បន្ទាយមានជ័យៈ សាកសពបុរសម្នាក់ ត្រូវបានអ្នកសម្អាតផ្ទះប្រទះឃើញដេកស្លាប់មានសភាពហើមស្អុយរលួយ បង្កការភ្ញាក់ផ្អើល កាលពីថ្ងៃទី២៨ ខែមិថុនា ឆ្នាំ២០១៨ ក្នុងភូមិចក សង្កាត់ព្រះពន្លា ក្រុង សិរីសោភ័ណ ខេត្តបន្ទាយមានជ័យ។
ប្រភពព័ត៌មានបានឲ្យដឹងថា មុនពេលមានការភ្ញាក់ផ្អើល ឈ្មោះ មាស ប៊ុនយី ភេទប្រុស អាយុ៣៣ឆ្នាំ រស់នៅក្រុងប៉ោយប៉ែត បានមកជួយបោសសម្អាតផ្ទះខាងលើ។ ខណៈនោះ ក៏មានធំខ្លិនស្អុយស្រាប់តែពេលដើរទៅតាមរកមើល ក៏ប្រទះឃើញអ៊ំរបស់ខ្លួន ដែលមកដេកចាំផ្ទះឲ្យបងរបស់គាត់ ដេកស្លាប់នៅក្នុងមុង ក៏ស្រែកឆោឡោឡើងតែម្តង។
សាកសពជនរងគ្រោះឈ្មោះ ដន ដារ៉ា ភេទប្រុស អាយុ៥៣ឆ្នាំ។ ជនរងគ្រោះបានមកស្នាក់នៅ និងចាំផ្ទះឲ្យបងប្រុស ឈ្មោះ ឈុន ប៊ុនទី ភេទប្រុស អាយុ៦៥ឆ្នាំ រស់នៅរាជធានីភ្នំពេញ។
បើតាមសាច់ញាតិបានប្រាប់ថា ជនរងគ្រោះមានជំងឺទឹកនោមផ្អែមដំបៅមេជើង, ជំងឺស្លាប់មួយចំហៀងខ្លួន តែអាចដើរបានតិចៗ ដោយប្រើឈើច្រត់ និងជំងឺលើសឈាម ហើយហូបស្រាជាប់ជាប្រចាំផងដែរ។
ក្រោយពេលកើតហេតុ សមត្ថកិច្ចបានចុះទៅធ្វើកោសល្យវិច័យ តែពុំឃើញមានស្លាកស្នាម ឬមានវត្ថុតាងអ្វីពាក់ព័ន្ធ័នឹងអំពើឃាតកម្មនោះទេ រួចបានប្រគល់សាកសពជូនសាច់ញាតិយកទៅធ្វើបុណ្យតាមប្រពៃណី៕