នៅរសៀលថ្ងៃទី១៨ ខែមិថុនា ឆ្នាំ២០១៨ នេះ លោកឧត្តមសេនីយ៍ទោ ជួន ណារិន ស្នងការនគរបាលខេត្តព្រះសីហនុបានថ្លែងថា សមត្ថកិច្ចបានបញ្ជូនខ្លួនអ្នកបើកបរតាក់ស៊ី (ជនបង្កហេតុ) ទៅតុលាការ បន្ទាប់ពីសាកសួររួចតុលាការបានចេញដីកាឃុំខ្លួនអ្នកបើកបររថយន្តតាក់ស៊ី ដែលបានបើកបុករថយន្តសម្តេចក្រុមព្រះ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច កាលពីថ្ងៃទី១៧ ខែមិថុនា ឆ្នាំ២០១៨ ដែលបណ្តាលឱ្យអ្នកម្នាង អ៊ុក ផល្លា សោយទិវង្គត។
លោកឧត្តមសេនីយ៍ទោបានបញ្ចាក់ថា រថយន្តតាក់ស៊ី (High lander) បានប្រើប្រាស់ល្បឿនហួសកំណត់ និងរំលោភទៅផ្លូវម្ខាង វ៉ាជែង។
គ្រោះថ្នាក់ចរាចរណ៍រវាងរថយន្តតាក់ស៊ី នឹងព្រះទីនាំង សម្តេចក្រុមព្រះ បានកើតឡើងកាលពីព្រឹកថ្ងៃអាទិត្យទី១៧ ខែមិថុនា នៅភូមិអូរតាសេក ឃុំអូរចំណារ ស្រុកព្រៃណប់ ខេត្ដព្រះសីហនុ ចន្លោះគីឡូម៉ែត្រ២០០-២០១ ខណៈពេលដែលអ្នកម្នាង និងសម្ដេចក្រុមព្រះធ្វើដំណើរយាងទៅកាន់ទីក្រុងព្រះសីហនុ ដើម្បីជួបសំណេះសំណាលជាមួយអ្នកគាំទ្រគណបក្សហ្វ៊ុន ស៊ិនប៉ិច។
សូមបញ្ជាក់ថា សពអ្នកម្នាង អ៊ុក ផល្លា កំពុងតម្កល់ធ្វើបុណ្យនៅក្នុងបរិវេណវត្តបទុមវតី រាជធានីភ្នំពេញ ហើយសពនឹងត្រូវបូជានៅថ្ងៃទី២០ ខែមិថុនា ឆ្នាំ២០១៨ ដោយឡែក សម្តេចក្រុមព្រះត្រូវបានបញ្ជូនទៅព្យាបាលនៅមន្ទីរពេទ្យនៅប្រទេសថៃ ដោយសារតែស្ថានភាពរបួសរបស់ព្រះអង្គធ្ងន់ធ្ងរ គឺពាក់ព័ន្ធនឹងឆ្អឹង។