កំពតៈ ដីព្រែក ដែលបានរីងស្ងួតទឹកអស់ ស្ថិតនៅក្នុងភូមិសាស្រ្ត ឃុំដើមដូង ស្រុកអង្គជ័យ ត្រូវបានអ្នកមានលុយកំពុងយកគ្រឿងចក្រកាយគប់ជាកង់ៗយកធ្វើជាកម្មសិទ្ធិ និងធ្វើសួនកម្សាន្តកណ្ដាលព្រែក ។ ហើយមិនត្រឹមតែកាយក្នុងព្រែកទេ ថែមទាំងកាយយកដីនៅចំពីមុខស្ពានដែកបេឡេទៀតផង។
លោក អ្នក ទ្រី មេឃុំដើមដូង បានប្រាប់ឲ្យដឹងថា ការកាយដីព្រែក ដែលតភ្ជាប់មកពីភូមិសាស្ត្រស្រុកបន្ទាយមាសនេះ គឺលោកមិនបានដឹងទេ ប្រហែលគេលួចកាយ។ ចំណែកព្រែកតូចវិញ គឺស្ថិតក្នុងភូមិសាស្ត្រ ឃុំម្រោម នៅស្រុកអង្គជ័យ។
ព្រែតូចនេះ បច្ចុប្បន្នកំពុងត្រូវបានគេយកធ្វើជាតាំងសួនសប្បាយកាលពីថ្ងៃទី២១ ឧសភា មកម្លេះ ម្ចាស់សួនសប្បាយ ត្រូវបានជួលជាងផ្សារដែកច្នៃធ្វើជាស្ពានសម្រាប់ឲ្យអ្នកចូលទៅលេងដើរឆ្លងកាត់ពីកន្លែងមួយទៅកន្លែងផ្សេង។
លោក ងឹម ញន មេឃុំម្រោម បានប្រាប់ឲ្យដឹងថា ការសាងសង់កន្លែងកម្សាន្តលើព្រែកតូចសំបូដើមឈូកនោះ គឺអ្នកសាងសង់សួននៅឃុំដើមដូង តែដីនៅខាងឃុំម្រោម។ លោក ងឹម ញនបាននិយាយប្រាប់បន្តថា អ្នកធ្វើសួនកម្សាន្តនៅលើព្រែកនោះមិនទាន់មានច្បាប់ទេ។
សូមបញ្ជាក់ថា ព្រែកទាំងពីរនេះ កំពុងរងការទន្រ្ទានពីអ្នកមានលុយយកធ្វើជាកម្មសិទ្ធិ នៅឃុំផ្សេងគ្នា តែមានភូមិសាស្ត្រជាប់គ្នានៅអមសងខាងផ្លូវគ្រួសក្រហមមិនឆ្ងាយពីឃុំដើមដូងប៉ុន្មានជាមួយគីឡូដី៕