ភ្នំពេញៈ សម្ដេចតេជោ ហ៊ុន សែន នាយរដ្ឋមន្ដ្រីកម្ពុជា នៅថ្ងៃទី១០ ខែឧសភា ឆ្នាំ២០១៨ បានថ្លែងថា ដើម្បីជួយដល់បងប្អូន និងកូនក្មួយដែលមានបំណងចង់ទិញរថយន្តដំឡើង នៅកម្ពុជាសម្រាប់ធ្វើជារថយន្តឈ្នួលដឹកកម្មករ ហើយមានការលំបាកក្នុងការខ្ចីប្រាក់ធនាគារ ឬដោយសារការប្រាក់ធនាគារឯកជនខ្ពស់ពេកមិនអាចមានលទ្ធភាព គឺខ្ញុំបានស្នើសុំឲ្យធនាគារជាតិកម្ពុជា និងក្រុមប្រឹក្សាអភិវឌ្ឍន៍កម្ពុជា សិក្សាឲ្យបានច្បាស់អំពីគោលនយោបាយកម្ចីថវិកាដែលមានភាពអនុគ្រោះទាបបំផុត ដែលក្រុមហ៊ុន Daehan Auto Cambodia មានបំណងចង់បង្កើតជាធនាគារមួយជួយផ្តល់ប្រាក់កម្ចី ដែលមានអត្រាការប្រាក់ទាបជាងធនាគារឯកជន។
តាមរយៈកម្ចីប្រាក់ ដែលមានអត្រាការប្រាក់ទាបនេះ គឺនឹងជួយឲ្យសេវាដឹកជញ្ជូនបងប្អូនកូនក្មួយកម្មករនៅទូទាំងប្រទេសកាន់តែសុវត្ថិភាពល្អប្រសើរឡើង។ ទន្ទឹមនឹងនេះ ខ្ញុំសង្ឃឹមថារោងចក្រ នឹងផលិតដំឡើងរថយន្ត ដែលមានគុណភាព និងសុវត្ថិភាពនៅកម្ពុជា។ នេះបើយោងតាមគេហទំព័រហ្វេសប៊ុក របស សម្ដេច ហ៊ុន សែន៕
