Sponsor
អាម៉ាប៉ាប៉ាញ៉ូស

ភ្នំពេញៈ ទារកអាយុ៤ខែដ៏កម្ស​ត់ម្នាក់​ បាន​ស្លាប់គួរឲ្យ​អាសូរ​ បន្ទាប់ពីស្រេកឃ្លានយំរហូត​ ទោះបី​ឲ្យ​បៅទឹកដោះគោ ក៏មិនបៅ ព្រោះធ្លាប់តែបៅទឹកដោះម្តាយ តែដោយសារការឈ្លោះប្រកែកជាមួយប្តី ទើបម្ដាយទៅចោលបាត់ ទុកកូនឲ្យ​ប្ដីមើល មិនដល់មួយអាទិត្យផង កូនចោលស្លាប់ ដោយសារតែស្រេកឃ្លានទឹកដោះម្តាយ។ តើនេះជាកំហុសនរណា? ចំណែកឪពុកបានបីសពកូន ដើរចូលក្នុងវត្តសំដៅទៅមច្ឆា រួចតថ្លៃជាមួយតាអាចារ្យ រៀបចំបូជាសពកូន​ ដោយពុំរាយការណ៍ទៅប្រាប់សមត្ថកិច្ចឱ្យដឹង និងចុះមកពិនិត្យសាកសពឡើយ។

ករណីដ៏គួរឲ្យអាសូរនេះ កើតឡើងកាលពីម៉ោង១១ព្រឹកថ្ងៃព្រហស្បតិ៍​ ទី៣ ខែឧសភា ឆ្នាំ២០១៨ ម្សិលមិញ​ ស្ថិតនៅក្នុងវត្តចាក់អង្រែក្រោម ក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ។

តាមសំដីស្ត្រីដែលជាម្ដាយមីងខាងប្រុស​ បានប្រាប់ថា មកពីម្ដាយទារកនឹង យកកូនមកឲ្យ​ខាងប្រុសមើល រួចរត់ចោលកូនបាត់ គឺនិយាយដដែលៗ។

ចំណែកនារីជាម្ដាយក្មេងប្រុសនោះ បានរៀបរាប់ទាំងមិនអស់ចិត្តប្រាប់ឲ្យ​ភ្នាក់ងារ CAM POST ដឹងថា ប្ដីរបស់នាងឈ្មោះ ម៉ៅ មករា ពួកគេរស់នៅជាមួយគ្នា​ជាប្តីប្រពន្ធ​ ដោយមិនបានរៀបការទេ ជិត៣ឆ្នាំហើយ ទាំងដែលដឹងថា ក្រុមគ្រួសារទាំងសងខាងមិនសូវពេញចិត្ត ទើបតែសម្រាលបានកូនប្រុសម្នាក់ អាយុ៤ខែប៉ុណ្ណោះ ។ នាងបានរៀបរាប់ទៀតថា ចាប់ពីថ្ងៃដែលស្រលាញ់គ្នាជាប្ដីប្រពន្ធមក មានតែរឿងឈ្លោះគ្នា​ទៀត ស្ទើរតែ​រាល់ថ្ងៃ ប្ដីរបស់នាងមិនដែលហៅម្ដាយរបស់នាងម៉ែម្ដងទេ តាំងពីមិនទាន់មិនកូន រហូតមកកើតកូនបានជាង៤ខែនេះ។ នាងបន្តទៀតថា ទើបមុន៦ថ្ងៃ ដែលកូនស្លាប់នេះ គឺប្ដីនាងបានតេមក ដោយប្រាប់ថា ចង់យកកូនមកលេងផ្ទះ​ ទើបនាងរៀបចំអីវ៉ាន់ និងយកកូនទៅផ្ទះប្ដី។ បន្ទាប់ពីមកដល់ផ្ទះប្ដីហើយហើយនាងក៏ឈ្លោះជាមួយប្ដី ដោយប្រចណ្ឌខឹងប្ដីនាងលួចមានស្រី ទើបមិនទៅជួយមើលថែកូន និងមានសំពាធពីក្រុមគ្រួសារខាងប្រុស ដែលមិនបានពេញចិត្តនាងទៀតនោះ ទើបរូបនាងសម្រេចទុកកូនឲ្យ​ប្ដីមើល ហើយក៏ត្រឡប់ទៅផ្ទះនាងវិញ។ ទើបយប់ថ្ងៃទី២ ខែឧសភា​ ២០១៨ ប្ដីតេប្រាប់ថា កូនឈឺហើយ ហើមពោះ និងស្រែកយំមិនបាត់សោះ ទើបទាក់ទងគ្នាដើម្បីព្រឹកស្អែកយកកូនទៅឲ្យ​ពេទ្យពិនិត្យមើល លុះព្រឹកថ្ងៃទី៣ ខែឧសភានេះ ពួកគេបានយកកូនទៅឲ្យ​ពេទ្យពិនិត្យមើល តែអកុសលកូនបានស្លាប់ពេលយកទៅដល់មន្ទីរពេទ្យ។ ហើយបុរសជាប្ដីចេញមកមុនបាត់ បំណងយកសពកូនទៅ​វត្ត ដើម្បីឲ្យ​ព្រះសង្ឃ​និងអាចារ្យ  ​បង្សុកូលរួចចង់បូជាសពតែម្ដង។ ទើបរូបនាងប្រញាប់ប្រញាល់ធ្វើដំណើរមកដល់វត្តចាក់អង្រែក្រោមដែរ។

