នាព្រឹកថ្ងៃទី០៧ ខែមិថុនា ឆ្នាំ២០១៨ នេះ ឯកឧត្តម ស៊ុន ចាន់ថុន ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា៖ ប្រជាជនកម្ពុជានឹងអាចធ្វើដំណើរទៅកាន់ប្រទេសសិង្ហបុរីតាមផ្លូវរថភ្លើង នាពេលខាងមុខ។ ការបញ្ជាក់បែបនេះ ធ្វើឡើងក្នុងក្នុងពិធីចុះហត្ថលេខាលើកិច្ចព្រមព្រៀងសហប្រតិបត្តិការ ដើម្បីផ្តល់សេវាទូទាត់ប្រាក់ឌីជីថល (Digital) ជាមួយក្រុមហ៊ុន ផាយ ផេ (pi pay)។
ឯកឧត្តមទេសរដ្ឋមន្ត្រីបន្តថា សព្វថ្ងៃកម្ពុជារង់ចាំតែកិច្ចព្រមព្រៀងផ្លូវរថភ្លើងជាមួយភាគីថៃប៉ុណ្ណោះ ស្របពេលដែលប្រទេសថៃ និងប្រទេសសិង្ហបុរីមានកតភ្ជាប់ផ្លូវរថភ្លើងទៅហើយ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា និងជាទីប្រឹក្សាសភាពាណិជ្ជកម្មកម្ពុជាបានលើកឡើងថា ការតភ្ជាប់បណ្តាញផ្លូវដែកនេះ វានឹងបង្កើនមិត្តភាព និងជាពិសេសជំរុញកំណើនភ្ញៀវទេសចរបន្ថែមទៀត។
កម្ពុជាកំពុងធ្វើកិច្ចចចារលើកិច្ចព្រមព្រៀងផ្លូវរថភ្លើងជាមួយប្រទេសថៃ ហើយនៅមានពាក្យពេជន៍ និងឃ្លាមួយចំនួនមិនទាន់មានភាពឯកភាពគ្នានៅឡើយ កិច្ចព្រមព្រៀងរវាងប្រទេសនីមួយៗ ត្រូវធ្វើការត្រួតពិនិត្យសិក្សាយ៉ាងច្បាស់លាស់ ដើម្បីការពារមិនឱ្យខាតបង់ប្រយោជន៍ ឬប៉ះពាល់ដល់បូរណភាពទឹកដី។ នេះជាការបញ្ជាក់របស់ឧត្តមទេសរដ្ឋមន្ត្រី។
សូមបញ្ជាក់ប្រទេសកម្ពុជាបាននិងកំពុងតែជួសជុល ក៏ដូចជាបានដាក់ឱ្យដំណើរការឡើងវិញនូវផ្លូវដែកមួយចំនួន។ នៅថ្ងៃទី០៤ ខែកក្កដា ឆ្នាំ២០១៨ ខាងមុខនេះ ផ្លូវដែកទិសខាងជើង នឹងត្រូវដាក់ឱ្យដំណើរការជាស្ថាពរ ភ្នំពេញ-បាត់ដឹង-ពោធិ៍សាត់-បាត់ដំបង-សិរីសោភ័ណ្ឌ-ប៉ោយប៉ែត។
