១៦ ពណ៌ខ្មៅ​ ពាក់ស្លាកលេខ​ ភ្នំពេញ​ 1FM-3867​។

តាម​សម្តី​ជនរងគ្រោះ​ឲ្យដឹងថា​ មុន​ពេល​កើត​ហេតុ​ គឺ​រូប​លោក​បានទុក​ម៉ូតូ​នៅ​ក្នុង​ផ្ទះ​ជួល​ខាង​ក្រោម​ ហើយ​​លោក ​និងប្រពន្ធ​បានឡើង​ទៅ​លើ​បន្ទប់​ជួលខាងលើ។ ខណៈ​ពេលនោះ ​រូប​គាត់ក៏មិន​ដឹង​ថា​ បាត់​ម៉ូតូ​ដែរ តែ​ចៃដន​ត្រូវបាន​អ្នក​ជិតខាង​ដែល​លក់​កាហ្វេ​នៅខាងមុខ​ផ្ទះ ឃើញ​ជនសង្ស័យដែល​មាន​គ្នា​២​នាក់ បាន​ចូល​ទៅ​ធ្វើ​សកម្មភាព​កាច់ក​យក​ម៉ូតូ​រ​បស់លោក​បានសម្រេច​ រួចនាំ​គ្នា​ជិះ​រត់​គេចខ្លួន។ ​ភ្លាមនោះ បង​ប្អូន​ប្រជាពលរដ្ឋឃើញ​ហេតុការណ៍​ជាក់ស្តែង​ ក៏បាន​នាំគ្នា​ជិះ​ម៉ូតូ​ដេញ​តាម​ជនសង្ស័យ​ ហើយ​ស្រែក​ថា ចោរៗ បាន​ប្រហែល​៥០០ម៉ែត្រ​ ពីកន្លែងកើតហេតុ​ ក៏ត្រូវសមត្ថកិច្ច​ ដែលល្បាត​ឆ្លង​កាត់​ទីនោះ​ បានឃើញ​ និងបាន​ឃាត់ខ្លួន​​ជនសង្ស័យ​ម្នាក់ ​និង​ម៉ូតូ​មួយគ្រឿង​ យកទៅ​សាកសួរ​នៅ​ប៉ុស្តិ៍​នគរបាល​ស្ទឹងមានជ័យ​៣​។ ចំណែក​បក្ខពួក​ម្នាក់​ទៀត​ បានរត់​គេខ្លួ​ន​បាត់ ដោយ​បានយក​ម៉ូតូ​របស់​ជនរងគ្រោះ​ទៅជាមួយ​ផងដែរ​។

នៅ​ចំពោះមុខ​សមត្ថកិច្ច​ ជនសង្ស័យ​រូបនោះ​ បាន​សារភាពថា​ ពួក​គេ​ពិត​ជា​បាន​រួម​គំនិត​ កាច់ក​លួចយក​ម៉ូតូ​របស់​ជនរងគ្រោះ​ពិត​ប្រាកដមែន​។

ក្រោយ​ពេលកើតហេតុ​ ជនរងគ្រោះ​បានមក​ដាក់​ពាក្យ​បណ្តឹង​នៅ​ប៉ុស្តិ៍នគបាល​ស្ទឹងមានជ័យ​៣​ ដើម្បីឲ្យ​សមត្ថកិច្ច​ចាត់ការ​តាម​ផ្លូវ​ច្បាប់។ ចំណែក​ជនសង្ស័យ​ ត្រូវ​បានសមត្ថកិច្ច​កសាង​សំណុំរឿង​បញ្ជូនទៅ​អធិការដ្ឋានខណ្ឌ​មានជ័យ​ ដើម្បី​ចាត់ការបន្ត​តាម​នីតិវិធី៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor