កញ្ញា លី ច័ន្ទវត្តី អតីតសកម្មជនអតីតគណបក្សសង្គ្រោះជាតិ បានសរសេរក្នុងហ្វេសប៊ុកថា៖ សម្តីពេលអ៊ំ សែន អត់ទាន់ប្រតិកម្ម និងក្រោយប្រតិកម្ម អ៊ំរៀបដកតំណែង ដោយភ្ជាប់ជាមួយសារទាំង២។ ដោយឡែក លោក គង់ យ៉ៃរ៉ា ក៏មិននៅស្ងៀមដែរ តាមរយៈហ្វេសប៊ុកលោកថា៖ តើមានមនុស្សប៉ុន្មាននាក់ដែលនិយាយពាក្យពិត ស្រលាញ់ការពិត និងធ្វើដើម្បីជាតិពិតប្រាកដទៅ? មនុស្សយើងមិនអាចមើលឃើញសកម្មភាពល្អមួយ ឬពីរ រួចវាយតម្លៃថាមនុស្សនោះល្អបានទេដើម្បីជៀសវាងការសោកស្ដាយពេលក្រោយ។
នេះជាសំណេររបស់លោក ផែង វណ្ណៈ ក្រោយសម្តេច ហ៊ុន សែន ព្រមានដកតំណែង៖ ឪពុកស្ដីប្រដៅកូនជារឿងធម្មតា ខ្ញុំបាទសូមអភ័យទោសសម្ដេចតេជោ ហ៊ុន សែន ចំពោះកំហុសឆ្គងដោយអចេតនាអំពីករណីលោក ស្រិល វណ្ណា និង ករណីផ្សារផល្លាររាត្រីអង្គរ៥ ខេត្តសៀមរាប ។ ខ្ញុំបាទសូមគាំទ្រ និងទទួលយកទាំងស្រុងចំពោះមតិណែនាំដ៏ខ្ពង់ខ្ពស់សម្ដេចតេជោ ហ៊ុន សែន ដោយខ្ញុំបាទនឹងមិនបន្តការផ្សាយអំពីរឿងទាំង២នេះតទៅទៀតទេ។ សូមគោរពជូនពរ សម្ដេចតេជោ ហ៊ុន សែន មានសុខភាពល្អ បរិបូរណ៍ អាយុយឺនយូរ ដើម្បីបន្តដឹកនាំនាវាកម្ពុជារក្សាបានសុខសន្តិភាព និង ការអភិវឌ្ឍន៍ ។ សូមសម្ដេចតេជោ ហ៊ុន សែន មេត្តាទទួលនូវការគោរពដ៏ខ្ពង់ខ្ពស់អំពីខ្ញុំបាទ ផែង វណ្ណៈ។
នេះជាសំណេររបស់លោក ផែង វណ្ណៈ មុនពេលប្រតិកម្មរបស់សម្តេច ហ៊ុន សែន បើយើងនៅតែភ័យខ្លាចបាត់បង់តួនាទី បុណ្យស័ក្កិ មិនហ៊ាននិយាយមិនការពិតរិះគន់ចំណុចអសកម្មឬរិះគន់មន្ត្រីពុករលួយខិលខូច យើងមិនអាចកែប្រែសង្គមយើងឱ្យប្រសើរឡើងបានទេ។
សូមរំលឹកថាកាលពីម្សិលមិញ សម្តេច ហ៊ុន សែន បានព្រមានដកតំណែងលោក ផែង វណ្ណៈ និងលោក ខាន់ ចាន់សុផល រឿងអ្នកទាំង២នៅតែនិយាយរឿងអាស្រូវស្នេហា រវាងអតីតព្រះសង្ឃ លោក ស្រិល វណ្ណា និងស្រីស្នេហ។