ភ្នំពេញៈ បុរសម្នាក់ បានរងរបួសធ្ងន់ធ្ងរ ខណៈកំពុងជិះម៉ូតូ ស្រាប់តែរថយន្តរបស់លោកជំនួយការសម្តចក្រឡាហោម បុកពេញទំហឹងប៉ើងខ្ទាតជាច្រើនម៉ែត្រ។
គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១១និង១៥នាទីយប់ ថ្ងៃ១០ខែឧសភា ឆ្នាំ២០១៨ នៅចំណុចមុខវិទ្យាល័យព្រះស៊ីសុវត្ថិលើផ្លូវព្រះនរោត្តមកែងផ្លូវលេខ១៨៤ ក្នុងសង្កាត់ជ័យជំនះ ខណ្ឌដូនពេញ។
សមត្ថកិច្ច បានឲ្យដឹងថា គ្រោះថ្នាក់ចរាចរណ៍នេះ កើតឡើងរវាងរថយន្ដម៉ាកហ្វតធូន័រ ពាក់ស្លាកលេខ ភ្នំពេញ 2I-7311 បើកបរដោយលោក កៅ ហ្សង់លី មានតួនាទីជាជំនួយការរបស់សម្តចក្រឡាហោម បានបុកជាម៉តូម៉ាកហុងដាឌ្រីម ពាក់ស្លាកលេខភ្នំពេញ1CT-5495 បណ្ដាលឲ្យអ្នកបើកម៉ូតូមិនស្គាល់អត្តសញ្ញាណ រងរបួសធ្ងន់។
សាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញជរងគ្រោះជិះម៉ូតូតាមផ្លូវនរោត្តមពីត្បូងមកជើង លុះមកដល់ចំណុចកើតហេតុ ក៏មានរថយន្តម៉ាកហ្វតធូន័រ បើកបញ្ច្រាសទិសដៅគ្នា បួងចង្កូតបត់ឆ្វេង ក៏ជ្រុលទៅបុកម៉ូតូនោះពេញទំហឹងប៉ើងខ្ទាត បណ្ដាលឲ្យអ្នកបើកបរ រងរបួសធ្ងន់ធ្ងរ ត្រូវបានបញ្ជូនទៅព្យាបាលនៅគ្លីនិកហុងហាក់។ ចំណែករថយន្តខូចខាតមួយកំណាត់កាត់មុខទាំងស្រុង។ ដោយឡែកអ្នកបើកបរថយន្ត ត្រូវវបានកម្លាំងមូលដ្ឋាន ឃាត់ខ្លួនភ្លាមៗផងដែរ។
បច្ចុប្បន្នរថយន្ដ និងម៉ូតូ រួមទាំងអ្នកបើកបររថយន្ត បន្ទាប់ពីកម្លាំងនគរបាលចរាចរណ៍ក្រុងធ្វើការវាស់វែងរួច បានអូសយកទៅរក្សាទុកនៅការិយាល័យ ដើម្បីធ្វើការដោះស្រាយតាមច្បាប់៕
