Tuesday, June 19, 2018

សម្តេចម៉ែ យាងគោរពវិញ្ញាណក្ខន្ធអ្នកម្នាង អ៊ុក ផល្លា រណឬទ្ធិ នៅវត្តបទុមវត្តី

អាម៉ាប៉ាប៉ាញ៉ូស

ភ្នំពេញៈ សម្តេចព្រះមហាក្សត្រី នរោត្តម មុនិនាថ សីហនុ ព្រះរវរាជមាតាជាតិខ្មែរ ក្នុងសិរីភាព សេចក្តីថ្លៃថ្នូរ និងសុភមង្គល ស្តេចយាងគោរពវិញ្ញាណក្ខន្ធអ្នកម្នាង អ៊ុក ផល្លា រណឬទ្ធិ នៅព្រឹកថ្ងៃទី១៩ ខែមិថុនា ឆ្នាំ២០១៨នេះ នៅវត្តបទុមវត្តី។

សូមបញ្ជាក់ថា អ្នកម្នាង អ៊ុក ផល្លា ភរិយា​នៃសម្តេចក្រុមព្រះ នរោត្តម រណឫទ្ធិ បានទទួលមរណភាពនៅវេលាថ្ងៃត្រង់ ថ្ងៃអាទិត្យ ទី១៧ ខែមិថុនា ឆ្នាំ២០១៨ ក្រោយឧប្បទ្ទវហេតុគ្រោះថ្នាក់ចរាចរណ៍ នៅក្នុងស្រុកព្រៃនប់ ខេត្តព្រះសីហនុ។

សម្ដេចក្រុមព្រះ នរោត្តម រណឫទ្ធិ និងអ្នកម្នាង អ៊ុក ផល្លា បានជួបឧប្បទ្ទវហេតុគ្រោះថ្នាក់ចរាចរណ៍ នៅលើកំណាត់ផ្លូវជាតិលេខ៤ ចន្លោះ​គីឡូម៉ែត្រ​២០០-២០១​ ស្ថិតនៅ​ក្នុង​ភូមិ​អូរតាសេក ឃុំ​អូរឧកញ៉្ញាហេង​ ស្រុក​ព្រៃនប់​ ខេត្ត​ព្រះសីហនុ នាវេលាម៉ោង៨៖៥០នាទីព្រឹក ថ្ងៃ​អាទិត្យ​ ៥កើត ​​ខែ​បឋមាសាធ​ ឆ្នាំ​ច​ សំរឹទ្ធិស័ក​ ព.ស​២៥៦២​ ត្រូវនឹង​ថ្ងៃ​ទី​១៧​ ខែ​មិថុនា​​​ ឆ្នាំ​២០១៨នេះ។ ក្រោយកើតហេតុ សម្ដេចក្រុមព្រះ និងអ្នកម្នាង បានរងរបួសធ្ងន់ដូចគ្នា ហើយត្រូវបានដឹកបញ្ជូនទៅសង្គ្រោះបន្ទាន់ភ្លាមៗផងដែរ។

រហូតមកដល់វេលាថ្ងៃត្រង់ នៃថ្ងៃកើតហេតុនេះ ពោល គឺម៉ោង១២៖២៣នាទីថ្ងៃត្រង់ អ្នកម្នាង អ៊ុក ផល្លា ក៏បានលាចាកលោកនេះ ដោយមិនអាចទ្រាំទ្រសារនឹងស្ថានភាពរបួសធ្ងន់ធ្ងរ។ ដោយឡែក សម្ដេចក្រុមព្រះ ក៏ត្រូវបានក្រុមគ្រូពេទ្យបញ្ជូនតាមឧទ្ធម្ភាគចក្រមកមន្ទីរពេទ្យ នៅឯរាជធានីភ្នំពេញ ខណៈមានសេចក្ដីរាយការណ៍ថា ស្ថានភាពរបស់ព្រះអង្គ បានប្រសើរឡើងហើយ។

