ព្រៃវែងៈ ក្មេងទំនើង៦នាក់ ក្នុងចំណោម១២នាក់ ត្រូវបានសមត្ថកិច្ចនគរបាលស្រុកពោធិរៀង ធ្វើការឃាត់ខ្លួន បន្ទាប់ពីពួកគេជិះម៉ូតូបង្កភាពអនាធិបតេយ្យពេញដងផ្លូវសាធារណៈ និងបង្កឲ្យមានភ័យខ្លាចដល់ប្រជាពលរដ្ឋ។
ក្រុមក្មេងទំនើងខាងលើនេះ ត្រូវបានសមត្ថកិច្ចឃាត់ខ្លួន កាលពីវេលាម៉ោង៤៖១០នាទីល្ងាចថ្ងៃទី៨ ខែមិថុនា ឆ្នាំ២០១៨ ក្រោយពីពួកគេមានគ្នា១២នាក់ ជិះម៉ូតូ៥គ្រឿង បានធ្វើសកម្មភាពជិះរេពេញផ្លវ ត្រង់នៅចំណុចស្ពានភូមិកុកត្រុំក ឃុំតាកោ ស្រុកពោធិរៀង ខេត្តព្រៃ ទើបធ្វើឲ្យប្រជាពលរដ្ឋធ្វើដំណើរមិនកើត ក៏បានទូរស័ព្ទមកប្តឹងប៉ុស្តិ៍តាកោ។
ក្រោយទទួលបានព័ត៌មានភ្លាម កម្លាំងនគរបាលប៉ុស្តិ៍តាកោ និងប្រជាការពារ បានធ្វើការស្ទាក់ ហើយក្រុមក្មេងទាំងនោះបានជិះម៉ូតូរត់គេចទៅផ្លូវព្រៃវែង រួចក៏បោះចោលដាវសាំម៉ូរ៉ៃ២ដើមនៅលើផ្លូវជាតិលេខ១១ មុខប៉ុស្តិ៍តាកោ ឃើញដូច្នោះ ក៏ឃាត់ខ្លួនក្មេងបាន៦នាក់ ម៉ូតូ២គ្រឿងនិងដាវសាំម៉ូរ៉ៃ២ដើម។
សមត្ថកិច្ច បានឲ្យដឹងថា ក្មេងទំនើងទាំង៦នាក់នោះ ១.ឈ្មោះ រ៉ា ណារ៉ាក់ ភេទប្រុស អាយុ១៦ឆ្នាំ រស់នៅភូមិលេខ7 សង្កាត់កំពង់លាវ ក្រុងព្រៃវែង។ ២.ឈ្មោះ លឹម ដាវីត ភេទប្រុស អាយុ១៥ឆ្នាំ រស់នៅភូមិលេខ3 សង្កាត់កំពង់លាវ ក្រុងព្រៃវែង។ ៣.ឈ្មោះ ណុប សុវណ្ណគិរី ភេទប្រុស អាយុ១៥ឆ្នាំ រស់នៅភូមិត្នោតទ្រេត ឃុំតាកោ ស្រុកពោធិ៍រៀង។ ៤.ឈ្មោះ កុយ គង់ម៉េង ភេទប្រុស អាយុ១៥ឆ្នាំ រស់នៅភូមិជើងទឹកក សង្កាត់ជើងទឹក ក្រុងព្រៃវែង។ ៥.ឈ្មោះ ឈិន ចន្ទ័រិទ្ធ ភេទប្រុស អាយុ១៥ឆ្នាំ រស់នៅភូមិលេខ3 សង្កាត់កំពង់លាវ ក្រុងព្រៃវែង។ ៦.ឈ្មោះ ផាន់ ទិតកក្កដា ភេទប្រុស អាយុ២០ឆ្នាំ រស់នៅភូមិលេល៣ សង្កាត់កំពង់លាវ ក្រុងព្រៃវែង។
ក្រោយឃាត់ខ្លួនក្រុមក្មេងទំនើងទាំងនោះ ត្រូវបានបញ្ជូនទៅសួរនាំនៅប៉ុស្តិ៍ ដើម្បីធ្វើការអប់រំ និងធ្វើកិច្ចសន្យា រួចឲ្យវិលត្រឡប់ទៅផ្ទះវិញ៕