Sunday, June 10, 2018

សកម្មភាពដឹកជញ្ជូនឈើល្មើសច្បាប់ នៅស្រុកស្វាយលើ កំពុងហក់ឡើងខ្លាំង បន្ទាប់ពីលោក ម៉ែន វុទ្ធី ចូលមកកាន់ដំណែង

អាម៉ាប៉ាប៉ាញ៉ូស

សៀមរាបៈ សេចក្តីរាយការណ៍ បានឲ្យដឹងថា សកម្មភាពដឹកជញ្ជូនឈើល្មើសច្បាប់ នៅស្រុកស្វាយលើ បានហក់ឡើងយ៉ាងខ្លាំងត្រឹមរយៈពេលជាងពីរខែចុងក្រោយនេះ។ ជាក់ស្តែងកាលពីថ្ងៃទី៩ ខែមិថុនា ឆ្នាំ២០១៨ សមត្ថកិច្ចបានចាប់គោយន្តដឹកឈើមួយគ្រឿងអូសចូលសង្កាត់រដ្ឋបាលព្រៃឈើស្វាយលើ។ ប៉ុន្តែគេសង្កេតឃើញថា រថយន្ត និងគោយន្តដឹកឈើជាច្រើនគ្រឿងទៀតមិនត្រូវបានចាប់ឡើយ។

សេចក្តីរាយការណ៍បានបន្តថា សកម្មភាពដឹកជញ្ជូនឈើល្មើសច្បាប់តាមរថយន្តតូច ធំ និងគោយន្តកន្ត្រៃទាំងនេះក្នុងមួយយប់ៗមិនតិចជាង១០០គ្រឿងនោះទេ ឆ្លងកាត់ស្នាក់ការសង្កាត់រដ្ឋបាលព្រៃឈើស្រុកស្វាយលើ។ ក្រៅពីដឹកពេលយប់ ក៏មានរថយន្តខ្លះដឹកទាំងកណ្តាលថ្ងៃរហូតបង្កគ្រោះថ្នាក់ចរាចរណ៍ បណ្ដាលឲ្យ​បាត់បង់អាយុជីវិតមនុស្សថែមទៀផងដែរ។ ចំណែកឯការបង្ក្រាបវិញ ប្រសិនបើរថយន្តទាំងនោះ មិនបានបើកបុកមនុស្ស ឬបង្កគ្រោះថ្នាក់អ្វីមួយនោះទេ មិនមានសមត្ថកិច្ចរូបណាឆ្លើយថា បានដឹងនោះឡើយ តែបើគ្រោះថ្នាក់ហើយមានឈើនៅលើឡាន ទើបឃើញខាងមេព្រៃទៅទទួលយកឈើទៅរក្សាទុក។ ផ្ទុយទៅវិញ ប៉ុស្តិ៍ស្នាក់ការ និងកុងត្រូលចាំរាប់ក្បាលឡានដឹកឈើ គិតត្រឹមពីស្រុកស្វាយលើ និងស្រុកសូទ្រនិគម មានមិនតិចជាង២០កន្លែងនោះឡើយ។ ដោយសាតែស្រុកស្វាយលើ និងស្រុកសូទ្រនិគម ជាប្រភពបទល្មើសព្រៃឈើឆ្លងកាត់នោះ ក៏បានបង្ខំចិត្តអ្នកកាសែតមួយចំនួនតូច យកឡានទៅចតចាំប្រដេញស្ទាក់ឡានដឹកឈើ រហូតបង្កគ្រោះថ្នាក់ចរាចណ៍ទៀតផង។

