កំពង់ឆ្នាំងៈ រថយន្តឡាំប្រឺតាដឹកគ្រឿងសំណង់ បុកម៉ូតូស្កូបពីពេញមួយទំហឹង បណ្ដាលឲ្យយុវជនម្នាក់ បានរងរបួសធ្ងន់បាក់ដៃម្ខាង។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១០ព្រឹកថ្ងៃទី១៩ ខែឧសភា ឆ្នាំ២០១៨ នៅតាមកំណាត់ផ្លូវជាតិលេខ៥ ស្ថិតក្នុងភូមិទី៨ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង។
សមត្ថកិច្ច បានឲ្យដឹងថា ជនរងគ្រោះឈ្មោះ ជុំ សុគន្ធ ភេទប្រុស អាយុ៣៦ឆ្នាំ រស់នៅភូមិទួលទ្រា ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។
សមត្ថកិច្ច បានឲ្យដឹងថា មុនពេលកើតហេតុ ជនរងគ្រោះបានជិះម៉ូតូម៉ាកហុងដាស្កូបពី ពណ៌ស ពាក់ស្លាកលេខ ភ្នំពេញ ១FJ-៦៨១៣ ធ្វើដំណើរក្នុងទិសដៅពីលិចទៅកើត មកដល់ចំណុចកើតហេតុ ស្រាប់មានរថយន្តឡាំប្រឺតាមួយគ្រឿង (កង់៣) ដឹកគ្រឿងសំណង់១គ្រឿង បានធ្វើដំណើរបញ្ច្រសទិសគ្នា បត់ចូលទីតាំងលក់គ្រឿងសំណង់របស់ខ្លួន ក៏បានជ្រុលទៅបុកម៉ូតូស្កូបពីពេញមួយទំហឹង បណ្តាលឲ្យអ្នកបើកបរម៉ូតូបាក់ដៃស្តាំម្ខាង ត្រូវបានរថយន្តសង្រ្គោះរបស់មន្ទីរពេទ្យបង្អែកខេត្តកំពង់ដឹកយកទៅសង្រ្គោះ។ ចំណែកអ្នកបើកបរឡាំប្រឺតា បានរត់គេចខ្លួនបាត់។
ក្រោយកើតហតុមធ្យោបាយទាំងពីរគ្រឿង សមត្ថកិច្ចនគរបាលក្រុងកំពង់ឆ្នាំង អូសយកទៅរក្សាទុកនៅអធិការដ្ឋាននគរបាលខេត្តកំពង់ឆ្នាំង រង់ចាំធ្វើការដោះស្រាយតាមនីតិវិធីច្បាប់៕