មណ្ឌលគិរីៈ នារីជនជាតិព្នងម្នាក់ រួចផុតពីសេចក្តីស្លាប់ បន្ទាប់ពីត្រូវបុរសជាសង្សារ ប្រើខ្សែរកាបូបប្រវែងជាងកន្លះម៉ែត្ររឹតកសម្លាប់ កាលពីវេលាម៉ោង១៖៣០នាទីរំលងអធ្រាត្រឈានចូលថ្ងៃទី០៧ ខែឧសភា ឆ្នាំ២០១៨ នៅចំណុចលើកំពូលភ្នំដោះក្រមុំ ស្ថិតក្នុងភូមិឡៅការ សង្កាត់សុខដុម ក្រុងសែនមនោរម្យ ខេត្តមណ្ឌលគិរី ។
ប្រភពពីសមត្ថកិច្ចប្រាប់ថា ជនរងគ្រោះក្រោយភ្ញាក់ពីសន្លប់លើគំនរសំរាមហើយនោះ បានបើដើរទាំងញញីរញញ័រសំដៅមកប៉ុស្តិ៍សុខដុម ដើម្បីប្តឹងនគរបាលឲ្យជួយអន្តរាគមន៍។ អធិការនគរបាលក្រុងសែនមនោរម្យលោក កាន់ ពេញ បានឲ្យដឹងថា ក្រោមការចង្អុលបង្ហាញពីលោកស្នងការ ឡោ សុខា និងស្នងការរងទទួលបន្ទុកព្រហ្មទណ្ឌលោក សូ សុវណ្ណ កម្លាំងអធិការក្រុងនិងប៉ុស្តិ៍ បានចុះអនុវត្តន៍អង្កេតលើករណីនេះភ្លាមៗ រហូតឈានដល់ការឃាត់ខ្លួនជនសង្ស័យផងដែរ ។
លោកអធិការបានបន្តថា ជនរងគ្រោះមានឈ្មោះ ញ៉ារ៉ា ស្រីនាង អាយុ២៣ឆ្នាំ ជាជនជាតិព្នង មានទីលំនៅក្នុងក្រុងសែនមនោរម្យ បានរៀបរាប់ថា ជនសង្ស័យជាឈ្មោះ ឆុំ ដាវីត អាយុ២៦ឆ្នាំ ជនជាតិខ្មែរ ទីលំនៅភូមិដូង ឃុំតារ៉ុង ស្រុកព្រៃឈរ ខេត្តកំពង់ចាម មុខរបរ ជាងកែច្នៃគ្រឿងសង្ហារឹម នៅកោះញែក ស្នាក់នៅផ្ទះបង ភូមិចំការតែ ជាសង្សារ ស្គាល់គ្នារយៈពេលជិត១ឆ្នាំហើយ។
នារីរងគ្រោះបន្តថា នៅវេលាម៉ោង១០៖០០នាទី ថ្ងៃទី៦ ខែឧសភា ជនសង្ស័យបានទូរស័ព្ទមកជនរងគ្រោះឲ្យមកជួបនៅក្បែរផ្ទះជនរងគ្រោះ ។ នៅពេលនោះ ជនសង្ស័យបានយកម៉ូតូ ដឹកជនរងគ្រោះទៅផ្លូវច្រកចូលភ្នំលោកយាយ ។ ពេលទៅដល់ភ្នំលោកយាយ លើភ្នំដោះក្រមុំជនសង្ស័យក៏ទាមទារសុំបែកពីខ្លួន(ជនរងគ្រោះ) តែជនរងគ្រោះមិនព្រមហើយខ្វែងគំនិតគ្នាជនរងគ្រោះបានយំរហូតអស់កម្លាំង និងមានអាការឈឺពោះ ក៏ដេកទៅនឹងដីតែម្តង ។
នារីខាងលើបន្តថា លុះដល់ម៉ោង១៖៣០នាទីរំលងអធ្រាតុ ឈានចូលថ្ងៃទី៧ ខែឧសភា ជនសង្ស័យបានបបួលនាងមកផ្ទះវិញ ។ តែនារីរងគ្រោះថា ចាំខ្លួនបាត់ឈឺពោះសិន បន្តិចក្រោយមកជនសង្ស័យជាសង្សារ ក៏បានយកខ្សែកាតាបពណ៌ខ្មៅ ប្រវែង៥៤សង់ទីម៉ែត្រ រឹតកជនរងគ្រោះដោយជនរងគ្រោះផ្កាប់មុខទៅនឹងដី ក្រោយពីនាងសន្លប់បាត់ ជនសង្ស័យក៏បានដឹកជនរងគ្រោះយកទៅបោះចោលនៅកន្លែងទីលានចាក់សំរាម ស្ថិតក្នុងភូមិឡៅការ សង្កាត់សុខដុម ក្រុងសែនមនោរម្យ ។
លោកអធិការក្រុងបញ្ជាក់ថា នៅម៉ោងប្រមាណជា៥ទាបភ្លឺ ថ្ងៃទី៧ ខែឧសភា ឆ្នាំ២២០១៨ សមត្ថកិច្ចបានបន្តឃាត់ខ្លួនជនសង្ស័យ ដែលជនរងគ្រោះបានរៀបរាប់ខាងលើ។ ក្រោយការឃាត់ខ្លួនជនសង្ស័យបានសារភាពថា ខ្លួនពិតជាបានយកខ្សែកាតាបរឹតករ ជនរងគ្រោះ ពេលនាងសន្លប់និងបន្តដឹកទៅចោលនៅគំនរសំរាមប្រាកដមែន ។
បច្ចុប្បន្នជនសង្ស័យកំពុងឃាត់ខ្លួន ដើម្បីកសាងសំណុំរឿងទៅតុលាការតាមនីតិវិធី៕