ប្រភពច្បាស់ការណ៍បានឲ្យដឹងថា ជារៀងរាល់យប់មានគោយន្តកន្ត្រៃជាច្រើនគ្រឿងដឹកជញ្ជូនឈើចេញពីភូមិត្រពាំងស្វាយ ឆ្លងកាត់ស្រុកស្វាយលើ មកលក់ឲ្យឈ្មួញកណ្តាល ដើម្បីដឹកបន្តតាមឡាន មកកាន់ដេប៉ូក្នុងក្រុងសៀមរាប។ ការដឹកជញ្ជូនឈើរបស់ក្រុមឈ្មួញខាងលើ គឺមិនមានសមត្ថកិច្ចណាទៅចាប់ចងអ្វីនោះទេ ពីព្រោះពួកគេបានរត់ការផ្លូវ ជាមុនរួចអស់ហើយ ពិសេស សង្កាត់មេព្រៃស្រុកស្វាយលើតែម្តង។ មិនចឹងទេ ទោះដឹកតាមយន្តហោះ ក៏មិនរួចពីកណ្តាប់ដៃពួកគេដែរ។ ប្រភពបន្តថា កាលប្រធានមេព្រៃស្រុកស្វាយលើចាស់ឈ្មោះ យ៉ាន់ ស៊ីវ៉ាត់ នៅឈរជើង ទោះពេលខ្លះគេបើកភ្លើងខៀវឲ្យ ក៏ពេលខ្លះគេបង្ក្រាបម្តងម្កាលដែរ។ ចំណែកលោកប្រធានថ្មីឈ្មោះ ម៉ែន វុទ្ធី ហៅ (ឡយ)ឡើងមកកាន់តំណែងនេះ រយៈពេលជាង២ខែ បើក​ភ្លើងខៀវរហូតទាំងយប់ទាំងថ្ងៃ។

សូមបញ្ជាក់ថា កាលពីជាងកន្លះខែមុនប៉ូលិសចាប់ឡានធុនធំ ដែលដឹកឈើចេញពីស្រុកស្វាយលើទាំងព្រឹក។ លុះល្ងាចថ្ងៃទី៤ ខែមិថុនានេះ ឡានដឹកឈើ ម៉ាកធុនត្រា បុកមនុស្សស្លាប់ក្នុងទឹកដីស្រុកសូទ្រនិគមទៀត សុទ្ធតែអត់មានអ្នកណាដឹងថា ជាឡានដឹកឈើ។

ក្នុងករណីខាងលើនេះលោក ម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានថ្លែងថា ឈើដែលឡានធុនត្រាបុកមនុស្សស្លាប់ដឹកនោះ កំពុងរង់ចាំការប្រគល់ឲ្យពីខាងប៉ូលិស ដើម្បីយករក្សាទុកក្នុងសង្កាត់ដំដែក។ ចំណែកថា បទល្មើសព្រៃឈើឆ្លងកាត់ ស្រុកស្វាយលើគ្មានអ្នកបង្ក្រាបនោះ ទាល់តែប្រធានសង្កាត់នៅទីនោះទើបដឹង។

លោក ម៉ែន វុទ្ធី ប្រធានសង្កាត់មេព្រៃស្រុកស្វាយលើ ដែលទើបឡើងកាន់ដំណែងថ្មីៗ បានប្រាប់ថា ឡានធុនត្រា ដែលបុកមនុស្សស្លាប់ គឺដឹកឈើចេញពីខេត្តព្រះវិហារ។ នៅពេលសួរថា រយៈពេលជាង២ខែនេះ ការដឹកជញ្ជូនឈើឆ្លង កាត់ស្រុកស្វាយលើ មានអាត្រាខ្ពស់ ខុសពីសព្វ​មួយដង ហើយមិនដែលឃើញបង្ក្រាប លោកឆ្លើយថា ជាប់ប្រជុំ។

ចំណុចនេះ ក៏មានការលើកឡើងថា តំណែងពីមន្ត្រីហក់ឡើងជាប្រធាន តម្លៃអាចខ្ពស់គួរសមដែរហើយ។ ចឹងទេ ចាំបាច់ត្រូវកើបយកមកវិញ បណ្តើរៗទើបបាន។ ជាងនេះទៅទៀតនោះ គឺលោក ម៉ែន វុទ្ធី ហៅ (ឡយ) មិនមានការខ្លាចញញើតចំពោះនរណាថាអីនោះឡើយ ព្រោះលោក គឺជាអ្នកជំនិតជាមួយលោក ទា គឹមសុទ្ធ ប្រធានមន្ទីរកសិកម្ម រុក្ខាប្រម៉ាញ់ និងនេសាទ ខេត្តសៀមរាបផងដែរ៕

@Amapapa.News

Feature Ads