កាលពីថ្ងៃទី១៨ ខែមិថុនា ឆ្នាំ២០១៨ ឯកឧត្តម អ៊ូច ភា អភិបាលខេត្ត និងជាប្រធានកិត្តិយសសាខាកាកបាទក្រហមខេត្តតាកែវ បានចុះចែកអំណោយដល់ប្រជាពលរដ្ឋទីទ័លក្រ ប្រមាណជាង២០០នាក់ នៅក្នុងឃុំអង្គប្រាសាទ ស្រុកគីរីវង់។ ថ្លែងក្នុងឱកាសនោះដែរ អភិបាលខេត្តតាកែវរូបនជបានលើកឡើងថាខណៈដែលការបោះឆ្នោតជ្រើសតាំងតំណាងរាស្ត្រខិតជិតចូលមកដល់ អ្នកនយោបាយមួយចំនួនតែងចេញមុខធ្វើការសន្យាខ្យល់បោកប្រាស់ប្រជាពលរដ្ឋ ដូច្នេះប្រជាពលរដ្ឋត្រូវតែគិតគូរពិចារណាឱ្យបានច្បាស់លាស់ចំពោះបញ្ហានេះ។ ឯកឧត្តមបានអំពាវនាវឲ្យប្រជាពលរដ្ឋគិតពិចារណាឲ្យបានច្បាស់លាស់ មុននឹងសម្រេចចិត្តបោះឆ្នោតគាំទ្របក្សនយោបាយណាមួយ គឺកុំជឿការឃោសនាបោកប្រាស់របស់អ្នកនយោបាយមួយចំនួន ដែល៥ឆ្នាំឃើញមុខម្ដង ហើយចេញមុខមកសន្យាខ្យល់ បោកប្រាស់ប្រជាពលរដ្ឋ។
ឯកឧត្តម អ៊ូច ភា បានពន្យល់ថាដើម្បីបន្តឱ្យប្រទេសជាតិឈានឆ្ពោះទៅរកភាពចម្រើនកាន់តែខ្លាំងទៅមុខទៀត ប្រជាពលរដ្ឋត្រូវបន្តបោះឆ្នោតគាំទ្រគណបក្សប្រជាជនកម្ពុជា ដែលមានរូបសញ្ញា ទេវតាបាច ផ្កា និងមានលេខរៀងទី២០។ ការបោះឆ្នោតឲ្យគណបក្សប្រជាជនកម្ពុជា គឺមានតម្លៃស្នើនឹង បោះឆ្នោតឲ្យខ្លួនឯងដូច្នោះដែរ។
ឯកឧត្តម ជឿជាក់ថាក្រោមការដឹកនាំរបស់គណបក្សប្រជាជនកម្ពុជា ដែលមានសម្ដេចតេជោជាប្រមុខដឹកនាំ បាននិងធ្វើឲ្យប្រទេសមានស្ថិរភាពនយោបាយ ការអភិវឌ្ឍនៅពាស ពេញផ្ទៃប្រទេស មានកំណើនសេដ្ឋកិច្ច ជារៀងរាល់ឆ្នាំ ជាពិសេស ប្រទេសជាតិទាំងមូល រស់នៅប្រកប ដោយសុខសន្តិភាព។
គួររំលឹកថា ឯកឧត្តម អ៊ូច ភា បានកាន់តំណែងជាអភិបាលខេត្តតាកែវជំនួសឯកឧត្ត ឡាយ វណ្ណៈ។
