
ប៉ៃលិនៈ ក្មេងស្រីអាយុ៤ឆ្នាំ ដែលបានស្លាប់ នៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយសារប្រតិកម្មថ្នាំពេទ្យនោះទេ បើយោងតាមការធ្វើកោសលវិច័យរបស់សមត្ថកិច្ចជំនាញ និងមន្ត្រីជំនាញរបស់មន្ទីរសុខាភិបាលខេត្តប៉ៃលិន នៅថ្ងៃព្រហស្បតិ៍ ១១រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១០ ខែឧសភា ឆ្នាំ២០១៨ បានឲ្យដឹងថា ក្មេងរងគ្រោះ មិនមែនស្លាប់ដោយសារប្រតិកម្មថ្នាំនោះទេ ពោលគឺក្មេងស្រីរងគ្រោះ រងនូវការប្រើអំពើហិង្សាលើរូបរាងកាយ និងការរំលោភបំពានផ្លូវភេទពីបុរសជាឪពុកចុង។
មន្រ្តីជំនាញ បានបញ្ជាក់ថា ក្មេងស្រីរងគ្រោះ បានទទួលរងនូវការប្រើអំពើហិង្សា លើរូបរាងកាយ និងការរំលោភបំពានផ្លូវភេទ ពីសំណាក់ឪពុកចុង ធ្វើឲ្យនាងឈឺចាប់ពេញរាងកាយ រហូតដល់បាត់ជីវិត ហើយឪពុកចុងរូបនេះ បានផ្សំថ្នាំយកទៅបញ្ជ្រកឲ្យក្មេងរងគ្រោះ ដើម្បីព្យាយាមចង់បង្វែងដាន និងបំភ្លៃការពិត។

សូមរំលឹកថា កាលពីវេលាម៉ោង៧៖៣០នាទីថ្ងៃអាទិត្យ ៧រោច ខែពិសាខ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៦ ខែឧសភា ឆ្នាំ២០១៨ នៅចំណុចខាងក្រោយផ្សារក្រោម ស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ក្មេងស្រីឈ្មោះ ដារ៉ា រស្មី អាយុ៤ឆ្នាំ បានស្លាប់ ដោយសារឪពុកចុងផ្សំឲ្យលេប ហើយប្រតិកម្មស្លាប់។

សមត្ថកិច្ច បានឲ្យដឹងថា ឪពុកចុងឈ្មោះ ឃួន ដារ៉ា អាយុ២៩ឆ្នាំ មុខរបរបុគ្គលិកកាស៊ីណូ និងម្ដាយឈ្មោះ ឈុន ស្រីចាន់ អាយុ២១ឆ្នាំ មុខរបរបុគ្គលិកកាស៊ីណូដូចគ្នា មានទីលំនៅក្នុងភូមិឃុំកើតហេតុខាងលើ។

បច្ចុប្បន្ន ជនសង្ស័យជាឪពុកចុង ត្រូវបានសមត្ថកិច្ចជំនាញឃាត់ខ្លួកសាងសំណុំរឿងបញ្ជូន ទៅអយ្យការអមសាលាដំបូងខេត្ត ដើម្បីចាត់ការតាមនីតិវិធី៕