តាមប្រភពព័ត៌មាននៅកន្លែងកើតហេតុ បានប្រាប់ឲ្យ​ភ្នាក់ងារ CAM POST ដឹងថា គេឃើញមានបុរសម្នាក់ អះថា ជាឪពុក បានបីសពទារក ដែលទើបតែមានអាយុ៤ខែ ដើរចូលមកសំដៅមច្ឆា រួចតថ្លៃជាមួយតាអាចារ្យ​ ឲ្យ​ជួយនិមន្តព្រះសង្ឃមកសូត្រមន្ត​បង្សុកូល ​និងរៀបចំបូជាសពទារកនោះភ្លាមៗ ដោយពុំរាយការណ៍ទៅប្រាប់សមត្ថកិច្ចឱ្យដឹង និងចុះមកពិនិត្យសាកសពឡើយ។ បន្តិចក្រោយមកនារីម្ដាយសពទារកនោះបានមកដល់ដែរ និងចូលរួម​បង្សុកូល​ឧទ្ទិស​កុសល​ជូន​កូនជាមួយគ្នា។

ក្រោយពីព្រះសង្ឃនិងតាអាច្យសូត្រមន្តរួចភ្លាម ស្ត្រីដែលជាម្ដាយមីងខាងប្រុស បានដើរមកស្រែកស្ដីឲ្យ​នារីជាម្ដាយរបស់ទារក៤ខែនោះថា មកពីនាងឯង ទុកកូនចោល រួចរត់ចោលកូនបាត់ ទើបកូនគ្មានទឹកដោះបៅ ស្រែកឃ្លានយំរហូត​ ទោះឲ្យ​បៅទឹកដោះគោ ក៏មិនព្រម​បៅ រហូតទាល់តែកូនហើមពោះ ឥឡូវដាច់ខ្យល់ស្លាប់ ទើបនាងឯងមក។

