Monday, May 28, 2018

អ្នកស្រី ចក់ សុភាព ថានឹងចូលឆ្លើយបំភ្លឺ ក្នុងសំណុំរឿងលោក កឹម សុខា បើទទួលបានដីកា

រិទ្ធី

អ្នកស្រី ចក់ សុភាព នាយិកា​ប្រតិបត្តិ​នៃ​មជ្ឈមណ្ឌល​សិទ្ធិមនុស្ស​កម្ពុជា បានប្រាប់ថាលោកស្រីនឹង​ចូលខ្លួន​ឆ្លើយ​បំភ្លឺ ជា​សាក្សី​នៅ​ថ្ងៃ​ទី​៧ ខែ​មិថុនា ឆ្នាំខាងមុខ ប្រសិនបើ​ទទួល​បាន​ដីកា​កោះហៅ របស់​សាលាដំបូង​រាជធានី​ភ្នំពេញ ទាក់ទង​សំណុំរឿង លោក កឹម សុខា ប្រធានអតីត​គណបក្ស​សង្គ្រោះជាតិ។

យោងតាមសេចក្ដីថ្លែងការណ៍​របស់​មជ្ឈមណ្ឌល​សិទ្ធិមនុស្ស​កម្ពុជា​កាលពីថ្ងៃអាទិត្យ ទី២៧ ខែឧសភា ឆ្នាំ២០១៨​បានបញ្ជាក់​ថា អ្នកស្រី ចក់ សុភាព នៅ​ពុំ​ទាន់​ទទួល​បាន​ដីកាកោះ​ហៅរបស់សាលាដំបូងរាជធានីភ្នំពេញ ​នៅឡើយ​ទេ រហូត​មក​ដល់​ពេល​នេះ។

លោក គី ឬទ្ធី ចៅក្រម​ស៊ើបសួរ​សាលាដំបូង​រាជធានី​ភ្នំពេញ បាន​ចេញ​ដីកា​កោះហៅ សាក្សី​៨​រូប​នោះ រួម​មាន លោក ប៉ា ងួនទៀង អតីតបុគ្គលិក​មជ្ឈមណ្ឌល​សិទ្ធិមនុស្ស​កម្ពុជា និង​ជា​នាយក​ប្រតិបត្តិ​នៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ​ (CCIM) លោកស្រី ចក់ សុភាព នាយិកា​នៃ​មជ្ឈមណ្ឌល​​សិទ្ធិមនុស្ស​កម្ពុជា លោក សៀ ភារម្យ អតីត​នាយក​ប្រតិបត្តិ​នៃ​អង្គការ​ក្រុម​ការងារ​ពិសេស​សិទ្ធិ​លំនៅឋាន​ លោក​ កែវ រតនា អតីត​ពិធីករ​វិទ្យុ​ ៩៣,៥FM និង​អតីត​បុគ្គលិក​វិទ្យុ​អតីត​គណបក្ស​សង្គ្រោះ​ជាតិ ,​លោក ឌឿន វីរ៉ាត់ អតីត​មេឃុំ​អតីត​គណបក្ស​សង្គ្រោះ​ជាតិ ,​លោក មាស គឹមសេង អតីត​បុគ្គលិក​សមាគម​ធាងត្នោត , លោក ហេង ពិសិដ្ឋ សមាជិក SBN និង​លោក គ្រី សុង អតីត​បុគ្គលិក​មជ្ឈមណ្ឌល​សិទ្ធិ​មនុស្ស​កម្ពុជា​។ នេះបើយោងតាមដីកាកោះ របស់ លោក គី ឬទ្ធី ចុះ​ថ្ងៃ​ទី​១៧ ខែឧសភា ឆ្នាំ២០១៨ តែ​ទើប​ត្រូវ​បាន​ផ្សព្វផ្សាយ​កាលពី​ថ្ងៃ​ទី​២៦ ខែឧសភា ឆ្នាំ២០១៨។

សូមរំលឹកថា លោក គី ឬទ្ធី ធ្លាប់​កោះហៅ​សាក្សី​យ៉ាងតិច​២​រូបរួច​ហើយ ឱ្យ​ចូល​ឆ្លើយ​បំភ្លឺករណី​សំណុំរឿង​លោក     កឹម សុខា គឺ​ អ្នកនាំពាក្យ​គណបក្ស​ប្រជាជន​កម្ពុជា លោក ឈឹម ផលរវុណ និង​ប្រធាន​វិទ្យុ​សំបុកឃ្មុំ លោក ម៉ម សូណង់ដូ។

@Amapapa.News

Feature Ads