ភ្នំពេញៈ មានករណីអគ្គិភ័យមួយ ដែលបានឆាបឆេះយ៉ាងសន្ធោសន្ធៅ ទៅលើឃ្លាំងលក់គ្រឿងបន្លាស់រថយន្ត និងឆេះលើឃ្លាំងលក់រថយន្តសរុបចំនួន៣កន្លែង នៅវេលាម៉ោងប្រមាណជា៣៖៣០នាទីទាបភ្លឺ ថ្ងៃទី១០ ខែឧសភា ឆ្នាំ២០១៨ ដោយផ្តើមចេញពីនៅទីតាំងឃ្លាំងលក់រថយន្តយីហោ សោម ច័ន្ទថ្លា ដីឡូត៏លេខ៣៦ ផ្លូវ២១៩ ភូមិ១៥ សង្កាត់ផ្សារដើមគរ ខណ្ឌទួលគោក រាជធានីភ្នំពេញ មានម្ចាស់ឈ្មោះ សោម ច័ន្ទថ្លា ភេទប្រុស អាយុ២៨ឆ្នាំ មុខរបរ លក់រថយន្ត ។
តាមសាក្សីនៅកន្លែងកើតហេតុ បានឲ្យដឹងថា ដំបូងឡើយគាត់បានឃើញភ្លើងឆេះលើរបងឃ្លាំង ភ្លាមៗនោះ គាត់ក៏បានទាញទុយោទឹកទៅបាញ់តែបាញ់ពុំឈ្នះ ហើយភ្លើងក៏ចាប់ផ្តើមឆេះទៅដល់កេះឡាំងដាក់គ្រឿងរថយន្ត ហើយឆេះឆ្លងដល់រថយន្តនៅក្បែរនោះ បណ្តាលឲ្យឆេះយ៉ាងខ្លាំងតែម្តង ។
ក្រោយពេលកើតហេតុ រូបគាត់បានធ្វើការទាក់ទងទៅអាជ្ញាធរមានសមត្ថកិច្ច ឲ្យចុះអន្តរាគមន៍ ដើម្បីបាញ់ទប់ស្កាត់។ ភ្លាមៗនោះ កម្លាំងសមត្ថកិច្ចមូលដ្ឋានបានអន្តរាគមន៍ ហៅរថយន្តពន្លត់អគ្គិភ័យរបស់ស្នងការនគរបាលរាជធានីភ្នំពេញ ដើម្បីចុះមកអន្តរាគមន៍បាញ់ពន្លត់ ។
នៅពេលដែលកម្លាំងសមត្ថកិច្ចជំនាញ ផ្នែកអន្តរាគមន៍ពន្លត់បង្កគ្រោះអគ្គិភ័យមកដល់កន្លែងបានអន្តរាគមន៍យ៉ាងយកចិត្តទុកដាក់ តែដោយសារតែស្ថានភាពអគ្គិភ័យខ្លាំងពេក ទើបធ្វើឲ្យការអន្តរាគមន៍នោះពិបាកក្នុងការបាញ់ពន្លត់ ដោយសារតែទីតាំងខាងលើនេះ ពិបាកចូលទៅខាងក្នុង ។
សមត្ថកិច្ចបានប្រាប់ឲ្យដឹងថា ទីតាំងដែលត្រូវបានអគ្គិភ័យឆាបឆេះនោះ មានឃ្លាំងស្តុបលក់គ្រឿងបន្លាស់រថយន្ត ២ឃ្លាំង ត្រូវបានអគ្គិភ័យឆាបឆេះទាំងស្រុង, ផ្ទះល្វែងចំនួន២ ថ្មក្រោមឈើលើ, ផ្ទះឈើចំនួន ២ខ្នង និងគ្មានមនុស្សរងរបួសគ្រោះថ្នាក់ដល់អាយុជីវិតនោះទេ។ ចំណែកឯសម្ភារៈខូចខាត មានរថយន្តទំនើបៗចំនួន៤គ្រឿង Audi, Land Cruiser, Rang Rover, Camry និងម៉ូតូចំនួន ២គ្រឿង គិតជាទឹកប្រាក់រាប់សែនដុល្លារ ។
សមត្ថកិច្ចបានបន្តទៀតថា នៅក្នុងប្រតិបត្តិការអន្តរាគមន៍ពន្លត់អគ្គិភ័យខាងលើនេះ បានប្រើប្រាស់រថយន្តពន្លត់អគ្គិភ័យសរុបទាំងអស់ចំនួន៤៣គ្រឿង ដោយក្នុងនោះមានរថយន្តពន្លត់អគ្គិភ័យ របស់ស្នងការនគរបាលរាជធានីភ្នំពេញ, រថយន្តពន្លត់អគ្គីភ័យ របស់កងរាជអាវុធហត្ថរាជធានីភ្នំពេញ និងរថយន្តពន្លត់ របស់អង្គភាព (ង៧០)៕