ភ្លាមនោះរូបនាងក៏ឆ្លើយតបតវ៉ាវិញថា នាងគ្មានកំហុសអីនោះទេ មកពីក្រុមគ្រួសារសាច់ញាតិប្ដីនាង មិនបានពេញចិត្តរូបនាងជាប្រពន្ធឡើយ ហើយពេលមានកូនជាមួយគ្នាទៀត ហើយថ្ងៃដែលនាងចេញទៅនោះ គឺបានឈ្លោះទាស់សំដីគ្នាជាមួយប្ដី ដោយប្រចណ្ឌខឹងប្ដី ទៅលួចមានស្រី ហើយមិនសូវមានពេលជួយមើលថែកូនទេ ហើយមុន៦ថ្ងៃ ដែលកូនស្លាប់ គឺប្ដីនាងបានតេមក ដោយប្រាប់ថា ចង់យកកូនមកលេងផ្ទះ​ ទើបនាងរៀបចំអី​វ៉ាន់ និងយកកូនទៅផ្ទះប្ដី តែដោយសារតែអន់ចិត្តគ្រួសារខាងប្ដីមិនសូវពេញចិត្តនាងផង ទើបនាងទុកកូនឲ្យប្ដី និងគ្រួសារខាងប្ដីជួយមើលថែជំនួស ទើបនាងចេញទៅវិញបាត់ទៅ។ រហូតឈ្លោះទាស់សម្ដីគ្នាផ្អើលពេញវត្ត ក្រោយមកក៏មានគេឃាត់ក៏ស្ងាត់ទៅវិញទៅ។

ក្រោយមកលោកតាអាចារ្យ​ ក៏បានប្រាប់ឲ្យ​បុរសជាឪពុកនោះ លើកសពមករៀបចំបូជាក្នុង​មច្ឆា​តែម្ដង ដោយពុំរាយការណ៍ទៅប្រាប់សមត្ថកិច្ចឱ្យដឹង និងចុះមកពិនិត្យសាកសពឡើយ ។ ហើយនារីជាម្ដាយបានហៅបុរសជាប្ដីមកជួយបកស្រាយមុខក្រុមអ្នកសារព័ត៌មាន ដើម្បីឲ្យ​ដឹងថារឿងរ៉ាវយ៉ាងណាខ្លះ តែបុរសជាប្ដីនោះ មិនព្រមនិយាយអ្វីច្រើនទេ គ្រាន់តែថា រឿងនឹងចប់អស់ហើយ តែប្រពន្ធនៅតែបង្ខំឲ្យ​ជួយបកស្រាយបន្តិចមក រហូតឈ្លោះទាស់សម្ដី ជាមួយម្ដាយមីងទៀត រួចម្ដាយមីងក៏បានឲ្យ​បុរសនោះឡើងម៉ូតូជាមួយប្អូនចេញទៅបាត់ទៅ។ ក្រោយកើតហេតុគ្រួសារខាងប្រុសបានរង់ចាំរើសធាតុទារកដ៏កម្សត់នោះទៅរៀបចំទុកតាមប្រពៃណី ។

ជាមួយគ្នានេះដែរ​លោក វុធ​ ផូសារវន្ត័​ នាយប៉ុស្តិ៍នគរបាលរដ្ឋបាលចាក់អង្រែក្រោម​ បានប្រាប់ឲ្យ​ដឹងថា​ លោកមិនទាន់ទទួលបានដំណឹងនេះ​ពីក្រុមគ្រួសារ​សពទារកនោះនៅឡើយទេ ខណៈពេលលោករវល់កំពុងបំបែកសំណុំរឿង ហិង្សាដោយចេតនា មានស្ថានទម្ងន់ទោសដោយសារមរណភាព នៃជនរងគ្រោះទំនាស់រឿងគ្រោះថ្នាក់ចរាចរណ៍វាយបណ្តាលឲ្យស្លាប់ នៅចំណុចមុខផ្ទះជួល ផ្លូវបេតុង ក្រុមទី២ ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ៕

@Amapapa.News

ហាមដាច់ខាតការយកអត្ថបទទៅចុះផ្សាយឡើងវិញ ឬអានធ្វើជាវីដេអូដោយគ្មានការអនុញ្ញាត!

លោកអ្នកអាចបញ្ចេញមតិនៅទីនេះ!

Feature Ads

Previous Post Next Post
Sponsor