កំពតៈ ប្រភពពីមន្ត្រីអាជ្ញាធរ និងសមត្ថកិច្ចមូលដ្ឋានក្នុងស្រុកជុំគីរី ខេត្តកំពត បានឲ្យដឹងថា បច្ចុប្បន្នមេឈ្មួញ ប៊ុន ទូច ជាគ្រូបង្រៀន បានដើរប្រមូលទិញឈើពីក្រុមឈ្មូញតូចកាច នៅស្រុកឈូក និងស្រុកជុំគីរី។
ប្រភពបានឲ្យដឹងទៀតថា មេឈ្មួញ ប៊ុន ទូច នៅតែបន្តប្រមូលទិញឈើពីឈ្មួញមួយចំនួនដើម្បីដឹកចេញទៅលក់នៅតាមបណ្តាលស្រុកមួយចំនួនយ៉ាងរលូន ព្រោះមានការឃុបឃិតពីមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធជាច្រើនស្ថាប័នផងដែរ។
មន្ត្រីអាជ្ញាធរមូលដ្ឋានក្នុងស្រុកជុំគីរី បានឲ្យដឹងថា មួយរយៈពេលចុងក្រោយនេះ មេឈ្មួញ ប៊ុន ទូច បានយកលុយពីជំនួញឈើរបស់ខ្លួនទៅជួយបក្សយ៉ាងក្រអឺតក្រទម។
ប្រជាពលរដ្ឋ បានឲ្យដឹងថា មេឈ្មួញ ប៊ុន ទូច បានប្រមូលទិញឈើ ដែលឈ្មួញតូចតាចដឹកមកពីតំបន់ផ្សេងៗហើយស្តុកទុកនៅចំណុចភូមិត្រពាំងវែង ឃុំត្រពាំងរាំង ស្រុកជុំគីរី ខេត្តកំពត។ ពលរដ្ឋបន្តថា នៅពេលប្រមូលទិញបានច្រើន ទើបមេឈ្មួញ ប៊ុន ទូច ដឹកជញ្ជូនចេញទៅលក់តាមស្រុកមួយចំនួនក្នុងភូមិសាស្រ្តខេត្តកំពតយ៉ាងរលូន ព្រោះមានការជួយសម្របសម្រួលពីសមត្ថកិច្ច ហើយគ្មានសមត្ថកិច្ចណាហ៊ានរំខានសកម្មភាពជំនួញឈើរបស់មេឈ្មួញ នោះឡើយ។
មន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធក្នុងស្រុកជុំគីរី បានចាត់ទុកជំនួញឈើខុសច្បាប់របស់មេឈ្មួញ ប៊ុន ទូច ជាប្រភពចំណូលរបស់ពួកគេ ហេតុនេះហើយទើបពួកគេបណ្ដោយឲ្យមេឈ្មួញម្នាក់នេះធ្វើអ្វីៗតាមអំពើចិត្ត។
ប្រភពពីមន្ត្រីដែលស្និទ្ធនឹងមេឈ្មួញ ប៊ុន ទូច បានឲ្យដឹងថា មួយរយៈចុងក្រោយនេះ ឈ្មួញតូចតាចមួយចំនួនបានដឹកឈើចេញពីស្រុកឈូក យកមកស្តុកទុកនៅផ្ទះរបស់គាត់ខាងត្បូងផ្សារជុំគីរី។
ប្រភពបានឲ្យដឹងទៀតថា ការដែលមេឈ្មួញ ប៊ុន ទូច នៅតែអាចបន្តសកម្មភាពប្រមូលទិញឈើ និងដឹកជញ្ជូនឈើមិនរំខានដល់សមត្ថកិច្ច និងជំនាញនោះទេ មកពីមានការបើកភ្លើងខៀវពីសំណាក់ លោកមេព្រៃនៅសង្កាត់ជុំគីរី និងលោកនាយខណ្ឌតែម្តង។
ខណៈដែលក្រុមអ្នកកាសែតចុះទៅផ្ដិតយករូបសកម្មភាពដឹកឈើរបស់មេឈ្មួញរូបនេះ លោក ប៊ុន ទូច និងប្រពន្ធរបស់ បានដណ្តើមយកកាមរ៉ា និងទូរស័ព្ទពីអ្នកកាសែត បណ្តាលឲ្យបែកអីក្រង់ទូរស័ព្ទ និងជេប្រមាណដល់អ្នកកាសែតទៀតផង ។
ជុំវិញសកម្មភាពដឹកឈើ និងប្រមូលទិញឈើខាងនេះ មហាជនស្នើសុំឲ្យលោកប្រធានមន្ទីរកសិកម្ម ខេត្តកំពត មេត្តាជួយពិនិត្យមើលផង៕
