ភ្នំពេញៈ រថយន្តក្រុងមួយគ្រឿងលួចដឹកសាច់សត្វព្រៃពីប្រទេសថៃចូលមកដល់ក្រុងភ្នំពេញ ត្រូវកម្លាំងសមត្ថកិច្ចប្រឆាំងបទលើ្មសសេដ្ឋកិច្ចក្រសួងមហាផ្ទៃ ចុះឆែកឆេររកឃើញ និងរឹបអូសបានជាង១តោន ដែលបង្កប់នៅបាតរថយន្តនោះ។
ករណីបង្ក្រាបនេះ បានធ្វើឡើងនៅព្រឹកថ្ងៃទី១៨ ខែឧសភា ឆ្នាំ២០១៨នេះ នៅតាមបណ្តោយផ្លូវលេខ៣៨៤កែងលេខ២០៥ ក្នុងសង្កាត់ទូលស្វាយព្រៃទី២ ខណ្ឌចំការមន រាជធានីភ្នំពេញ។ហើយប្រតិបត្តិការណ៍ដោយកម្លាំងសមត្ថកិច្ចចម្រុះ និងសមត្ថកិច្ចប្រឆាំងបទល្មើសសេដ្ឋកិច្ច នៃក្រសួងមហាផ្ទៃ កាំកុងត្រូល សមត្ថកិច្ចមូលដ្ឋាន មន្ត្រីកាំកុងត្រូលផងដែរ បានចុះឆែកឆេររថយន្ត មួយគ្រឿង ដែលសង្ស័យថា លួចដឹកសាច់សត្វខូចគុណភាពដែលនាំចូលពីប្រទេសថៃ រឹបអូសបានជិតប្រមាណជាង១០០០គីឡូក្រាម។
បើតាមលោកឧត្តមសេនីយ៍ឯក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងឧត្តមសេនីយ៍ទោ ឡុង ស្រេង អនុប្រធាននាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ បានប្រាប់ឲ្យដឹងថា នៅក្នុងការចុះឆែកឆេរនេះ គឺកម្លាំងសមត្ថកិច្ចចម្រុះបានធ្វើការស្រាវជ្រាវរហូតមកដល់ចំណុចផ្លូវ៣៨៤ កែងផ្លូវ២០៥ ក្នុងសង្កាត់ទួលស្វាយព្រៃ២ បានឃាត់រថយន្តក្រុង មួយគ្រឿង ពណ៌សលាយផ្កាយឈូក ពាក់ស្លាកលេខ ភ្នំពេញ 3C-7077 ដែលជារបស់ក្រុមហ៊ុនឯកជន ហើយកម្លាំងសមត្ថកិច្ចចម្រុះយើងបានធ្វើការឆែកឆេររកឃើញសាច់សត្វខូចគុណភាពដែលនាំចូលពីប្រទេសថៃ។
ក្រោយពីធ្វើការឆែកឆេររួចមក កម្លាំងសមត្ថកិច្ចចម្រុះបានហៅម្ចាស់រថយន្ត និងតំណាងក្រុមហ៊ុន យកទៅធ្វើការសាកសួរនៅនាយកដ្ឋាន និងបន្តនីតិវិធី។
ប្រភពផ្សេងទៀតបាននិយាយថា រថយន្តក្រុងនេះដឹកសាច់សត្វព្រៃមកញឹកញាប់ណាស់តែមិនដែលឃើញសមត្ថកិច្ចបង្ក្រាប់ទេ ទើបតែលើកនេះនាំគ្នាចុះមកចាប់។ គេថាការដែលម្ចាស់រថយន្តក្រុងនាំចូលមកដល់នេះបានក៏ដោយសារតែមានការបើកដៃពីមន្ត្រីសមត្ថកិច្ចនៅច្រកព្រំដែន ពិសេសមន្ត្រីកាំកុងត្រូល និងមន្ត្រីនគរបាលប្រឆាំងបទល្មើសសេដ្ឋកិច្ចនៅទីនោះតែម្តង ជាអ្នកបើកដៃយកលុយដាក់ហោប៉ៅ ដោយមិនគិតពីផលប៉ះពាល់សុខភាពប្រជាពលរដ្ឋឡើយ៕