សូមបញ្ជាក់ថា គ្រោះថ្នាក់ចរាចរណ៍ដ៏រន្ធត់នេះ បង្កឡើងដោយរថយន្តម៉ាក ហាយឡែនឌ័រ (HightLander) ពណ៌ទឹកប្រាក់ ពាក់ស្លាកលេខ ភ្នំពេញ 2L-9667 ជារថយន្តតាក់ស៊ី បើកបរ​ដោយ​ឈ្មោះ​ វ៉ុល​ សារ៉េត​ ភេទប្រុស​ អាយុ​៣៤ឆ្នាំ​ មុខរបរ​រត់​តាក់ស៊ី​ មានទីលំនៅ​ភូមិ​២ សង្កាត់​លេខ​១​ ក្រុង​/ខេត្ត​ព្រះសីហនុ​ ដែលដឹក​ភ្ញៀវ​ចំនួន​៤នាក់​ ស្រីម្នាក់ បានធ្វើដំណើរពីខេត្តព្រះសីហនុ ឆ្ពោះមករាជធានីភ្នំពេញ។ លុះដល់ចំណុចកើតហេតុខាងលើ រថយន្តបង្កបានរ៉េចង្កូតទៅខាងឆ្វេងដៃបុកនឹងរថយន្តមួយគ្រឿងម៉ាក BMW ពណ៌ទឹកប្រាក់ ពាក់ស្លាកលេខ រដ្ឋសភា5 2-090 ជិះគ្នា៣នាក់ ដែលជាព្រះទីនាំងរបស់សម្ដេចក្រុមព្រះ នរោត្តម រណឫទ្ធិ កំពុងធ្វើដំណើរក្នុងទិសដៅផ្ទុះគ្នា។

បើតាមរបាយការណ៍របស់ស្នងការនគរបាលខេត្តព្រះសីហនុ លោក ជួន ណារិន្ទ គ្រោះថ្នាក់​នេះ ​បណ្ដាល​ឲ្យ​រងរបួស​មនុស្ស​ចំនួន​៧នាក់​ ស្រី​២នាក់ ដោយក្នុងនោះ អ្នកម្នាង អ៊ុក ផល្លា បានរងរបួស​ធ្ងន់​ ហើយត្រូវបញ្ជូនទៅសង្គ្រោះ​បន្ទាន់​នៅ​មន្ទីរ​ពេទ្យ​បង្អែក​ខេត្ត​ព្រះសីហនុ​ និងសម្តេច​ក្រុមព្រះ នរោត្តម រណឫទ្ធិ រងរបួស​ធ្ងន់​ ត្រូវបានបញ្ជូន​សង្គ្រោះ​នៅ​គ្លីនិក​សេតេ ខណៈអ្នក​រងរបួស​ផ្សេង​ៗទៀត​ កំពុង​បញ្ជូន​ទៅ​សង្គ្រោះ​នៅ​គ្លីនិក​ផ្សេង​ៗ​។ ចំណែក​អ្នកបើកបរ​រថយន្ត​តាក់​ស៊ីឈ្មោះ ​ វ៉ុល​ សារ៉េត ដែលរងរបួសធ្ងន់ដែលនោះ កំពុងស្ថិតក្នុងការសង្គ្រោះ និងឃ្លាំមើលពីសមត្ថកិច្ច។

គួរជម្រាបថា នៅព្រឹកថ្ងៃអាទិត្យ ទី១៧ ខែមិថុនា ឆ្នាំ២០១៨នេះ សម្ដេចក្រុមព្រះ នរោត្តម រណឫទ្ធិ ព្រះប្រធានគណបក្សហ្វ៊ុនស៊ីនប៉ិច ព្រះអង្គយាងជួបសំណេះសំណាលសមាជិកគណបក្សនៅខេត្តកំពត និងខេត្តកែប។ បន្ទាប់ពីបញ្ចប់ពិធីសំណេះសំណាលនេះ ព្រះអង្គមានបំណងយាងបន្តដំណើរទៅជួបសំណេះសំណាលជាមួយសមាជិកបក្សនៅខេត្តព្រះសីហនុបន្តទៀត ប៉ុន្តែបែរជួបគ្រោះថ្នាក់ចរាចរណ៍ដ៏រន្ធត់នេះតែម្ដង៕

@Amapapa.News

Feature Ads